དེའི་སྐབས་ཤིག་ལོ་ན་ལྔ་བཅུ་ཡས་མས་ཙམ་ལ་སླེབས་པའི་ཨ་ཅག་ཞིག་དབུགས་རྔུབ་གཏོང་དཀའ་བར་གྱུར་ནས་རང་སར་རིལ་ཏེ་འདུག་པ་ན་དེའི་ནང་ཡོད་པའི་ང་ཚོ་ཚང་མས་མཐོང་ཡང་ཚང་མས་དོག་ཟོན་གྱིས་ཁྲིད་ལ་བཅར་འགྲོ་མཁན་གཅིག་ཀྱང་བྱུང་མ་སོང་། དེ་ནས་གང་ཙམ་སོང་རྗེས་སྨན་པ་ཡིན་ནམ་ནད་འགོག་གི་གྱོན་པ་ཆ་ཚང་གྱོན་པ་འགའ་ཞིག་གིས་འཁོར་སྟེག་ཉལ་ཁྲིའི་སྟེང་ཁྱེར་སོང་། ང་ཚོ་ནི་དེར་གཞན་དང་འདྲ་བར་ཁ་ལག་ཐུན་གསུམ་པོ་མ་ཆགས་པར་ཟ་ཞིང་ཉལ་ཁྲིའི་སྟེང་ཁར་པར་ཕུར་བ་འམ་གཉིད་དུ་ལྷོད་འཇགས་པ་ཞིག་བྱུང་། འོན་ཀྱང་དེ་ནི་ཉིན་གཉིས་ཙམ་རེད་ང་ཚོ་གད་པ་མང་པོ་ཞིག་བརྟག་འབྲས་རྒྱུན་ལྡན་དུ་ཆགས་ནས་ཡང་སྐྱར་ས་ཚིགས་དེ་རང་དུ་གཙང་སྦྲའི་ལས་མིར་གྱུར་བ་དང་སྐབས་རེ་ཁ་ལག་སྐྱེལ་རོགས་བྱེད་དགོས་པ་ཕུད་གཙོ་བོ་དེའི་དྲི་ང་བའི་ཁོར་ར་ཁོར་ཡུག་གཙང་སྦྲ་བྱེད་རྒྱུ་དེ་རེད། དེ་ནས་ང་ཚོ་ཁག་ཅིག་སྟོད་ལུང་དུ་གཙང་སྦྲའི་ལས་འགན་སྒྲུབ་པར་འགྲོ་དགོས་པའི་བརྡ་འབྱོར་ནས་སྔར་གྱི་གཙང་སྦྲ་བྱེད་སའི་བོད་སྨན་ཉོ་ཚོང་ལྟེ་གནས་ཟེར་བ་དེར་སླེབས། དེར་ནི་སྔར་དང་མི་འདྲ་བར་སྟེང་ཤོད་བར་གསུམ་ཚང་མ་ནད་པ་ཡིན་མིན་འདྲ་མིན་གྱིས་ཁེངས་ནས་འདུག་ལ་འོག་ཤོད་གཅིག་པུ་ལའང་མི་ལྔ་བརྒྱ་ཙམ་ཡོད་རེད་ཟེར། སྐབས་རེ་མར་ཐོན་འགྲོ་ཉན་གསུམ་བརྒྱ་བཞི་བརྒྱ་ཙམ་ཡོད་ནའང་ཡང་ཡར་ཡོང་མི་དེ་ལས་མང་བ་མེད་ནའང་ཉུང་བ་མེད་ཚོད་རེད། གཏོར་གཟུགས་མགྲོན་ཁང་མཚམས་ཀྱི་ལོགས་དབྱེའི་ས་ཚིགས་དང་བསྡུར་ན་མཐུད་སྒོ་གང་ཙམ་གྱིས་ཞན་པས་ཁང་པའི་སྒྲོམ་གཞི་ཙམ་ལས་ནང་དུ་མཚོན་སོགས་ཀྱིས་བརྒྱན་མེད་པ་མ་ཟད་གསང་སྤྱོད་དེ་ཚོ་ཡང་བཟོ་བཅོས་ཡག་པོ་བྱུང་མེད་པས་ཅིན་པ་དང་ཆུ་ཐོག་རྩེགས་འོག་ཏུ་ཟག་ཡོང་གི་ཡོད་པས་གསང་སྤྱོད་གཙང་སེལ་བྱེད་རྒྱུར་དཀའ་ཁག་ཆེན་པོ་འདུག ད་དུང་དེར་ཉེན་རྟོག་པ་དང་དང་བླངས་པ་དེ་འདྲ་མཐོང་ཆོས་སུ་མ་གྱུར་བས་ནད་པའི་ཁ་ལག་ཚང་མ་ཐོག་རྩེགས་ལྔ་དྲུག་བར་ང་ཚོ་གད་པ་ཚོས་སྐྱེལ་དགོས་པས་གཙང་སྦྲ་བྱེད་དགོས་པ་ལས་ཀྱང་དཀའ་ཁག་ཆེ་བ་བྱུང་། སྐབས་རེ་ནད་པ་ཚོ་འུར་ནས་ཁ་ལག་སོ་སོས་རང་འཚམ་གྱིས་ཁྱེར་ནས་ནད་པ་མང་པོར་ཁ་ལག་མ་རག་པ་མ་ཟད་ང་ཚོ་གད་པ་གཅིག་ཅོག་གི་ཁ་ལག་སྐྱེལ་མི་ཚོ་ལའང་རག་གི་མིན་འདུག

ཁ་ལག་གི་དོན་དུ་ནད་པ་ཚོས་ཚིག་ངན་སྨྲ་བ་ཙམ་མ་ཟད་འགའ་ཞིག་གིས་ལག་པ་མི་འགུལ་བའི་ངེས་པའང་མིན་འདུག དེ་ནས་ཁ་ལག་སྐྱེལ་མི་སོགས་ཀྱི་ཆེད་གོང་རིམ་ནས་དེར་ཡོད་ནད་པའི་ནང་ནས་འདིར་ལས་ཀ་བྱེད་མི་ཡོད་ན་གླ་ཆ་ཡོད་པས་ཐོ་བཀོད་ལ་ཤོག་ཟེར་བས་ལས་མི་བརྒྱ་ཙམ་བྱུང་ཟེར། དེར་སྨན་པའང་མང་པོ་མི་འདུག་ལ་ཁོ་ཚོའི་སྦྱིན་ཡས་ཀྱི་སྨན་གང་འཚམས་ཤིག་ཀྱང་བོར་བ་གོ་ཐོས་འདུག ད་ནི་ང་ཚོ་ཁ་ལག་སྐྱེལ་བར་རོགས་པ་ཙམ་ལས་གཙོ་བོ་གཙང་སྦྲ་བྱེད་དགོས་པ་དེ་ཡིན་ཡང་བཀག་རྒྱ་བསྡམས་ནས་ཉིན་ཞག་སུམ་བཅུ་ལྷག་ཙམ་སོང་ཟིན་པས་སེམས་གཏིང་ནས་སུན་སྣང་ཞིག་སྐྱེས་ཏེ་ནད་ཡམས་ངན་པ་འདི་མགྱོགས་ནས་མྱུར་དུ་ཞི་བར་ཤོག་ཅིག་སྙམ་པའི་སྨོན་ལམ་ཡང་ངང་གིས་འཆོར།།
__________________________༢༠༢༢ / ༩ / ༡༤ ཉིན།

པོད་འཕྲིན་ནང་དུ་བོད་ཡིག་སྤེལ་ཐུབ་ནའང་མང་པོ་ཞིག་གིས་མི་སྤེལ་བ་ཅིའི་ཕྱིར་ཡིན།མང་པོ་ཞིག་ལ་བརྡ་འཕྲོད་ཕྱིར་དུ་ཡིན་ན་བོད་ཡིག་དང་ཡིག་རིགས་དེ་ཚོ་ལྷན་ཏུ་སྤེལ་ན་ཆོག་གི་འདུག

མདོར་ན་ལས་འབྲས་རྣམ་གཞག་རྒྱལ་བས་གསུངས།།
ཀྱེ་མ་ཀྱེ་ཧུད་འཁོར་བའི་སེམས་ཅན་རྣམས།།
རྒྱུ་འབྲས་གནད་ལ་དྲན་དང་བག་ཡོད་མཛོད།།
རང་གིས་རང་ཉིད་བསླུས་ན་སུ་ཡིས་སྐྱོབས།།