ད་འབྲོ་མགོ་བརྩམས་བྱུང་། ཀུན་པོ་འབྲོ་རོགས། ངས་ནི་ཁྱེད་ཚོ་བྲོས་ནས་ཐར་བར་སྨོན་ལམ་རྒྱག་གིན་ཡོད། གལ་ཏེ་མ་བྲོས་ཚེ། ལྟོགས་གྲིར་འཆི་དགོས། ཐོག་ཁང་དང་ཐོག་ཁང་བར་གསེབ་ཏུ། ངུ་འབོད་དང་ཀི་འབོད། ལྕགས་སྣོད་བར་མེད་དུ་རྡུང་། ཁྱིམ་ཆས་སོགས་སྒེའུ་ཁུང་ནས་མར་གཡུགས་ཤིང་། ནང་རོལ་ཏུ་ཟས་སྙིགས་ཀྱིས་སྤུངས་གསོག་བརྒྱབས་ཡོད། ལྕུང་མོ་དང་ཁྭ་ཏའི་ཁྱུ་ཚོགས་སྲང་ལམ་ཀུན་ཏུ་ཡར་འཕུར་མར་འཕུར་བྱེད་པས། འཇིགས་རུང་གི་ཚོར་བ་དྲག་ཏུ་སྟེར། འཚོ་གནས་ཀྱི་ཡོང་ཁུངས་རྩ་ནས་ཆད་ཅིང་། བུ་ལོན་གྱི་རི་བོས་མར་ལ་མནན་པའི་སྐབས་སུ། འབྲོ་བ་ལས་ཐབས་བཀོད་ཅི་ཞིག་ཡོད། སྙིང་ཉེ་བའི་མིའི་རིགས་ལགས། མུ་ནས་ཕྲོས་ཤིག སྐྱིད་ཀྱི་ཉི་མ་ཏན་ཏན་འཆར་སྲིད།

རྐང་ཐང་བ།

དེ་རིང་གནམ་གཤིས་ཡག་པོ་འདུག་པས་གཅེན་པོའི་བུ་ལ་རང་མི་རིགས་ཀྱི་ཕ་སྐད་མ་ཡིག་འབྲི་སྟངས་སློབ་བཞིན་ཡོད།

སྤྱིར་ན་རང་ཉིད་ལ་མཚོན་ན་བོད་ཡིག་འབྲི་ཀློག་ཡག་པོ་དེ་ཙམ་མི་ཤེས་མོད།

འོན་ཀྱང་ཆུང་དུས་ནས་ང་རང་བོད་ཡིག་འབྲི་རྒྱུ་སོགས་ལ་ཧ་ཅང་དགའ་པོ་ཡོད་པས།

རྒྱུན་དུ་བོད་ཡིག་སྐོར་ཕྲན་བུ་རེ་ཡོད་ན་ཡང་དེའི་ཕྱོགས་ཀྱི་དག་ཡིག་དང་ཚིག་སྦྱོར་སོགས་ལ་ཡང་ནས་ཡང་དུ་བལྟ་བཞིན་ཡོད།

རྗེས་སུ་རང་མི་རིགས་ལ་ཕན་རྒྱ་ཆེན་པོ་དེ་ཙམ་བསྒྲུབས་མ་ཐུབ་རུང་། མིའི་རིགས་ཀྱི་གཙོ་བོ་འཛིན་པའི་བླ་སྲོག་ཕ་སྐད་མ་ཡིག་དེ་ལ་གནོད་པ་མེད་པ་ཤོག་ཅིག

" མཆོག་གསུམ་རྩ་གསུམ་བདེན་པའི་བྱིན་རླབས་དང་།། ལས་འབྲས་བསླུ་མེད་དྲང་བདེན་གནས་ལུགས་མཐུས།།

ཆོལ་གསུམ་ཞི་བདེའི་དོན་ཉིད་རྣམ་པར་རྒྱལ།། མཐོ་བོད་རྒྱལ་ཁབ་ཆེན་པོ་དར་རྒྱས་ཤོག།"

ལྕང་དཔོན་དབྲ་ཁྱུང་དཔལ་བཟང་།
གངས་དཔལ་གྱིས་བརྩམས།
༡
མཛོད་དགེའི་བྱེ་མའི་ཐང་ལ།།
མཁའ་འགྲོའི་ཡོན་ཆབ་ཕོབས་ཤོག།
གཱང་གའི་བདུད་རྩི་བཞུར་ཤོག།
ལྷ་ཡི་གྲུ་ཆར་དབབ་ཤོག།
ཁ་འབབ་རྣམ་བཞི་འདྲ་བའི།།
སྐྱེ་འགྲོའི་དངོས་གྲུབ་བཞུར་ཤོག།
ལྕང་དཔོན་དབྲ་ཁྱུང་དཔལ་བཟང་།།
སྐུ་ངལ་གསོ་རོགས་གནང་ཤོག།
༢
མཛོད་དགེའི་ན་ཁྱོམ་གཞུང་ལ།།
བྱང་ཆུབ་ལྗོན་པ་འཁྲུངས་ཤོག།
དཔག་བསམ་གསེར་ཤིང་འཁྲུངས་ཤོག།
ཙ་རའི་སྨྱུག་ཤིང་འཁྲུངས་ཤོག།
གཟིམ་ཆུང་གདུང་ལྕམ་ཉན་པའི།།
ཙན་དན་སྡོང་བོ་འཁྲུངས་ཤོག།
མཁའ་འགྲོའི་བསང་ཤུག་ཉན་པའི།།
ལྷ་ཤིང་ཤུག་པ་འཁྲུངས་ཤོག།
༣
རྨ་རྨེ་གཡུ་ལུང་འབྲོག་ལ།།
གཉན་དང་ཤྭ་དམར་འཁོར་ཤོག།
རྦད་པོ་ཐོད་དཀར་འཁོར་ཤོག
མཐིང་གི་རྒྱལ་མོ་འཁོར་ཤོག།
ཅོ་ཆུང་རྣམ་འཇོམས་གླུ་ལེན།།
ཟླ་འཇོལ་ལྔ་བའི་དབྱངས་སྙན།།
དེ་འདྲའི་སྨོན་པའི་ཡུལ་ནས།།
དབྲ་ཁྱུང་སྐུ་ཚེ་རིང་ཤོག།