མི་ཞིག་གི་མི་ཚེར་རིན་ཐང་ཡོད་མེད་དེ། སྐད་ཆ་དང་ཡི་གེས་ཇི་ལྟ་བ་བཞིན་མཚོན་ནུས་པ་ཞིག་མ་ཡིན་པར་འཇོན་ནུས་དང་གྲུབ་འབྲས་ཀྱིས་ཨ་ལན་སྟེར་དགོས་པར་བརྗོད། རང་གི་མི་ཚེར་རིན་ཐང་ཡོད་མེད་ཀྱི་དྲི་བ་དེ་ཡང་གཞན་གྱིས་ཚུར་ལ་འདྲི་དགོས་པ་ཞིག་མ་ཡིན་པར་རང་ངོས་ནས་ཕར་གཞན་ལ་འདྲི་དགོས་པ་ཞིག་ཡིན་པར་སྨྲ། རྒྱུ་མཚན་ཁྱེད་ལ་རིན་ཐང་ཡོད་ན། གྲུབ་འབྲས་དང་ལག་ལེན་གྱིས་ཁ་གྲག་ཡོང་ལ། ཁྱེད་རང་གི་འཚོ་བའི་ཟུར་ངོས་རེ་རེས་ཀྱང་ར་སྤྲོད་ཡང་དག་པར་བྱ་ངེས་པས། ཁྱེད་ལ་རིན་ཐང་ཡོད་མེད་དེ། རང་ངོ་ལས་ཀྱང་གཞན་ངོ་ལ་གསལ་ཐག་ཆོད་པོ་ཡིན་པས་རེད། ཡང་མི་ཚེའི་རིན་ཐང་ནི། ལོ་འགའ་ཤོས་ཀྱིས་ཐག་བཅོད་བྱ་ནུས་པ་ཞིག་མ་ཡིན་པར་ཚེ་གང་གི་དུས་ཡུན་སྤྱད་དེ། ཚེ་མཇུག་ལ་སླེབས་པ་ན། ད་གཟོད་གཞི་ནས་དྲིས་ལན་ཆ་ཚང་བ་ཞིག་རྙེད་ཡོང་བར་སྐད། མི་ཚེའི་རིན་ཐང་ནི། ལག་ལེན་དང་གྲུབ་འབྲས་ཁོ་ནས་ར་སྤྲོད་དགོས་པ་ཞིག་ཡིན་པ་དེ་ལྟར་ན། ད་ལྟའི་རང་ལ་རིན་ཐང་ག་འདྲ་ཡོད་མེད་དེ་ཡང་ད་ལྟའི་གྲུབ་འབྲས་ཀྱིས་གསལ་བོར་བྱས་བཞག་ཡོད་པ་དང་། མ་འོངས་པར་རིན་ཐང་འབྱུང་མིན་ཡང་མ་འོངས་པའི་འབད་བརྩོན་དང་ལག་ལེན་ཁོ་ནར་ཐུག་འདུག་པས། ཁོ་བོ་ལྟ་བུ་ལག་ལེན་གྱི་ནུས་ཆོད་ཅི་ཡང་མེད་པར་མི་ཚེའི་རིན་ཐང་ཆེན་པོ་ཞིག་མངོན་གྱུར་འབྱུང་བར་རེ་ཞིང་སྨོན་མཁན་དག་ནི། དོན་ལ་མགོ་མ་གཡུགས་པར་ལྷ་འབབ་པར་འདོད་པའི་སྟོང་བསམ་རང་ལུགས་པ་འབའ་ཞིག་ཏུ་སོང་འདུག་པ་ཡང་གསལ་བོ་རེད། སྤྱིར་མི་ཚེར་སྙིང་བོ་མེད་ཀྱང་། སྙིང་བོ་མེད་པའི་མི་ཚེར་སྙིང་བོ་བླངས་ཆོག་པའི་བཤད་ཚུལ་ཞིག་ཡོད་པ་དེས་ཀྱང་། ལག་ལེན་དང་འབད་བརྩོན་གྱིས་ནི། ཆེས་ངོ་མཚར་ལྡན་པའི་དོན་སྙིང་བསྐྲུན་ཆོག་པའི་བདེན་པ་དེ་ཡང་མངོན་གསལ་གྱིས་བསྟན་འདུག་པ་འདྲའོ།།

ལྷ་སྐུ་ལྷ་ཁང་མཆོད་རྟེན་ལྡེབས་རིས་བྲག་བརྐོས་སོགས།།
བྱེ་བྲག་འབྲི་ལུགས་བཞེངས་ལུགས་བཀོད་པའི་མགོ་ཁུངས་ཉིད།།
ཁ་སྨིར་བལ་བོ་རྒྱ་གར་རྒྱ་ནག་བྷང་ག་ལ།།
ལ་སོགས་ཁྱིམ་མཚེས་ཡུལ་ནས་བོད་དུ་ཐོན་པ་མང་།།

࿐ སྤྱིར་བཏང་ཨ་ལ་ལ།

འཆད་ལ་སྨྲ་ལྕེ་ཅུང་ཙམ་མཉེན་པ་ས་མཐའི་གངས་རིའི་བོད་ཕྲུག་ལགས།།
འདྲེན་བྱེད་ཟལ་མའི་མེ་ཏོག་ནག་པོ་བཀའ་གཏེར་རྒྱ་མཚོ་ཆེན་པོར་བསྐྱལ།།
རྟོག་དཔྱོད་ཡིད་ཀྱི་ཤོག་སྐྱ་ལེབ་མོ་དུས་གསུམ་དུས་ཀྱི་མཁའ་ནས་བསྐྱོད།།
ངལ་བས་སུག་རྗེས་ཤོག་ལྷེ་འཐུག་པོ་ལོ་འདིའི་སྒང་ནས་གློ་བུར་སླེབས།།
ཁ་མཐུད་ནང་གི་ཡིག་འབྲུ་ཕལ་བར་མྱིད་ཀྱང་མུད་པར་མ་ཐར་ཐལ།།

མགོ་ནས་མཇུག་ཏུ་ཨ་ཐོ་བཀླགས།།
ནང་ནས་ཁ་ཁེར་ཞིབ་ཏུ་བལྟས།།
མཐུད་མཚམས་ཤིག་ནས་མྱི་འགའ་ཐུག།
ས་ཚིགས་དེ་ནས་སྣང་བ་ཆད།།
ཀློག་སྙིང་མ་སྤྲོ་དེ་རུ་ལུས།།

ཡེ་ལོ་ཉེར་པའི་ཟླ་ཚེས་ལ་ཁྲི་ལྗང་མྱུག་གིས།