ཞིང་སྨོན་བདེ་ཆེན་ལམ་སྟོན།
བསླུ་མེད་བདེ་ལྡན་ཞིང་མགོན་འོད་དཔག་མེད།།
རྩ་ེགཅིག་དད་པའི་ཤུགས་ཀྱིས་ཁྱེད་བསྒོམ་ན།།
དང་བའི་ཡིད་ངོར་སྣང་སྟོང་སྒྱུ་མའི་སྤྲིན།།
སྐུ་དང་ཞིང་ཁམས་རྟག་ཏུ་འཆར་བར་ཤོག །
བརྩེ་ཆེན་སྙིང་རྗེས་དྲངས་བའི་བྱང་སེམས་ལ།།
རྟག་ཏུ་གོམས་པའི་རྒྱལ་སྲས་སྤྱོད་མཆོག་གིས།།
རླབས་ཆེན་ཚོགས་གཉིས་སྤྱོད་པ་མཐའ་ཕྱིན་ཏེ།།
དཔག་ཡས་དགེ་བའི་རྩ་བ་ཡོངས་བསྐྱེད་ཤོག།
རང་དང་གཞན་གྱིས་དུས་གསུམ་བསཊ་པ་ཡི།།
རྣམ་དཀར་བསོད་ནམས་ཕུང་པོ་ཇི་སྙེད་པ།།
དམིཊ་བྲལ་འཁོར་གསུམ་དག་པས་བྱང་ཆུབ་ཆེར།།
ཡོངས་སུ་བསྔོ་བས་སྲིད་པ་མཐར་བྱེད་ཤོག །
ཁྱེད་ལ་ཡང་ཡང་གསོལ་བ་བཏབ་པ་དང་།།
མངོན་རྟོགས་ཡིད་ལ་གོམས་པའི་ཏིང་འཛིན་མཐུས།།
ངེས་དོན་འོད་དཔག་མེད་པའི་ཞལ་མཐོང་ནས།།
བདེ་ཆེན་ཞིང་ཁམས་རྟག་ཏུ་འཛིན་པར་ཤོག །

ཁྱོད་ཀྱིས་མཐོང་མ་མྱོང་བའི་ཕྱོགས་དེ་གར་ནག་ནོག་པོའི་སྣང་བ་ཡོད་ངེས།
དེ་ནི་ད་ཟོད་འབྲས་བུ་ལ་རྡོག་གུ་སྨན་པ་ག་ལ་ཡིན།
ཆུ་ཕྲན་དང་ཆུ་ཕྲན་རྒྱུད་ནས་ཡོང་བའི་མཚོ་མོ་ཇི་བཞིན་གཅིག་ནས་གཅིག་འབྲེལ་པའི་གོམས་པ་ཞིག་ལ།
རེད་དེ། སྣང་བ་དེ་གཞི་ནས་ཁྱོད་ཀྱི་མིག་མདུན་དུ་གསལ་བས་ན།
ཁྱོད་ལ་ཡིད་ཕམས་པའི་ཚོར་བ་ཞིག་བྱུང་། ཚོར་བ་དེས་རྐྱེན་ཁྱོད་ཀྱི་ཤེས་རྒྱུད་ལ་ཕ་རོལ་བོའི་རྣམ་པ་ཅི་ཡང་མ་སྣང་ན་བསམ་པའི་སེམས་ཆོད་པོ་ཞིག་ཀྱང་འབྱུང་བའོ།།

སྟོན་ལྗོངས།

སྨན་ལྗོན།
སྟོན་དུས་འདིར།
མེ་ཏོག་ཕལ་ཆེར་གྱི་ལོ་འདབ་ཐོར་ཚར་ཅིང་།
སྤང་ཐང་ཡང་སེར་པོར་གྱུར་ཚར།
ད་ནི་ལྗོན་པ་དང་ཤིང་སྡོང་སྣ་ཚོགས་ཀྱིས།
གྲང་ངར་འདྲེས་པའི་བསེར་བུའི་རེག་བྱ་ཕྲ་མོ་ཙམ་ཡང་བཟོད་མི་ཐུབ་པར།
ཡལ་གའི་ལོ་ཕྲན་དག་ནི་ཁ་བ་བཞིན་ས་ལ་ཟགས་ཤིང་།
མི་ཚོགས་ཀྱི་རྐང་འོག་ཏུ་ཧྲིག་ཧྲིག་གིས་བཅོམ།
ལ་ལ་རླུང་གིས་སྤུར་ཅིང་།
ལ་ལ་སྙིགས་སྒམ་ནང་དུ་བཅུག།
སྐྱ་ཐེར་ཐེར་དུ་སོང་བའི་ཡུལ་ལྗོངས་འདིར།
གྲང་ངར་རྒོད་པའི་དགུན་གཞུང་ཞིག་དང་།
ཁ་བ་དང་ཙག་བསེར།
རྣ་ལ་གཟན་པའི་རི་སྤྱང་དང་ཁྱི་ཚོགས་ཀྱི་ཟུག་སྐད་ལ་ཉན་བཞིན།
ཁ་འཁོབ་ལག་འཁོབ་ཀྱི་འཚོ་བ་ལ་བསྐྱར་ཟློས་ག་ཚོད་ཅིག་བྱས་ཡོད་ཨང་།
ད་དུང་ག་ཚོད་ཅིག་བྱེད་དགོས་ཨང།
སོ་ཟད་པའི་སྟོན་ལྗོངས་འདི་ཡང་།
དབྱར་གྱི་ལང་ཚོ་ཉམས་པའི་རྣམ་སྨིན་ཞིག་མ་རེད་དམ།
དབྱར་དུས་ཤ་ལ་དགའ་བ་ཚོས་རི་མགོ་གང་སར་ཤ་བསྲེགས།
སྔོ་ཚོད་ལ་དགའ་བ་དག་གིས་གླིང་ཁ་དག་ནས་ཚོད་མ་བརྔོས།
ཆུ་ལ་མོས་པ་རྣམས་ཀྱིས་ཆུ་ཆེན་ཆུ་ཆུང་ལ་ཞུགས།
ཤིང་ལོ་ཐོར་ཅིང་ཁ་བ་བབས་ཚེ།
མི་བཟོད་ཀྱང་འདར་སིག་སིག་ཏུ་ལུས།

༢༠༢༢\༩\༢༩ཉིན།