大肚岑麗香陳凱琳鬥使老公

兩位懷孕中的女神岑麗香及陳凱琳（Grace）昨日到沙田出席護膚品活動，佗B六個月的香香腳踏4吋高踭鞋，上台時不慎拗一拗，事後她笑說：「冇咁嘅事，都係一個鐘啫！一落台就換拖鞋。」她表示懷孕期間令她成長不少：「我一向怕曱甴，但最近我覺得唔可以係咁，將來要照顧小朋友，要勇敢啲，於是我一手揸住紙巾拍落去殺咗小強。（老公強強係咪都成長咗？）佢都有做Research，諗買咩會令我同BB舒服啲。（有冇趁機使盡老公？）間唔中啦！都係身邊朋友叫咋！不過我都唔想咁公主。」

Grace身穿紅色長裙，中門大開明顯升Cup！她指曾笑言想老公鄭嘉穎為自己煲湯，豈料返到家後即有湯飲，令她非常感動：「佢煲咗瘦肉冬瓜火腿湯畀我飲，係第一次煲，好好飲！（快啲講下次要啲咩！）花膠？講笑啫！唔好咁放肆，平日佢已經做得好好。」

張學友《A Classic Tour學友．經典世界巡迴演唱會》於2016年10月在北京揭開序幕，目前仍進行得如火如荼，前晚他在浙江紹興市舉行第147場巡唱，刷新自己保持的紀錄，並再次創下華人歌手新紀錄，勢向200場衝刺！學友的巡演暫時排到6月底瀋陽站，大概會去到160幾場，以其神級身價，保守估計100萬一場，盛傳今次巡演將為他帶來2億進帳！

昨晨他由紹興返港，有十多名歌迷專誠接機，談到再一次打破自身保持的紀錄，他竟有點怕醜，笑說：「係，唔經唔覺。（好短時間就破咗！）都OK，都冇乜特別諗，覺得過得好快啫，做緊嘢就會過得快。（體力OK？）o依家舒服過開頭做，因為始終做熟咗。（冇人破到你紀錄？）哈哈！紀錄呢啲嘢，係用嚟講o架啫！」他深信將來一定有人能打破其紀錄，笑說：「實有嘅……應該，係冇問題，因為市場同以前唔同咗，o依家同上次都差好遠，去番同一個地方，你會覺得成個地方唔同咗，好似經濟呀，o依家內地發展係好咗同快咗好多。」

有消息指學友將於明年1月再登紅館舞台，選定該處為是次巡唱的終點站，對此學友表示：「應該係，申請咗，我唔知攞到未，我都想喺香港完。（香港後唔會再加場？）冇得一路做落去，始終都要完o架！（一路唱囉？）可以繼續唱，咪唱第二啲嘢嘛，唔通唱一樣嘢唱咁耐！」學友每次開騷都掀起搶飛熱，演唱會門票甚至被炒至過萬元一張，對於有人建議以實名制售票，他極力贊成：「我覺得實名制冇乜壞，好呀！因為有陣時見到自己啲飛炒賣到好貴、好貴，都覺得唔舒服，所以我贊成實名制。」

【攝影師眼中最具魅力】直言對陳玉蓮情有獨鍾 劉德華：我真人靚仔啲！（蘋果即時）
香港專業電影攝影師學會」30週年晚宴今晚假香港洲際酒店舉行，吳鎮宇、劉兆銘、劉偉強、黃岳泰、文詠珊（Janice Man）、周秀娜等出席。由黃心美及林家棟擔任大會司儀，晚宴期間除咗會公佈新一屆理事名單外，仲會頒發4個專業獎項，由劉德華及范冰冰將獲得「攝影師眼中最具魅力男、女演員獎」，蔡崇輝憑《西遊‧伏妖篇》獲得「年度最傑出攝影獎」，而香港沙龍電影有限公司嘅魏天明先生將獲頒「專業精神獎」。
華仔受訪時被問到得獎，佢話：「其實香港都有好多有魅力嘅男藝人，大家俾面啫，我只係其中一個。」問佢覺唔覺得自己上鏡，華仔笑言：「我真人靚仔啲囉！」問到佢覺得最靚仔係邊度，佢話：「耳仔」，至於面部，佢就話係分界嗰邊靚啲，而仲不時有唔同嘅分界。
而問到華仔覺得邊位女藝人最有魅力，佢話：「今日嚟講梗係揀范冰冰啦！如果冰冰以外，我就會揀蓮妹，情有獨鍾。」
再問到華仔今年獲提名金像獎影帝，有幾多信心時，華仔話：「年年都係咁㗎啦！不過今年有好多新血，我識田壯壯好多年，當年佢搵我做導演，佢做監製，但係因為我細膽，唔敢拍，驚自己做得唔好，票房唔好，怕自己連演員都冇得做，好大壓力。」問到華仔想執導咩電影，佢話：「我自己就鍾意喜劇，不過唔係嗰皮。」
問到金像獎嘅對手，華仔話：「鄭中基嗰個古仔我好鍾意，而古仔（古天樂）嗰個演出就幾特別，田壯壯就文藝片啦，而做自閉症男仔嘅凌文龍都係好強。（咁你自己呢？）我係生命拯救生命囉，角色比較特別，但演出就平實一啲，冇乜大起大跌，但古仔嗰個演出幾需要體力，都要打，辛苦過我。」而華仔仲話其實鄭中基嗰套《大樂師．為愛配樂》嘅劇本，佢曾經喺飛機上撞過導演，對方俾過本書佢睇，佢睇完好鍾意，仲話想買咗對方個劇本，不過當時套戲已經拍緊，問到華仔會唔會覺得好遺憾，佢話：「唔緊要啦，應該仲有好多好嘢。」