࿑གང་ལ་བརྟེན་ན་བསླུ་བར་མི་འགྱུར་ཞིང་།།
དགེ་སྡིག་མ་འདྲེས་འབྱེད་པའི་ས་མཁན་ནི།།
ཐོས་བསམ་སྒོམ་ལས་གཞན་དུ་མ་དམིགས་པས།།
དཔེ་མང་སྤངས་བའི་དཀྱིལ་ནས་འདའ་བར་ཤོག།

གཤིས་ཀ་ཕྲན་བུ་ཞིག་གླེང་བ།
དགའ་ཕྱོགས་མང་ཞིང་དོན་དག་སྣ་མང་ལ་ཚོར་བ་རྐྱེན་པོ་ཡོད་མཁན་ཞིག་ཡིན་ན། མི་གཤིས་དེ་ལ་ཞན་ཆ་ཤིན་ཏུ་ཆེ་བར་བཤད་ལ། དེར་བརྟེན་འཇར་པན་བ་ཞིག་གིས《ཚོར་བ་རྟུལ་བའི་སྟོབས》ཞེས་པ་ཞིག་བརྩམས་ཏེ། ཚོར་བ་རྟུལ་བ་རྣམས་མྱི་བརྟན་པོ་སོགས་ཀྱི་དགེ་མཚན་ཆེ་རབས་བཤད་ཡོད། ཡིན་ནའང་ཟུར་མང་བའི་བསམ་གཞིག་གི་བགྱི་བ་ལྷུར་ལེན་ནས་མི་ཚེའི་མཚན་ཉིད་རིག་པའི་གས་སྲུབ་ཀྱི་གདོས་ཚད་ལ་ལྟོས་ནས་གང་འཚམ་གྱི་ཤེས་རབ་ཀྱི་ལྷན་པོ་རེ་མ་ཆད་པར་བྱེད་རྒྱུ་གལ་ཆེ་བར་སྙམ་ཞིང་། རང་ཉིད་ཚོགས་སྡེ་གང་རུང་ཞིག་གམ། ཡུལ་ལུང་གང་རུང་རེའི་ཁུང་མིར་གཏོགས་ན། གླེང་སློང་སྣ་ཚོགས་དང་། སྤྱི་ཚོགས་ཀྱི་རིག་ཚན་རེ་ཟུང་གི་སྟེགས་བུར་འགྲེང་དུས། མི་མངོན་པའི་ལག་པ་ཞིག་གིས་ཁྱོད་རང་སུ་ཞིག་གི་ཕྱོགས་སུ་འདུག་དགོས་པར་ཐག་གིས་བཅད་ཅིང་། ལང་ཕྱོགས་གང་ཞིག་བཟུང་དགོས་པ་སོགས་ཀྱང་གཏན་ཁེལ་བྱས་དང་བྱེད་མུས་སུ་ཡོད་ལ། མི་མངོན་པའི་ལག་པ་དེས་ལྡིངས་ཆ་དེ་དག་གི་ཁྲོད་ནས་དོན་དམ་པའི་མི་སྒེར་གྱི་ལྟ་བ་དང་མི་ཚེ། ཤེས་རབ་ཀྱི་བདེན་པ་སོགས་གོ་མེད་ཚོར་མེད་ངང་བོར་ཏེ། རྗེས་འབྲང་བ་འཚོལ་བཞིན་པའི་མི་ཆེན་རེ་ཟུང་གི་ལག་རྡོ་རུ་བཀོད་སྒྲིགས་བྱས་དང་བྱེད་བཞིན་ཡོད་པ་རྣམས་ལས་གཡོལ་ཐུབ་པ་ལའང་ཕན་ཡོད་པར་སྙམ་མོ།།

མདོར་བསྡུས་ན་མིའི་སྤྱི་ཚོགས་དེ་རྒྱ་མཚོའི་རླབས་ཡིན་ན་མི་སྒེར་ནི་དེའི་ཁར་གཡེང་བཞིན་པའི་ཤེས་རྟོགས་མེད་པའི་བེམ་པོ་ཞིག་ཡིན་ནོ།།

ཐ་ན་རང་གི་འགྲོ་འདུག་ཀྱང་ལས་དབང་ལ་སྐྱབས་བཅོལ་ཞིང་ཞེ་དྲག་ཡིད་ཆེས་ཡོད་པའི་ངར་མཚོན་ན། ལས་དབང་ནི་རང་གི་ཁ་ཕྱོགས་ཤིག་དང་མ་འོངས་པའི་ལག་རྟེན་ཡིན་ཞིང་། ཁ་ཆག་སྣ་རལ་ག་འདྲ་བྱུང་ཡང་དེ་ནི་སྔོན་བསགས་ཀྱི་ལས་དབང་ཡིན། སྐྱེས་པ་ནས་བརྒྱུད་པའིི་སློབ་གསོ་ལ་རག་ལས་པ་དང་གཅིག བློ་ཉེ་བའི་ཕ་མ་སོགས་ཀྱིས་རྒྱུན་པར་གདམས་པའི་དད་པའི་སྟོབས་ཀྱིས་གཉིས། རང་རྒྱུད་དུ་གང་བྱུང་དུ་མ་ཚོར་བའི་བོད་རྣལ་མའི་བླ་སྲོག་དང་གསུམ་སོགས་གང་ལྟར་ལས་དབང་གི་རྐྱེན་གྱིས་བྱ་བ་ཞིག་གི་འགོ་བརྩམ་ཞིང་དོན་དག་ཅིག་གི་མཇུག་རྫོགས་པས་ལས་དབང་ནི་ངའི་འཚོ་བའི་ཁྲོད་དུ་ཅིས་ཀྱང་མེད་མི་རུང་། བདག་གི་སྣང་ངོར་གལ་སྲིད་ལས་ཀྱིས་མ་བསྐྱབ་ཚེ་ནམ་ཡང་ཅི་བྱ་བཏོལ་མེད་དུ་འདུག་པའི་གོམས་གཤིས་ཤིག་དབང་མེད་དུ་བཟུང་ཟིན་པས། ལས་དབང་གི་བཀོད་འདོམས་ནི་ང་ལ་ཤིན་ཏུ་གལ་ཞིང་ང་ནི་ནམ་ཡང་ལས་དབང་གི་བྲན་གཡོག་ཡིན།