ང་རྒྱལ་ཁེངས་དྲེགས་བྱས་ན་རང་ཉིད་ལ་གནོད་འཚེ་ཐེབས་སྲིད་ཅིང་། ཁེངས་སྐྱུང་གཟབ་ནན་བྱས་ན་རང་ཉིད་ལ་ཕན་པ་ཚད་མེད་འབྱུང་སྲིད།

骄傲自满会使自己受到损害，谦虚谨慎会使自己受益无穷。

༤༥༣ སྐྱི་བསེར་རླུང་བུ་འཇམ་པའི་ཞོགས་པ་དེར། །
དྭངས་གཙང་ཆུ་ཡིས་ཕྱིི་ཁྲུས་བགྱི་བྱས་ཏེ། །
དབང་ཕྱོགས་ལམ་གྱི་སྣེ་མོར་འཇུ་བ་ལ། །
ཐོག་མའི་བྱེད་པ་མངོན་པའི་ལས་སུ་ཞུགས། །

༤༥༤ ཡར་ཀླུང་གཙང་པོོའི་རྒྱུན་ལ་གྲོགས་སུ་བྱས། །
རྒྱུས་མེད་ཡུལ་ནས་ཅུང་ཙམ་རྒྱུས་མངའ་བ། །
འབྲོང་པོ་རྫོང་ཞེས་བྱ་བར་ཞོགས་ཇ་འཐུངས། །
སླར་ཡང་གཞུང་ལམ་འཕྲུལ་གྱིས་གཅོད་ལ་ཞུགས། །

༤༥༥ བྱེ་མས་ཐང་མ་བརྡལ་བའི་རི་ཀླུང་ནས། །
དྭངས་གཙང་ཆུ་ཕྲན་ཤག་ཤག་བཞུར་བའི་འགྲམ། །
མ་རྨད་གཡུ་ཡི་སྤང་ཐང་རྙེད་པ་དེར། །
ངལ་བའི་འབབ་སྟེགས་བྱེད་པའི་གནས་སུ་བྱས། །

༤༥༦ རྡུལ་གྱིས་ཟོས་པའི་རླངས་འཁོར་འཁྲི་བ་དང་། །
ཡན་ལག་འཁྲི་བའི་ངང་ཚུལ་རྣམ་པ་གཉིས། །
ལྷན་ཅིག་བཟུང་ནས་བག་ཡངས་འཚོ་བ་ཡི། །
ལས་ལ་ཞུགས་པ་བས་མཐའི་རི་སྐྱེས་བཞིན། །

༤༥༧ དེ་ནས་ཡར་མར་འདུར་བ་རྒྱུན་མི་ཆད། །
དུ་མའི་ལམ་ཐག་བཅད་པའི་ལམ་སྣེ་སྟེ། །
ས་དགའ་རྫོང་གི་མར་ཞབས་སྟོད་དབུས་མཚམས། །
སྔར་བཞིན་དཔྱད་པའི་སྒོ་མོར་བརྒལ་ནས་སོང་། །

༤༥༨ ཀྱ་ཀྱུའི་སྣུམ་ལམ་རི་མོ་བྲིས་པ་ཡི། །
བཀྲ་བཀྲ་རི་བོ་དང་ནི་སྨན་སྐྲ་རི། །
བརྒྱུད་ནས་མང་ཡུལ་གུང་ཐང་བྱ་བ་ཡི། །
ལ་ལ་འདུན་པའི་མེ་ཏོག་འཛུམ་བཞིན་སོང་། །

༤༥༩ བོད་ཀྱི་ལྷ་གཅིག་མཚོ་སྐྱེས་རྡོ་རྗེ་ཡི། །
མཚན་དཔེའི་སྐུ་མཆོག་དངོས་ཀྱི་ཕྲིན་ལས་རྫོགས། །
ལྷོ་ནུབ་སྲིན་པོའི་ཡུལ་དུ་གཤེགས་པའི་ཡུལ། །
མང་ཡུལ་གུང་ཐང་བྱ་བའི་གནས་ལ་ལྷགས། །

༤༦༠ སངས་རྒྱས་གཉིས་པ་པདྨ་འབྱུང་གནས་དཔལ། །
ཞག་བདུན་བཞུགས་པའི་དབྱིག་འཛིན་པང་ལ་ནི། །
སྐལ་བཟང་སྐྱེ་བོས་ལེགས་བྱས་སྟོང་གི་དཔལ། །
ལེགས་བཞེངས་ལྷ་ཡི་ཁང་བཟང་ལྷུན་ཆགས་སེ། །

༤༦༡ རྟེན་གཙོ་གུ་རུ་བར་ཆད་ལམ་སེལ་དང་། །
ཨོ་རྒྱན་ཕྱག་སོར་ཕབ་པའི་གོར་མ་དང་། །
ཞབས་ལྷམ་རང་བྱོན་ལྷ་སྲས་མུ་ཏིག་བཙན། །
སྙན་དབང་རང་བྱོན་ལྟ་བྱེད་ལམ་དུ་ལྷམ། །

༤༦༢ མོས་གུས་མེ་ཏོག་ཉེ་བར་ཆུང་ན་ཡང་། །
མ་བཅོས་དད་པའི་ཟེའུ་འབྲུ་བསྟར་བ་ལ། །
རྐང་དྲུག་གྲེ་བར་ཁུག་པའི་སྨོན་ལམ་ཚིག །
བསྐུལ་བ་མིན་ཡང་ལྷན་ཅིག་གྲོགས་སུ་བྱས། །

༤༦༣ དེ་ནས་ཐབས་ཀྱི་ཕྱོགས་སུ་ཆས་པ་ན། །
བྱིན་རྟེན་བྱང་ཆུབ་མཆོད་རྟེན་དཀར་པོ་ཞིག །
བུམ་པའི་རྩེ་མོར་ཨོ་རྒྱན་རང་བྱོན་སྐུ། །
གསལ་བས་བརྒྱན་པ་དེ་ཡང་མཇལ་བར་གྱུར། །

༤༦༤ ཟངས་མདོག་དཔལ་རིའི་སྨོན་ལམ་ལན་གཅིག་ཞུས། །
ལན་གསུམ་བསྐོར་བའི་ཆོ་ག་རྫོགས་པར་བྱས། །
ཅང་ཤེས་བྷ་ལ་ཧ་ལ་བཅིབས་གྱུར་ཏེ། །
སྲིན་ཡུལ་གཤེགས་པའི་ཕྱོགས་སུ་ལྟ་བྱེད་འཕངས། །

༤༦༥ དེ་ནས་ཕྱིར་ལོག་པའི་ལམ་བར་ནས། །
བརྒྱད་ལྡན་ཆབ་གྱི་ཡོན་ཏན་ལྷུན་རྫོགས་པ། །
ཨོ་རྒྱན་ཆེན་པོའི་སྒྲུབ་ཆུ་བཏུང་བའི་སྐལ། །
ཐོབ་ཏེ་་དིང་རི་རྫོང་ལ་ཉེ་བར་ཕྱོགས། །

༤༦༦ ལྷ་ཡི་ལམ་དང་རིན་ཆེན་ཨིནྡྲ་རྙིལ། །
མ་ལུས་མཛེས་པ་འཕྲོག་པའི་གཡུ་ཡི་མཚོ། །
དཔལ་མགོན་མཚོ་ཉེས་སྙན་པ་འཕུར་བ་དེ། །
འདྲེན་བྱེད་ལམ་དང་པར་མིག་ནང་དུ་དྲངས། །

༤༦༧ ཞོ་དང་འོ་དཀར་པདྨའི་རྩ་བ་ལ། །
འཁུ་བའི་གངས་དཀར་མུ་ཁྱུད་བསྐོར་བའི་འདབས། །
འདབ་ལྡན་སེར་པོའི་མཆོད་པ་བསྟར་བ་ཡིས། །
ཡིད་ཀྱི་བརྟན་པ་འགོག་པའི་ལམ་བུ་བརྒྱུད། །

༤༦༨ ཁ་བའི་རྡུལ་བརྩེགས་མཐོངས་ལ་རྩེ་མོ་ཟུག །
ཉི་ཟླའི་རྣ་ཆ་རྒྱན་དུ་དཔྱངས་པ་ཡི། །
སྙན་པའི་གྲགས་དཀར་འཛམ་གླིང་ཡང་རྩེ་ལ། །
འཕགས་པའི་ཇོ་མོ་གླང་མ་ལམ་བར་མཐོང་། །

༤༦༩ དགོང་ཀའི་སྣང་བྱེད་ཟེགས་མ་དབུ་ལ་འཕོས། །
མཚར་སྡུག་གཟི་བྱིན་འབར་བས་ཐབས་ཤེས་ཕྱོགས། །
འཛུམ་པའི་གངས་དཀར་དག་ལའང་ལྷག་པའི་མཛེས། །
རྒྱན་དུ་བྱིན་པའི་ལས་ལ་བྲེལ་བ་བཞིན། །

༤༧༠ སྤྲིན་དཀར་མགུལ་གྱི་རྒྱན་ཆར་ལེན་པ་ཡི། །
གངས་ཀྱི་ས་འཛིན་མོད་པར་གྱུར་ན་ཡང་། །
སྤྱི་བོར་མཉམ་པའི་དཔེ་ཟླ་མ་མཐོང་བས། །
དོན་མཐུན་སྙན་པའི་གྲགས་པ་འབར་བར་ངེས། །

༤༧༡ དེ་ནས་མཚམས་སྤྲིན་སར་བའི་མཚར་སྡུག་གོས། །
རྒྱན་དུ་བཀླུབས་བཞིན་ཉི་མ་ནུབ་རིར་ཡིབ། །
དཀའ་འོད་ཆེམ་ཆེམ་འཕྲོ་བའི་གྲོང་སྡེ་དག །
རྒྱུ་སྐར་དང་ནི་མུ་ཏིག་འཐོར་བའི་དཔེ། །

༤༧༢ དཀར་ནག་འཐབ་པའི་ལམ་བུ་དུ་མ་ལ། །
མི་ཡིས་མ་ཡིན་འཕྲུལ་གྱི་རྐང་པ་ཡིས། །
ཉེ་བར་བཅད་དེ་ལྷགས་པའི་དིང་རི་རྫོང་། །
ངལ་བ་གསོ་བའི་གནས་སུ་ལེན་པར་བྱས། །

༧.༢༨ཉིན་ཕག་ལུག་གྲོང་རྡལ་བྱ་བ་ནས་གུང་ཐང་ལ་ཁར་འགྲོ་ཞོར་དིང་རི་རྫོང་ལ་ལྷགས་པའི་ཟིན་ཐུན། #✍️ དྲང་འཇུག།#

མཛད་པའི་རྣམ་ཐར་ཐོས་ཚེ་བླ་མ་དྲན།། དད་འདུན་འགྱུར་མེད་སྒོ་ནས་གསོལ་བ་འདེབས།། ལས་ངན་འཁོར་བའི་སེམས་ཅན་མ་ལུས་པ།། ནུབ་ཕྱོགས་བདེ་ལྡན་ཞིང་དུ་འདྲེན་དུ་གསོལ།།