གཞན་གཅུན་གྱི་རྗེས་སུ་འགྲོ་ལྡོག་བྱེད་པ་ནི་ཀུན་སྤྱོད་ཀྱི་ཆ་ནས་བག་འཁུམས་པ་སྟེ། ཀུན་སྤྱོད་ཐད་བག་འཁུམས་པ་ནི་ཤེས་རྨོངས་རིང་ལུགས་ཁ་དར་བའི་བདག་རྐྱེན་དུ་འདོད། རང་དབང་ཅན་གྱི་རང་གཅུན་ནི་ཀུན་སྤྱོད་ཀྱི་ཆ་ནས་རྟུལ་ཕོད་པ་སྟེ། ཀུན་སྤྱོད་ཐད་རྟུལ་ཕོད་པ་ནི་བློ་འབྱེད་ཁྱབ་བརྡལ་དུ་གཏོང་ཐུབ་པའི་བདག་རྐྱེན་དུ་འདོད་དོ༎

གཞོན་ནུའི་རབ་བྱེད་ལས།

རི་ལུང་ཁ་བས་གཡོགས་པས་ནམ་ཟླ་འཁྱག།
སྡོང་ལོ་རླུང་གིས་སྤུར་བས་དུས་ཚིགས་འགྱུར།།
འཕྱོར་སྒེག་ལང་ཚོ་ཡོལ་བའི་སྟོན་ཟླ་འདིས།།
བདག་གི་ཡིད་ལ་བྲེལ་བ་ཐེངས་གཅིག་སློང་།།

གསར་གཏོད་ཀྱི་ནུས་པ་ཇི་ལྟར་གསོ་སྐྱོང་བྱ་དགོས།
ཚན་པ་གསུམ་པ།
སློབ་གཉེར་བ་ཞིག་ལ་མཚོན་ན་དེ་ལས་ཀྱང་དེ་འདྲའི་གསར་གཏོད་ཀྱི་བསམ་བློ་དང་རང་སྟོབས་རང་སྤེལ་གྱི་འདུ་ཤེས་ཤུགས་དྲག་པོ་ཡོད་དགོས་པ་མ་ཟད། གཞན་ལ་ལད་ཟློས་དང་བསྐྱར་ཟློས་ཀྱི་འདུས་ཤེས་དེ་འགོག་ཅི་ཐུབ་ཀྱིས་སོ་སོའི་ཀླད་པ་དཀྲུག་དཀྲུག་གཏོང་བར་འབད་རྒྱུ་དང་། རང་དང་འཚམ་པའི་སློབ་གཉེར་གྱི་བྱེད་ཐབས་གསར་བ་རེ་འཚོལ་བར་བརྩོན་རྒྱུ་ནི། གྲུབ་འབྲས་གཡུར་དུ་ཟ་བ་ཞིག་ལེན་པའི་གསང་བ་དམ་པ་དེ་ཡིན་པར་བཤད། དེ་ལྟར་སློབ་བཉེར་བྱ་སྐབས་དང་འཚོ་བའི་ཁྲོད་ཀྱི་བྱ་བ་ཆེ་མ་གསུམ་གང་ཞིག་ལ་འཇུག་སྐབས་ཀྱང་སྔར་དང་མ་འདྲ་བའི་བྱེད་ཐབས་གསར་བ་རེ་སྤྱོད་ཐབས་ལ་གོམས་འདྲིས་བཏང་བ་ཡིན་ན། དེའི་ཤུགས་རྐྱེན་གྱིས་མ་འོངས་པར་གསར་གཏོད་མཁན་རླབས་ཆེན་ཞིག་ཏུ་འགྱུར་རྒྱའི་རེ་བ་ཡང་ཤིན་ཏུ་ཆེ་བས། དང་ཐོག་ཆུང་ས་ནས་གསར་གཏོད་ཀྱི་བསམ་བློ་གསོ་སྐྱོང་བྱ་ཤེས་རྒྱུ་ནི། གནད་དུ་ཆེ་བ་དེ་རེད། ཕ་མ་ཞིག་ལ་མཚོན་ན་ཡང་བྱིས་པའི་སྒེར་ཚུགས་ཀྱི་གཤིས་ཀར་བརྩི་མཐོང་བྱེད་ཤེས་རྒྱུ་དང་། བྱིས་པའི་མཚར་སྣང་ལ་འདེང་འཇོག་ཆེན་པོས་གསར་གཏོད་ཀྱི་ལས་ལ་བསྐུལ་ཤེས་རྒྱུ་དང་། བྱ་བ་འདྲ་མིན་སྣ་ཚོགས་ལ་འཚོལ་བསྙེག་དང་ཚོད་ལྟ་བྱེད་པར་དགའ་མཁན་ཞིག་ཏུ་གཏོང་རྒྱུ་ནི། བྱིས་ཚོའི་མཐའ་མེད་པའི་འཇོན་ནུས་སྣ་ཚོགས་སྔོག་འདོན་བྱེད་པའི་མན་ངག་དམ་པ་དེ་ཡིན་པ་ཡང་རྗེས་སུ་དཔོག་ནུས་པས། དེ་དག་ལ་སོགས་ཀྱིས་མཚོན་པའི་བྱ་བ་ཆུང་ས་ནས་མགོ་བརྩམས་ཏེ། ལམ་ཁ་གསར་བ་དང་ཐབས་ལམ་གསར་བ་རེ་འཚོལ་ཤེས་ཀྱིས་གསར་གཏོད་ཀྱི་ནུས་པ་གསོ་སྐྱོང་བྱ་རྒྱུ་ནི། གང་ལས་ཀྱང་གལ་ཆེ་སྟབས། ང་ཚོས་མཉམ་དུ་ལས་དེར་ཅི་ནུས་ཀྱིས་འབད་པར་བྱའོ།།
རྫོགས་སོ།། ་་་