འཇུ་མི་ཕམ་པའི་{ནད་ཀྱི་མཁྱུད་དཔྱད་སྣ་ཚོགས་ཕྱོགས་གཅིག་བཀོད་པ་ཟུག་རྔུ་ཀུན་སེལ་ཞེས་བྱ་བ།} ལས། ནད་ཀྱི་ངོ་བོའི་དབང་དུ་བྱས་ན་ཚ་བའི་ནད་ལ། བཙན་མཆོད་བཙན་མདོས་བྱ། ཆབ་གཏོར་སོགས་ཆུ་ཡི་ལས་ལ་བརྟེན་པའི་རིམ་གྲོ་བྱ། གྲང་བ་དམུ་ཆུ་སོགས་ཆུ་ནད་ལ། ཀླུ་མཆོད། ཀླུ་མདོས་འཕང་། ཚ་ཚྭ་དང་། ས་སྐུ་བཞེངས་པ་སོགས་ས་ལ་བརྟེན་པའི་རིམ་གྲོ་བྱ། བད་ཀན་སྨུག་པོ་སོགས་སྲ་བརྟན་གྱི་ནད་རིགས་ལ། ས་བདག་ཀླུ་གཉན་བཅོས། ཇོ་དར་དང་། བྱབས་པ་སོགས་རླུང་ལ་བརྟེན་པའི་རིམ་ གྲོ་བྱ། རླུང་ནད་རྩ་ནད་གཡོ་བྱེད་སྨྱོ་བྱེད་སོགས་ལ། རྒྱལ་པོ་དང་གཉན་བཅོས། རལ་གྲི་ལ་སྔགས་བཏབ་པས་བྱབས་པ་དང་། ལྕགས་ཆ་ཡོན་དུ་སྦྱིན་པ་སོགས་ལྕགས་ལ་བརྟེན་པའི་ལས་ཀྱི་གཉེན་པོའི་རྟེན་འབྲེལ་བྱ། འབྲས་དང་རུས་ནད་སོགས་ལ། རྒྱལ་པོ་དང་དཀོར་བདག་བཅོས། སྦྱིན་སྲེག་སོགས་མེ་ལས་བྱ། རླུང་ནད་ལ་རྒྱལ་པོ་བཅོས། མི་གཡོ་བའི་སྔགས་བཟླ། མཁྲིས་ནད་ལ་མ་མོ་བཅོས། སྒྲོལ་མ་འདོན། བད་ཀན་ལ་ཡུལ་བདག་མཆོད། ཙུནྡེའི་གཟུངས་བཟླ། རིམས་ལ་མ་མོ་བཅོས། ལོ་གྱོན་མའི་གཟུངས་བཟླ། ནད་ཐམས་ཅད་ལ་སྨན་བླ། གདོན་ཐམས་ཅད་ལ་སྟོང་ཆེན་རབ་འཇོམས་དང་། བསིལ་ཚལ། སོར་འབྲངས་བཀླག །དུག་ཐམས་ཅད་ལ་རྨ་བྱ་ཆེན་མོ་དང་། དུག་སེལ་མ། སོར་མོ་ཅན་གྱི་གཟུངས་བཀླག །གློ་བ་ན་བར་བཙན་བཅོས། དེ་བཞིན་སྙིང་ལ་རྒྱལ་པོ། མཆིན་པར་མ་བདུད། མཁྲིས་པར་མ་མོ། མཁལ་མར་ཀླུ་གཉན། མཚེར་ནད་ལ་གྲི་ཕོ་མོ་དང་ས་བདག་བཅོས་པར་བྱ། གང་ལའང་གླུད་དང་སྤྱི་མདོས་ཀྱིས་ཕན།ཞེས་གསུངས་སོ།།

བསྟན་འཛིན་གྱི་སྐྱེས་བུའི་མཚན་ཞིག་ཁྱེར་ནས་འཇིག་རྟེན་ཚེ་འདིའི་བསམ་བློ་དང་བྱ་བཞག་ཁོ་ན་མ་གཏོགས་བསྟན་པ་ལ་ཕན་ཐོགས་གང་ཡང་མེད་ན། འཇིག་རྟེན་ཐ་མལ་པའི་ནང་ནས་ཀྱང་ཐ་ཤལ་བ་ཇག་པ་དང་རྐུན་མ་ལས་ཀྱང་ཆེས་ཐབས་སྡུག་ཅིང་ཡ་ང་བའི་གནས་སུ་གྱུར་པ་ཡིན། འཇིག་རྟེན་ཐ་ཤལ་བ་ཇག་རྐུན་རྣམས་ཀྱིས་ཀྱང་སངས་རྒྱས་ཤཱཀྱ་ཐུབ་པའི་མཚན་ཁྱེར་ནས་ཚེ་འདིའི་འཚོ་བ་ལྟོ་གོས་སོགས་སྒྲུབ་ཀྱི་མེད།

སྟོན་པ་མཉན་ཡོད་ནའོ། །
དེའི་ཚེ་ནགས་ན་སྦྲུལ་གདུག་པ་ཞིག་འདུག་པ་ནགས་དེར་བ་ལང་རྫིས་མེ་བཏང་བ་དང་སྤྲུལ་དེ་བསྲེགས་ནས་མ་ཤི་ཙམ་དུ་མེས་བསྲེགས་པ་ལས་མཆོངས་ཏེ། ཤིང་ཞིག་གི་དྲུང་དུ་བསྐྱིལ་ནས་འདུག་གོ །ཤཱ་རིའི་བུས་ཕྱོགས་དེར་སོང་བ་ན་དེ་མེས་ཚིག་སྟེ། སྡུག་བསྔལ་གྱི་ཚོར་བས་ཉམས་ཐག་པ་མཐོང་ནས། དེའི་རྒྱུད་ལ་དགེ་རྩ་ཅུང་ཟད་ཡོད་ཅིང་དེ་ཡང་བདག་ལ་རག་ལས་པར་མཐོང་སྟེ། ཆུ་བསིལ་བ་གཏོར་ནས། འདུས་བྱས་ཐམས་ཅད་མི་རྟག །ཆོས་ཐམས་ཅད་བདག་མེད། མྱ་ངན་ལས་འདས་པ་ཞི་བ་སྟེ། ང་ལ་སེམས་རབ་ཏུ་དང་བར་གྱིས་ཤིག་དང་དུད་འགྲོའི་འདོད་ཆགས་དང་བྲལ་ནས་བདེ་འགྲོར་སྐྱེ་བར་འགྱུར་རོ་ཞེས་སྨྲས་ཏེ་སོང་བ་དང་། དེ་མ་ཐག་ཏུ་ཁྭས་ཁྱེར་རོ། །ཤཱ་རིའི་བུས་བརྟགས་པས། སྦྲུལ་དེ་བྲམ་ཟེ་ལས་དྲུག་དང་ལྡན་པ་ཞིག་གི་ཁྱིམ་དུ་སྐྱེ་བར་མཐོང་ནས། དེའི་ཁྱིམ་དུ་སོང་སྟེ་བྲམ་ཟེ་ཆུང་མ་དང་བཅས་པ་སྐྱབས་འགྲོ་དང་བསླབ་པའི་གཞི་ལ་བཀོད་དོ། །རེ་ཞིག་ན་གཅིག་པུ་དེའི་ཁྱིམ་དུ་སོང་བ་དང་། འཕགས་པ། ཕྱི་བཞིན་འབྲང་བའི་དགེ་སྦྱོང་མ་མཆིས་སམ། བདག་གི་ཕྱི་བཞིན་འབྲང་བའི་དགེ་སྦྱོང་རྩྭ་ཀུ་ཤའམ་ཀ་ཤ་ལྟ་བུ་གཞན་ལས་སྐྱེ་བར་མི་འགྱུར་གྱི། ཁྱེད་ལྟ་བུ་ལས་ཐོབ་པ་དེ་བདག་གི་ཕྱི་བཞིན་འབྲང་བའི་དགེ་སྦྱོང་དུ་འགྱུར་རོ། །འཕགས་པ། བདག་གི་མཆིས་འབྲང་ལ་ཁྱེའུ་ཞིག་བཙས་ན་དེ་ཁྱེད་ཀྱི་ཕྱི་བཞིན་འབྲང་བའི་དགེ་སྦྱོང་དུ་དབུལ་ལོ། །ནད་མེད་པར་གྱུར་ཅིག་བླང་ངོ་ཞེས་སྨྲས་ནས་སོང་ངོ་། །བྲམ་ཟེ་མོ་དེ་ལ་ཟླ་བ་དགུ་འདས་ཏེ་ཁྱེའུ་ཞིག་བཙས་ནས་ཉི་མ་ཉི་ཤུ་རྩ་གཅིག་ཏུ་བཙས་སྟོན་བྱས་ཏེ། རིགས་དང་མཐུན་པའི་མིང་བཏགས། དེ་འོ་མ་ལ་སོགས་པས་བསྐྱེད་དོ། །དེ་མའི་ནུ་མ་འཐུང་བ་ན་བག་མེད་པས་སོའམ་སེན་མོས་རེག་ན་སྐྲང་ངོ་། །དེ་ཆེན་པོར་གྱུར་ནས་བྱེའུ་དང་བུ་མོ་རྣམས་དང་ལྷན་ཅིག་རྩེ་བའི་ཚེ་ཁྲོས་ནས་སོའམ་སེན་མོས་རེག་ན་སྐྲང་ངོ་། །རེ་ཞིག་ན་ཤཱ་རིའི་བུས་དེ་རབ་ཏུ་འབྱུང་བའི་དུས་ཤེས་ནས་ཁྱིམ་དེར་སོང་སྟེ། བྲམ་ཟེ་མོ་དེ་ལ་ཆོས་བཤད་ནས། ཁྱེའུ་འདི་བདག་གི་ཕྱི་བཞིན་འབྲང་བའི་དགེ་སྦྱོང་ཡིན་ནོ་ཞེས་མཚན་མ་ཞིག་བསྟན་པ་དང་། བྲམ་ཟེ་དེས། བུ། ཁྱོད་མ་སྐྱེས་པ་ནས་འཕགས་པ་ལ་ཕུལ་གྱིས་སོང་ཞིག །སྲིད་པ་ཐ་མ་བའི་སེམས་ཅན་དེ་ཤཱརིའི་བུའི་གདོང་དུ་རིང་ཞིག་བརྟགས་ནས་དེའི་ཕྱི་བཞིན་དུ་འབྲངས་པ་དང་། དེ་རབ་ཏུ་བྱུང་ཞིང་བསྙེན་བར་རྫོགས་པར་བྱས་སོ། །དེས་སོ་ཤིང་ཟོས་ལྕེ་བཞར་ནས་མ་བཀྲུས་པར་དོར་བ་དང་། དེ་ལ་སྦྲང་མ་ཞིག་གིས་ཟོས་ནས་ཤི། དེ་ལ་སྲོག་ཆགས་ཁྱིམ་སྦྱོང་གིས་ཟོས་པས་ཤི། དེ་བྱ་སྣ་ཚོགས་ཀྱིས་ཟོས་པས་ཤི། དེ་ལ་བྱི་ལས་ཟོས་པས་ཤི། དེ་ལ་སྦྲང་བུ་དང་གྲོག་མ་དག་གིས་ཟོས་པས་ཐམས་ཅད་ཀྱང་ཤི་ནས་སྲོག་ཆགས་མང་པོ་ཤི་བའི་རོ་དངར་ཞིང་འདུག་པ་དང་། ཕྱི་དེ་ཉིན་ཕྱོགས་དེར་དགེ་སློང་རྣམས་སོ་ཤིང་བཟའ་བར་འདོད་པ་དང་དེ་དག་མཐོང་ནས། ཅི་ཡིན། མི་ཤེས་སོ། །གཞོན་ནུ་ཞིག་གིས་ཇི་ལྟར་གྱུར་པར་ཤེས་ནས་སྨྲས་པས། དེ་གསོལ་བ་དང་། སོ་ཤིང་མ་བཀྲུས་པར་མི་དོར་རོ། །ལ་ལ་ཆུ་ཉུང་ནས་ཇི་ལྟར་བྱ་བ་མ་ཤེས་པ་དང་།སོ་དང་ལྕེ་གཉིས་ཀྱི་དྲུད་བཞར་གྱི་ཕྱོགས་ཁའི་དྲི་མས་གོས་པ་མ་བཀྲུས་སམ་སས་མ་བསྐུས་པར་མི་དོར་རོ། །སོ་ཤིང་ཟོས་ནས་སྒྲ་མ་བྱས་པར་བོར་བ་དང་། གཙུག་ལག་ཁང་ན་གནས་པ་དག་གི་མགོར་ཕོག་པས་འཕྱ་ནས། སྒྲ་མ་བྱས་པར་མི་དོར་རོ། །དེ་དག་སོ་ཤིང་འདོར་བ་ན་སྒྲ་འབྱིན་གྱི། བཤང་གཅི་སོགས་འདོར་བ་ན་སྒྲ་མ་བྱས་པས་ཉེས་དམིགས་དེ་ཉིད་དུ་གྱུར་ནས། དེ་ནི་དཔེ་ཡིན་ནོ། །བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐུགས་པ་དང་། རླུགས་པ་དང་། གཞན་དག་ཀྱང་ངོ་། །སོ་ཤིང་བཟའ་བར་གསུངས་པ་དང་། ལམ་དུ་ཞུགས་པ་ཁ་ཅིག་གིས་སོ་ཤིང་མ་རྙེད་པར་ཟན་གཅོད་པར་བྱེད་པ་དང་། ཟན་གཅད་པར་མི་བྱ་ཡི། སོ་ཤིང་དེ་ལས་བྱི་དོར་འབྱུང་བ་བཞིན་དུ་འདག་རྫས་དང་ལྕི་བ་ལས་ཀྱང་ཁ་རུང་བར་བྱས་ལ་ལན་གསུམ་བཤལ་ནས་བཟའ་བར་བྱའོ།།