༄༅།།དེ་རིང་ལྕགས་ཟམ་རྫོང་དུ་ཕྱིན་ནས་གྲུབ་ཐོབ་ལྕགས་ཟམ་མཇལ་ཞིང་། དེ་ནས་སི་ཁྲོན་མི་རིགས་སློབ་གླིང་དུ་ཕྱིན་ཏེ། ལྷག་བསམ་དང་མཁས་མཛངས་ལྡན་པའི་རྒྱལ་མོ་འབྲུག་པའི་འཆད་ཁྲིད་ལ་མཉན་པས། ང་རང་ནི་སྐད་ཅིག་ཉིད་ལ་མི་ལོ་དུ་མའི་སྔོན་གྱི་མེས་པོ་གོང་མ་དག་འཚོ་བའི་ལྡོང་མི་ཉག་དང་། ཞང་ཞུང་། འ་ཞ། བྲུ་ཤ། འཇང་། ལྡོང་བེ་རི་སོགས་ལ་འཁྱུག་ཙམ་ཉུལ་བའི་སྐལ་བ་ལྡན།
སློབ་དཔོན་ཆེན་མོ་རྒྱལ་མོ་འབྲུག་པ་ལགས་ལ་སྐུ་ཚེ་རིང་ཞུ། སི་ཁྲོན་མི་རིགས་སློབ་གླིང་གི་བོད་ཡིག་དགེ་རྒན་རྣམ་པ་དང་། ལྷག་ཏུ། ཞིང་ཆེན་བོད་ཡིག་སློབ་གྲྭར་དམིགས་བསལ་དུ་ཡིད་ཆེས་དང་གཟིགས་སྐྱོང་གནང་མཁན་རྣམ་པར་ཐུགས་རྗེ་ཆེ་ཞུ།

བཙོན་ཁང་གུ་ཡངས་དང་བཙོན་པ་དྲང་བདེན།
མཁས་དབང་དགེ་འདུན་ཆོས་འཕེལ་གྱིས། རང་རེ་བོད་འདི་ཆོས་ལྡན་གྱི་ཞིང་ཁམས་རང་རེད། ཞོལ་བཙོན་ཁང་ན་ཡོད་པའི་བཙོན་པ་དེ་ཚོར་རང་དབང་ཧ་ཅང་འདུག་ནང་དུ་གང་བྱས་བྱས་རེད། དགོད་བྲོ་བ་ཞིག་ལ། ཞོལ་བཙོན་ཁང་དེར། ཚེ་བཙོན་ཡིན་ཟེར་བའི་མི་རྒན་ཞིག་འདུག བཙོན་ཁང་དེ་རུ་བསྡད་ནས་ལོ་མང་པོ་སོང་བས་བཙོན་སྲུང་དང་གྲོགས་པོ་འདྲ་བོ་ཆགས་འདུག ཁོ་ནི་ལོ་རེ་བཞིན་ཟླ་བ་གཅིག་གཉིས་རེར་འཕན་པོ་ལ་གཉེན་ཉེ་དང་འཕྲད་དུ་འགྲོ་བ་ངས་ཀྱང་མཐོང་སོང་། འགྲོ་ཉིན་བཙོན་སྲུང་པས་ཁོ་ལ། རྒན་ལགས། རྒྱུན་རིང་བཞུགས་དྲགས་ན་སྐུ་ངོ་ཚོས་མཁྱེན་འོང་བས་དུས་ཚོད་ཏག་ཏག་ལ་ལོག་ཤོག་ཟེར། ཁོ་རང་དུས་ཚོད་ལ་ཐོན་སྐབས་ཕྱིར་བཙོན་ཁང་དུ་རང་ཁྱིམ་ལ་ལོག་པ་བཞིན་ཐོན་ཡོང་།

འདི་འདྲའི་བཙོན་ཁང་ཞིག་བོད་མ་གཏོགས་གང་ན་ཡང་ཡོད་པ་མ་རེད། ཁོས་སྔ་མོ་ཉེས་པ་ཆེན་པོ་ཞིག་བྱས་ཡོད་ཚོད་འདུག་ཀྱང་། ད་སྐབས་ཁ་ཏོན་ཁོ་ན་བྱེད་མཁན་གྱི་མི་ཉམ་ཆུང་ཞིག་རེད། ང་རང་བཙོན་ནས་མ་ཐར་སྔོན་ཙམ་ལ་ཁོ་གྲོགས་སོང་། ཞོགས་པ་ཞིག་ལ་བཙོན་པ་འགའ་དང་། བཙོན་སྲུང་ཁ་ཤས་བྲེལ་ཟིང་ཟིང་བྱེད་ཀྱིན་འདུག་པས། སྐད་ཆ་དྲིས་པར། བཙོན་པ་རྒད་པོ་དེ་གྲོགས་འདུག་ཟེར། ལྟ་བར་ཕྱིན་པས། ཁོ་ནི་ཞབས་སྐྱིལ་ཀྲུང་དང་། ལག་པ་ས་གནོད་དང་མཉམ་གཞག་བྱས་ཏེ་སྐུ་ཀྲོང་ངེར་ཐུགས་དམ་ལ་བཞུགས་འདུག ང་ནི་ཧ་ལས་ཤིང་། དགོས་དུས་སུ་མི་བསླུ་བའི་སྐྱབས་གནས་དཀོན་མཆོག་གསུམ་ལ་ཡིད་ཆེས་ཇེ་ཆེར་སོང་། ལྟད་མོ་འདི་ནི་ང་ཚོ་ཚང་མས་མངོན་སུམ་དུ་མཐོང་བ་ཡིན་ཞེས་གསུངས།

ཇི་སྐད་དུ་མདོ་ལས།

ནམ་མཁའ་ས་གཞིར་འགྱུར་བའམ། །
ས་གཞི་ནམ་མཁར་འགྱུར་ཡང་སྲིད། །
དེ་བཞིན་གཤེགས་པས་གསུངས་པ་ལ། །
གཞན་དུ་འགྱུར་བ་མ་མཆིས་སོ། །
རི་རབ་གནས་ནས་འཕོ་བའམ། །
ཉི་ཟླ་ཐང་ལ་ལྷུང་ཡང་སྲིད། །
དེ་བཞིན་གཤེགས་པས་གསུངས་པ་ལ། །
གཞན་དུ་འགྱུར་བ་མ་མཆིས་སོ། །