འཇམ༵་དཔལ༵་དབྱངས་དངོས་བློ་བཟང་རྒྱལ་བའི་བསྟན།།
འཛིན་ལ་ལུང་རིགས་སྨྲ་བའི་མཆོག་གྱུར་བ།།
ཟླ་བྲལ་བློ༵་གསལ་བྱེ་བའི་མིག་འབྱེད་མཁན།།
ཤེས༵་རབ་འོད་བརྒྱ་འབྱེད་ལ་གསོལ་བ་འདེབས།།

བྱང་ཆུབ་ཐུགས་ཀྱིས་འགྲོ་ཀུན་བུ་བཞིན་གཟིགས།།ལྷག་པའི་ལྷ་ཡིས་རྗེས་བཟུང་བྱིན་གྱིས་བརླབས།།སྙིགས་དུས་འགྲོ་བ་འདྲེན་པའི་བཤེས་གཉེན་མཆོག །ནམ་མཁའ་རྒྱལ་མཚན་ཞབས་ལ་གསོལ་བ་འདེབས།།

བླ་མས་བསམ་པ་ནི་སློབ་མའི་ཉམས་ལེན་ཡིན། དགེ་བཤེས་སྟོན་པར་རང་དང་འདྲ་བའི་སློབ་མ་གསུམ་ཡོད་ལ་སྐུ་མཆེད་གསུམ་ཞེས་འབོད།

སྐུ་མཆེད་གསུམ་ནི་རྒྱ་ཆེན་སྤྱོད་པའི་བཀའ་བབས་པོ་ཏོ་བ་རིན་ཆེན་གསལ། ཉམས་ལེན་བྱིན་རླབས་ཀྱི་བཀའ་བབས་ཕུ་ཆུང་བ་གཞོན་ནུ་རྒྱལ་མཚན། ཟབ་མོ་ལྟ་བུའི་བཀའ་བབས་སྤྱན་སྔ་བ་ཚུལ་ཁྲིམས་འབར་ཏེ། འདི་གསུམ་ལ་སློབ་མའི་གཙོ་བོར་གྱུར་པ་གསུམ་སྟེ། ཁོང་གསུམ་ལ་བཀའ་གདམས་པའི་སྐུ་མཆེད་རྣམ་གསུམ་ཡང་ཟེར།

ཉིན་ཞིག་དགེ་བཤེས་སྟོན་པའི་དྲུང་དུ་བཙུན་པ་ཞིག་མཇལ་དུ་བྱོན། དགེ་བཤེས་སྟོན་པས་བཙུན་པ་དེ་སྐུ་མཆེད་གསུམ་དང་ཁམས་ལུང་བའི་སློབ་མ་ཡིན་པ་མཁྱེན་པ་དང་། རང་རྐྱ་ཐུབ་པའི་སློབ་མ་དེ་དག་ཐུགས་ལ་ཤར།

བླ་མ་ཞིག་ཡིན་ན་ཁོང་གི་ཐུགས་གཏད་ས་སློབ་མ་ཡིན་ཞིང་། སློབ་མས་འཁྱོངས་ན་བླ་མའི་ཐུགས་འདུན་གྲུབ་པ་ཡིན། དེ་བས་ཁོང་གིས་སློབ་མ་འདི་དག་གི་གནས་ཚུལ་དྲིས།

སྟོན་པས་ཐོག་མར་པོ་ཏོ་བ་ཁོང་གིས་ཅི་མཛད་ཀྱིན་གདའ་ཞེས་དྲིས། པོ་ཏོ་བའི་མཚན་ལ་རིན་ཆེན་གསལ་ཟེར་ཞིང་། འཕན་ཡུལ་སྤྲས་ཀྱི་བའོ་ཐང་དུ་མེ་མོ་ཡོས་ཀྱི་ལོ་ལ་སྐུ་འཁྲུངས། ཡེར་བའི་རྔོག་བྱང་ཆུབ་འབྱུང་གནས་ལས་རབ་ཏུ་བྱུང་། དགུང་ལོ་བདུན་ཅུ་རྩ་དགུ་བར་གཤེགས། སློབ་མ་ཀ་ཆེན་བརྒྱད་ཡོད།

དགེ་བཤེས་མཚན་ཉིད་དང་ལྡན་པ་དང་མི་འབྲལ་བར་བསྟེན་དགོས་པར་དགོངས་ནས་དགེ་བཤེས་སྟོན་པ་ལོ་བདུན་བསྟེན་པ་ལ། དགེ་བཤེས་སྟོན་པའི་ཐུགས་ཀྱང་ཁེངས་པས། བའོ་ཐང་འདིར་ཇི་ལྟ་བུའི་མི་ཆེན་ཞིག་འབྱོན་པར་འདུག་གསུངས་པར་གདའ།

དགུང་ལོ་དྲུག་ཅུ་རྩ་གཅིག་པ་ལ་སྤྲས་ཀྱི་པོ་ཏོ་དགོན་པ་ན་བཞུགས། ཕྱིས་སུ་གྲྭ་བ་ཆིག་སྟོང་སུམ་བརྒྱ་ཙམ་བཞུགས་པར་འཆད་ཉན་བསྐྱངས།

བཙུན་པ་དེས། ཁོང་གིས་དགེ་འདུན་བརྒྱ་ཕྲག་མང་བོ་ལ་ཆོས་གསུང་གིན་གདའ་ཞུས་པས། ངོ་མཚར་ཆེ། དེ་ཡང་གཅིག་ཡིན་གསུངས།

དེ་ནས་དགེ་བཤེས་ཕུ་ཆུང་བ་ཁོང་ཅི་མཛད་ཀྱིན་གདའ་ཞེས་དྲིས།

ཕུ་ཆུང་བ་གཞོན་ནུ་རྒྱལ་མཚན་ཏེ། ལུག་གི་ལོར་ཡུང་བའི་ཕུའི་དགོན་པར་འཁྲུངས། དགེ་བཤེས་སྟོན་པ་ལོ་བདུན་ལ་བསྟེན། དགུང་ལོ་བདུན་ཅུ་རྩ་དྲུག་པ་ཁྱི་ལོའི་རྒྱལ་གྱི་ཟླ་བར་སྐུ་གཤེགས།

ཁོང་སྐྱེས་ཀྱང་ནགས་སུ་སྐྱེས། དེངས་ཀྱང་ནགས་སུ་དེངས་པ་ལྟ་བུ་ཞིག་ཡིན་ཏེ། ཤ་གཟུག་རང་ཟ་གསུངས་ནས་སྒྲུབ་པ་འབའ་ཞིག་སྐུ་ཉམས་སུ་བཞེས། པོ་ཏོ་བ་ཆེན་པོས་ནི་བཤད་རྒྱུད་ཀྱི་གདམས་ངག་གིས་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་དེ། བསྟན་པ་ལ་ཁོང་ཁོ་ན་བཀའ་དྲིན་ཆེ། ཞེས་གསུངས། ཕུ་ཆུང་བ་རང་ལ་ཡོ་བྱད་ཅི་ཡོད་ཀྱིས་དཀོན་ཅོག་མཆོད་པ་ལ་ཕྱག་ལེན་མཛད། སྤྱན་སྔ་སྐུ་གསུང་ཐུགས་ཀྱི་རྟེན་བཞེང་བ་ཕྱག་ལེན་མཛད།

བཙུན་པས་དེས། རང་གཞན་གྱི་ཡོ་བྱད་མང་བོས་རྟེན་གསུམ་འབའ་ཞིག་བཞེངས་ཤིང་གདའ་ཞུས་པས་སྔར་བཞིན་ངོ་མཚར་ཆེ། དེ་ཡང་གཅིག་ཡིན་གསུངས།

དགོན་པ་བ་ཁོང་ཅི་མཛད་ཀྱིན་གདའ་གསུངས་པས། ཁོང་སྒོམ་འབའ་ཞིག་མཛད་ཀྱིན་གདའ་ཞུས་པས། སྔར་བཞིན་ངོ་མཚར་ཆེ། དེ་ཡང་གཅིག་ཡིན་གསུངས།

ཁམས་པ་ལུང་བ་ཁོང་ཅི་མཛད་ཀྱིན་གདའ་ཞེས་དྲིས། ཁམས་པ་ལུང་བ་ཆེན་པོ་ནི། འཕན་ཡུལ་ཡུང་བར་ཤིང་མོ་གླང་ལ་འཁྲུངས་ཤིང་དགེ་བསྙེན་ཡིན། མཚན་ཤཱཀྱ་ཡོན་ཏན། གཞོན་པའི་དུས་སྡེ་སྣོད་ལ་ཡང་སྦྱངས་པ་མཛད་དེ། སྙེ་ཐང་དུ་ཇོ་བོ་ཉིད་དང་མཇལ་ཞིང་ཕྱིས་རྭ་སྒྲེང་དུ་དགེ་བཤེས་སྟོན་པ་ཡུན་རིང་དུ་བསྟེན་ཅིང་སྐུ་མཆེད་གསུམ་མམ་བཞི་ཞེས་གྲགས་སྐད།

ཤིང་མོ་ལུག་གི་བར་དགུ་བཅུ་རྩ་གཅིག་པ་རྟའི་ཟླ་བའི་ཚེས་བཅུ་བཞི་ལ་ཁམས་ལུང་དུ་སྐུ་གཤེགས། བྱང་ཆུབ་ཀྱི་ཐུགས་འབྱོངས་པས་ཞལ་མཐོང་བ་ཐམས་ཅད་དད་པར་གྱུར། མདོར་ན་མཐོང་ཐོས་དྲན་རེག་དོན་ལྡན་དུ་འགྱུར་ངེས་པའི་སྐྱེས་བུ་ཆེན་པོར་གྲགས་སོ། །

བཙུན་པ་དེས། ཁོང་པ་གྲོག་ཁ་རེར་བཞུགས། དབུ་བཏུམས་ཏེ་བཤུམ་པ་འབའ་ཞིག་མཛད་ཅིང་གདའ་ཞུས་པས། སྟོན་པས་དབུ་ཞྭ་ཕུད། ཐུགས་ཀར་ཐལ་མོ་སྦྱར། སྤྱན་ཆབ་མང་བོ་ཕྱུང་ནས་ཤིན་ཏུ་ངོ་མཚར་ཆེ། ཆོས་བྱ་བ་ཁོང་གིས་བྱས་པ་ཡིན་གསུངས།

འདིའི་ཡོན་ཏན་མང་བོ་བཤད་རྒྱུ་ཡོད་དེ། ད་ལྟ་བཤད་ན་ཁོང་མི་མཉེས་པར་འདུག་གསུངས། ཁམས་པ་ལུང་བ་ཁོང་དབུ་བཏུམས་ནས་བཤུམ་པ་འབའ་ཞིག་མཛད་པའི་ཚེ། འཁོར་བ་ན་སྡུག་བསྔལ་གྱིས་མནར་བའི་སེམས་ཅན་རྣམས་ལ་དགོངས་ནས་སྙིང་རྗེ་ཁོ་ན་བསྒོམས་ཏེ་བཤུམ་པ་ཡིན།

དེ་བཞིན་དུ་བྱམས་པ་དང་སྙིང་རྗེ་གཉིས་པོ་འདི་གལ་ཆེ་བའི་རྒྱུ་མཚན་མང་བོ་སྤྱན་སྔ་བས་གསུངས་པའི་ཚེ། གླང་ཐང་པས་ཕྱག་མཛད་དེ། བདག་དུས་འདི་ནས་བཟུང་སྟེ་བྱམས་སྙིང་རྗེ་འབའ་ཞིག་བསྒོམ་པར་ཞུ་ཞུས་པས། དགེ་བའི་བཤེས་གཉེན་པས་དབུ་ཞྭ་ཕུད། ཤིན་ཏུ་བཟང་ལགས་ཞེས་ལན་གསུམ་གསུངས།https://weibo.com/u/7342583952