རྒྱ་ཆེན་རྩིག་པའི་ཁང་ཆེན་ཁྱེད་ལ་མེད།།
ནང་བཀོད་མཛེས་པའི་རྒྱས་སྤྲོས་དེ་བས་མེད།།
རྙིང་རུལ་གྱུར་བའི་ཤིང་ཁང་གྲུ་བཞི་ན།།
ཆོས་མཐུན་སྤྲོས་མེད་རྣལ་འབྱོར་ཁྱེད་རེ་སྐྱིད།།

བསྟོད་ན་དགའ་བའི་ཚེམས་དཀར་བཞད་མྱོང་མེད།།
སྨད་ན་སྡང་བའི་ཁྲོ་གཉེར་བསྡུ་མྱོང་མེད།།
དགའ་སྡུག་རོ་མཉམ་ལྟ་བའི་ཀློང་ཡངས་སུ།།
རེ་དོགས་མདུད་པ་གྲོལ་བ་ཁྱེད་གཅིག་སྐྱིད།།

ཌ་དྲིལ་ས་སོགས་བློ་ཡིས་མི་ཐོང་བའི།།
ནང་ནོམ་རྩ་ཆེན་ཕྱག་གིས་གཉོར་མྱོང་མེད།།
སྒོར་གྱི་གྲངས་འབོར་གསོག་ལ་མི་དགྱེས་པའི།།
ཆོག་ཤེས་ནོར་ལྡན་འཕགས་པ་ཁྱེད་རེ་ཕྱུག།

བྱམས་བརྩེས་ཐུགས་རྒྱུད་གཏམས་པའི་དན་རྟགས་ལ།།
སྒོ་ཁའི་ཁྱི་ཡང་ཁྱེད་དང་ལྷན་ཅིག་ཏུ།།
གོ་ཁར་ཉལ་འཆག་ཅི་དགར་སྤྱོད་པ་ལ།།
ཐུགས་སུན་མི་མཛད་ཁྱི་གྲལ་བཞུགས་འདི་རྨད། །

བླ་མ་སྒྲུབ་ན་སེམས་རྒྱུད་འཁྲུལ་ངོ་འཕྲོད།།
འཇིག་རྟེན་སྒྲུབ་ན་སེམས་རྒྱུད་འཁྲུལ་བར་དཔྱོད།།
ལྷ་ངོ་སྲུང་ན་དངོས་སྒྲུབ་ཆར་རྒྱུན་འབབ།།
མི་ངོ་སྲུང་ན་ཟང་ཟིང་མཐུན་འཇུག་འགྲུབ།།

#微博[超话]# ༄༅། །སྟོན་འཇུག་སྨུག་པས་རི་བོའི་འགུ་ན་འཁྱུད།།
ཁྲུང་ཁྲུང་ཁྱུ་ཡིས་ཁ་ཕྱོགས་རོང་ལ་བསྒྱུར།།
གྱི་ལིང་རྟ་ཕོའི་མགོ་བོ་རྩྭ་ལ་གཡེང་།།
ཁེ་རྐྱང་མི་ཕོའི་སེམས་པ་ཡུལ་ལ་འཕྲེང་།། https://t.cn/A66nFHcK