ཞི་བདེའི་གཟེངས་རྟགས་བཞེས་མྱོང་མཁན་ནེལ་སོན་མན་ཌེ་ལ་མཆོག་ལྷོ་ཨ་ཧྥི་རི་ཀའི་སྲིད་འཛིན་ཐོབ་རྗེས། ཐེངས་ཤིག་སྐུ་སྲུང་བ་ཚོ་དང་ལྷན་དུ་ཟ་ཁང་ཞིག་ལ་གུང་ཚིགས་བཞེས་ཀ་ཕེབས། ཁོ་ཚོས་ཟས་ཁང་དུ་སོ་སོ་དགའ་བའི་ཟ་མ་རྣམས་མངགས་རྗེས་ཟ་མ་ཡོང་རྒྱུར་བསྒུགས་ནས་བསྡད། ཁོ་ཚོ་དང་ཅུང་ཁ་ཐག་མི་རིང་བའི་ས་ན་སྐུ་མགྲོན་གཞན་ཞིག་གིས་ཀྱང་ཟ་མ་བསྒུགས་ནས་བསྡད་ཡོད། ནེལ་སོན་མཆོག་གིས་ཁོ་མཐོང་བ་དང་སྐུ་སྲུང་བ་ཞིག་མངགས་ནས་མི་དེ་ཚུར་བོས་ནས་ཁོ་རང་དང་མཉམ་དུ་མདུན་ཅོག་གཅིག་གི་སྟེང་དུ་ཟ་མ་མཉམ་ཟ་བྱེད་དུ་བཅུག མི་དེས་ཟ་མ་གང་མགྱོགས་མགྱོགས་ཟོས་ཤིང་། ཟོས་ཚར་རྗེས་མགོ་བོ་ཞིག་བསྒུར་ནས་སྒོ་ལ་ཐོན་ནས་བུད་སོང་ཡོད།
དེ་ནས་སྐུ་སྲུང་དཔོན་པོས་སྨྲས་པ། མི་དེ་ཕལ་ཆེར་གཟུགས་པོ་བདེ་བོ་རང་ཡོད་ས་མ་རེད། ཁོས་ཟ་མ་ཟ་སྐབས་ལག་པ་འདར་བཞིན་འདུག་ཅེས་བཤད། ནེལ་སོན་གྱིས་གསུངས་པ། ཁོ་གཟུགས་པོ་བདེ་བོ་མེད་པ་ཡིན་གྱི་མ་རེད། སྔར་ང་བཙོན་ཁང་ལ་ཡོད་དུས་ཁོ་བཙོན་སྲུང་བ་རེད། ཁོས་ང་ལ་མནར་གཅོད་ཚད་མེད་པ་བཏང་མྱོང་བ་རེད། ཐེངས་ཤིག་ཁོས་ང་ལ་མནར་གཅོད་ཚད་ལས་འདས་པ་བཏང་ནས་ངའི་ལུས་ཀྱི་ཟུང་ཤུགས་ཡོངས་སུ་ཟད་དེ་འགུལ་སྐྱོད་མི་ཐུབ་པར་ལུས་ཡོད་སྐབས། ངས་ཁོ་ལ་ཆུ་ཞིག་སྟེར་རོགས་ལབ་པ་ཡིན། ཁོས་ཐད་ཀར་ངའི་ཁ་ནང་ལ་གཅིན་པ་བཏང་སོང་།
ད་ལྟ་ང་སྲིད་འཛིན་ཆགས་ཚར་བས། ཁོས་ཕལ་ཆེར་ཁོ་རང་གིས་སྔར་ང་ལ་མནར་གཅོད་བཏང་བ་ནང་བཞིན་ངས་ཀྱང་ཁོ་ལ་འཁོན་ལན་སློག་ཡོང་གི་རེད་བསམ་ནས་ཞེེད་ཡིན་གྱི་རེད་སྙམ། ཡིན་ཡང་ང་ལ་འཁོན་ལན་སློག་འདོད་ཀྱི་བསམ་བློ་ཞིག་ཡེ་ནས་མེད་ལ། དེ་ནི་ངའི་གཤིས་ཀ་དང་མ་རེད། སུ་ལ་འཁོན་ལན་སློག་འདོད་ཀྱི་བསམ་བློ་དེ་ཡོད་ན། དེས་རང་རྒྱུད་ཀྱི་གཞན་ཕན་དང་སྙིང་རྗེ་ཡི་སེམས་གཤིས་བཟང་པོ་དེ་གཏོར་ཅིང་བརླག་པར་བྱེད་ལ། སུའི་རྒྱུད་ལ་བཟོད་པ་དང་གུ་ཡངས་ཀྱི་བསམ་བློ་ཡོད་ན། དེས་རང་རྒྱུད་ཀྱི་གཞན་ཕན་དང་སྙིང་རྗེ་རྣམས་འཕེལ་ཞིང་རྒྱས་པར་བྱེད། ཅེས་གསུངས་སོ།

གསར་གཏོད་ཀྱི་ནུས་པ་ཇི་ལྟར་གསོ་སྐྱོང་བྱ་དགོས།
ཚན་པ་དང་པོ།
གནའ་ནས་ད་བར་དུ་ཆེས་རླབས་ཆེ་ཞིང་གཟི་བརྗིད་ཆེ་བའི་མི་ནི། གསར་བཏོད་པ་ཞེས་པའི་མི་དེའི་རིགས་ཡིན་པ་ཀུན་ལ་མཐུན་སྣང་དུ་གྲུབ་ཡོད་ལ། ཆེས་སྒྲུབ་དཀའ་བ་དང་དཀའ་སྡུག་ཆེ་བ་ཡང་གསར་གཏོད་ཀྱི་ལས་སུ་བསྐྱོད་རྒྱུ་དེ་ཡིན་པ་བཤད་ཅི་དགོས། གསར་གཏོད་པ་རེ་རེས་ནི། མིའི་རིགས་ལ་སྔར་མེད་ཀྱི་ཁ་ཕྱོགས་དང་འཕོ་འགྱུར་སྣ་ཚོགས་ཤིག་བསྩལ་ནས་ཡོང་བའི་བཀའ་དྲིན་གྱིས་འཇིག་རྟེན་འདིར་སྔོན་མེད་པའི་གཟི་མངས་རྒྱས་ཡོད་ལ། རེ་བའི་ཉི་ཟེར་འཕྲོས་ཡོད། ངོ་མཚར་བའི་ཤེས་རིག་སྣ་མང་ཡང་དར་ཐུབ་ཡོད། དེང་གི་དུས་འདིར་འཚོ་བའི་ལོངས་སྤྱོད་དང་ཆབ་དཔལ་རིག་ཐམས་ཅད་དར་ནས་རྩེར་སོན་ཡོད་པ་ཡང་དོན་ལ་གསར་གཏོད་པ་སྐུ་དྲིན་ཅན་ཚོའི་མཛད་རྗེས་ཉག་གཅིག་མ་ཡིན་ནམ། གསར་གཏོད་ཀྱི་ལས་དེ་དེ་འདྲའི་རླབས་ཆེ་ཞིང་རིན་ཐང་ལྡན་པ་ཞིག་ཡིན་སྟབས་བྱ་བཞག་དེ་ལ་འཇུག་པར་དེའི་ཚོད་ཀྱིས་དཀའ་བ་བརྒྱ་ཕྲག་དང་དུ་ལེན་ཐུབ་དགོས་པ་དང་། རྣམ་དཔྱོད་དང་འཇོན་ནུས་ཕུན་སུམ་ཚོགས་པ་འཛོམས་དགོས་ཡོད་པས། དོན་དངོས་སུ་ལས་དེར་འབད་པ་ལྷོད་མེད་ཀྱིས་འཇུག་ཐུབ་མཁན་ཡང་། ཉུང་ཤོས་ལས་ཀྱང་ཆེས་ཉུང་ཤོས་ཏེ་ཉིན་མོའི་སྐར་མའི་གྲངས་དང་གཉིས་སུ་མེད་པ་ལྟ་བུར་ཆགས་ཡོད་པ་དེ་རེད། དེ་བས་རང་དང་འདྲ་བའི་མི་བུ་ཕལ་མོ་ཆེ་ནི། གསར་གཏོད་པ་ཚོའི་ཐུགས་རྗེ་བཀའ་དྲིན་གྱི་མཐུ་འོག་ནས་བདེ་སྐྱིད་འཚོ་བར་ཅི་དགར་རོལ་ཏེ། ཁོང་རྣམ་པའི་མཛད་རྗེས་ལ་གུས་བཀུར་དང་བཅས་བསྟོད་གླུ་བླངས་ནས་འདུག་པ་ལས། ཤེས་འཇོན་ནུས་གསུམ་གང་གི་ཆ་ནས་ཀྱང་གསར་གཏོད་ཀྱི་ལས་སུ་ཞུགས་རྒྱུའི་སྐལ་བ་ནི། ཤིན་ཏུ་ནས་ཀྱང་ཕྲ་བའོ།།

མུ་འགོད། ་་་་

༄། ། སྒོ་གསུམ་བག་མེད་ཀྱི་སྤྱོད་པ། །

བསྡམས་ནས་དགེ་བཅུ་ལ་སྦྱོར་ན། །

ངན་འགྲོ་འཇིགས་སྐྱོབས་ཀྱི་བླ་མ། །

རང་གི་སེམས་སྟེང་ན་འདུག་གོ །

བཅོས་མིན་ངེས་འབྱུང་ཞིག་སྐྱེས་ནས། །

བསླབ་གསུམ་ཉམས་ལེན་ལ་བརྩོན་ན། །

འཁོར་བར་སྒྲོལ་བྱེད་ཀྱི་བླ་མ། །

རང་གི་སེམས་སྟེང་ན་ཡོད་འདུག །

གཞན་རྣམས་གཅེས་པར་ཞིག་བཟུང་ནས། །

ཐབས་ཤེས་དབྱེར་མེད་ལ་འབད་ན། །

དམན་ལམ་གཅོད་བྱེད་ཀྱི་བླ་མ། །

རང་གི་སེམས་སྟེང་ན་ཡོད་འདུག །

མི་དགེ་བཅུ་སྤོང་གི་ཚུལ་ཁྲིམས། །

བསླབ་གསུམ་རིན་ཆེན་གྱི་ཁང་བཟང་། །

ཐབས་ཤེས་དབྱེར་མེད་ཀྱི་ནོར་བུ། །

བླ་མ་ཡིན་ནམ་དང་མ་ཡིན། །