ཚོར་སྣང་ཞིག

ཁམས་བཟང་མོ།
འུ་གཉིས་ཡིད་ཚིམ་པའི་འབྲེལ་བ།
ཇི་འདྲའི་རྙོག་འཛིང་ཞིག་རེད།
ངས་ཕ་ཡུལ་གླེང་བཞིན།
ཁྱེད་ཉིད་ལ་འཕྱ་དགོད་ཀྱི་ཚུགས་ཀ་ཡོད།
ཁྱེད་ཉིད་ཁ་མཚར་གླེང་དུས།
ངས་ནན་ཏན་གྱི་རྣམ་འགྱུར་མཆིས།
འདི་ཚོ་བསྙལ་ཟིན་པའི་ཚོར་སྣང་རེད།

སྙན་ངག་ལ་རོལ་རྗེས།
སྤྱི་ཚོགས་ནི་བྲིས་མ་ཚར་བའི་ལོ་རྒྱུས།
མི་སེམས་ནི་བཟི་ཟིན་པའི་ཁྲམ་པ།
དེ་བས་ལོ་ཟླ་ནི་འཚོ་བའི་ཚོན་མདངས་ཙམ་རེད།

ང་ཚོས་བདག་གཞན་གླེང་དུས།
གཉིད་མ་སད་ཀྱིས་ཅི་བསམ་གླེང་དགོས།
ད་གཟོད་ཚོར་སྣང་ཞིག
ཁེར་རྐྱང་དུ་འཕུར་ལྡིང་བྱེད་སྲིད།
དེའང་ཕ་ཡུལ་འདོད་པའི་རྨི་ལམ་ཡིན་ཁ་རེད།

སྙན་ངག་དང་ཚོར་སྣང་ལ།
ང་ཚོས་ཧམ་སེམས་ཀྱི་འདོད་པ་ཡོད་པས།
གཞན་སྐྱོན་གླེང་རིན་ཡོད་པ་འདྲ།

གང་ལྟར།
འུ་གཉིས་དགའ་ཕྱོགས་ནི་སྙན་ངག་འབྲི་སྟངས་དང་།
དཔེ་ཀློག་བྱེད་སྟངས་ཀྱི་རྣམ་འགྱུར་རེད།
མ་འོངས་པའི་སང་ཉིན་ཞིག་ལ།
ཚོར་སྣང་ལ་སྙན་ངག་ཡོད་པ་སྨོན།

ཚེ་སྲོག་གི་ཉག་མ་རེ་རེར་གནམ་སྔོན་པོའི་པང་དུ་མི་ཤོང་པའི་བོང་ཚད་དང་། ས་ཆེན་པོའི་ཕྲག་ཏུ་མི་ཐེག་པའི་ལྗིད་ཚད་ཡོད། དེ་ནི་གཅེས་པའི་སྲོག་གི་རིན་ཐང་ཟེར་བ་དེའི་བམ་ཁ་དང་གཟབ་ཚད་ཡིན། དབུགས་ཧལ་ཧལ་དུ་རྒྱུ་བའི་སྲོག་ལྡན་སུ་ལ་མཚོན་ན་སེམས་གཟུགས་གཉིས་ཀའི་སྒུལ་གཅོག་གི་ཡོད་ཚད། རང་གི་ཚེ་སྲོག་ལ་འགེབས་སྲུང་གི་འཐབ་རའི་གཞི་ཁྱོན་གྱི་མ་རྩར་ཕུལ་གྱིན་ཡོད་པ་དེས་ཀྱང་ཚེ་སྲོག་གི་རིན་ཐང་ཅི་འདྲ་ཞིག་ཡིན་པ་ཚོར་རྟོག་བྱུང་ངེས།          —   མདོ་མཁྱེན་བརྩེ་རིན་པོ་ཆེས།

མགོ་ཡི་ཅོ་ཕུད་མཛེས་པའི་རྒྱལ་མོ་རོང་གི་རོང་མོས། །དཔྱིད་ལ་རྔུལ་ཆུར་འདྲེས་ནས་ཞིང་ནང་ས་བོན་གཏོར་བ། །ཆར་དང་ཉི་འོད་བརྗེས་ནས་དབྱར་ཟླ་དྲུག་པ་ཚེས་དུས། ། ཞིང་ནང་བཅུད་ཀྱིས་ཁེངས་པས་འབྲས་བུ་མ་སྨིན་རང་སྨིན།།