>

首页发布

<<རྣམ་རྟོག་ཕྲ་མོ།>>
གཎྜིས།
ཟག་མེད་ཐར་བའི་སྐམ་སར་འདྲེན་བྱེད་ཀྱི་གྲོགས་པོ། །
མི་འདོད་དམྱར་བའི་རྫོང་དུ་འཇུག་བྱེད་ཀྱི་གཤེད་མ། །
ཡ་ཀིའི་ཞིང་དང་མ་ཀིའི་རིགས་དྲུག་གི་སྲབ་མདའ། །
རྣམ་རྟོག་ཤུགས་དྲག་འདི་ལས་སྟོབས་ལྡན་ཞིག་སུ་ཡོད། །

ལྟོ་འགྲངས་ལུས་བདེར་འཁོད་དུས་དམ་ཆོས་ལ་བསམས་ཀྱང་། །
འགལ་རྐྱེན་ཨེན་ཙམ་འཕྲད་དུས་སྐྱོ་ཆད་དུ་གྱུར་བའི། །
འགྱུར་ལྡོག་གློག་ལས་མྱུར་བའི་གཉུག་གཤིས་ཀྱི་སེམས་འདི། །
ཕུགས་ཀྱི་གཏད་སོ་དབེན་པ་དཔྱིད་གནམ་ལ་ལྟོས་དང་། །

སྐབས་རེར་ངེས་འབྱུང་དབྱར་གྱི་མཚོ་མོ་རུ་འཁྲུངས་ཤིང་། །
ཐེངས་རེར་འདོད་གདུང་མེ་ལྕེ་སྤྲིན་ཕུང་དུ་འཁྲིགས་པ། །
མཚམས་རེར་ལྷག་བསམ་མཇའ་ཡི་གཟུགས་རིས་སུ་འཆར་བའི། །
སེམས་ཁྱོད་འགྱུར་བ་མང་བའི་ཁྲེལ་མེད་ཀྱི་གྲོགས་བཞིན། །

སྐྱིད་ཉིན་རང་ཚུགས་འཆོར་ཏེ་རྗེས་བརྗོད་ལ་མོས་ཤིང་། །
སྡུག་དུས་རང་ངོ་མི་ཟིན་ས་འཛུལ་རང་བྱེད་པ། །
སྐྱིད་སྡུག་མི་ཐེག་རྩྭ་ལྗང་ཟིལ་བ་ལ་འགྲན་པའི། །
རྣམ་རྟོག་ཁྱོད་ནི་དར་ལྕེ་ཟད་པོ་ཞིག་རེད་དོ། །

གཞན་གྱི་འབྱོར་ཕྱུག་མཐོང་ཚེ་ཟུག་རྔུ་ཞིག་ལྡང་ལ་། །
རང་མཉམ་རྒྱལ་ཁ་ཐོས་ཚེ་མི་བཟོད་པར་ཁོང་ཁྲོས། །
རང་བདེ་རང་སྐྱིད་ཁོ་ནར་དུས་ཀུན་ཏུ་འབད་པའི། །
འདོད་ཧམ་ཞི་མེད་ཁྱོད་ནི་མེ་ལས་ཀྱང་ཚ་ཨང་། །

གཤས་རར་ཐོན་ཚེ་སྙིང་རྗེས་མིག་ཆུ་ཞིག་བཞུར་ཡང་། །
ཁྱིམ་དུ་ལོག་ཚེ་ཤ་ཁྲག་མངོན་མེད་དུ་རོལ་བའི། །
བཟང་ངན་འཁྱེར་སོ་མ་ངེས་གྱ་གྱུ་ཡི་སེམས་ཁྱོད། །
རང་གཤིས་འདི་ཞེས་ངོས་འཛིན་བྱ་ས་རང་མེད་དོ། །

མཐོན་པོའི་ཐོབ་དང་སྒོར་མོའི་བམ་ཁ་ལ་དུང་ཤིང་། །
མཛེས་མའི་ལུས་དང་འཇིག་རྟེན་ཆོས་བརྒྱད་དག་འདོད་ཅིང་། །
སྲིད་གསུམ་བདག་པོར་གྱུར་ཡང་ཚིམས་དུས་རང་མེད་པའི། །
ལན་ཆགས་ལྕི་བའི་སེམས་ཁྱོད་བར་དོ་ཡི་རྣམ་ཤེས། །

ཁྱོད་ནི་སྲིད་དབང་འབྱོར་བའི་རྒྱལ་པོ་བཞིན་འགྱིངས་ཏེ། །
ང་རང་འཁོར་བའི་ཚང་དུ་བྲན་བཞིན་དུ་བཀོལ་ནས། །
ཉམ་ཆུང་ལུས་ཀྱང་རྗེས་སུ་ཁྱི་བཞིན་དུ་འབྲངས་ཀྱང་། །
ཅི་ཡང་མ་ཟིན་གང་ཡང་མ་ཐོབ་པར་བྱས་སོ། །

བདག་གི་མགོན་ནི་བདག་ཉིད་གཅིག་པུ་རུ་གསུངས་ཤིང་། །
བདག་གི་དགྲ་ཡང་བདག་ཉིད་ཁོ་ན་རུ་གསུངས་པས། །
འཆིང་གྲོལ་འབྱེད་པའི་ཡིད་ཆེས་ཆ་འཇོག་རང་མེད་པའི། །
ཐར་བའི་ལམ་སྣེ་འཇའ་ཡི་འཆར་གཟུགས་ཤིག་རེད་དམ། །

གཟུང་འཛིན་འཁོར་བ་ཐང་ཆེན་ཐོད་བརྒལ་གྱིས་བགྲོད་དེ། །
མྱང་འདས་ཐར་བའི་གྲོང་ཁྱེར་དཔལ་ལྡན་གྱི་གླིང་དུ། །
རང་སེམས་རང་ངོ་ཤེས་པའི་གསང་ལམ་དེ་བརྙེད་ནས། །
མཐའ་བྲལ་ཟག་མེད་དགའ་བདེར་ལོངས་སྤྱོད་དེ་ནམ་ཞིག །

ཅེས་གྱི་ན་བ་གཎྜི་རིགས་པའི་རྣོ་མཐོང་ངམ་བན་དེ་ཆོས་འགྲུབ་ཀྱིས། https://t.cn/R2Wx1Aq

གྲོགས་པོ་བཟང་ངན་གྱི་ཁྱད་པར།

ཁྱོད་ལ་གྲོགས་པོ་ཞིག་ཡོད་པའི་དབང་དུ་བཏང་ན། ཁྱོད་ཀྱི་གྲོགས་པོ་དེས་ཁྱོད་དང་དངོས་སུ་འཕྲད་པའི་གནས་སྐབས་ན། ཁྱོད་ལ་དགའ་བ། སྤྲོ་བ། བཀུར་བསྟི་བྱེད་པ་དང་། ལྐོག་ནས་ཡང་ཁྱོད་ལ་བསྟོད་པ་དང་། ཕན་ཅི་ཐོགས་བྱེད། དེའི་ཕྱིར་ན། རང་ལ་བྱ་བ་གང་ཅིའི་འཐད་ནས་ཕན་པར་སྒྲུབ་པའི་གྲོགས་པོ་དེ་ལ་ཁྱོད་ཡིད་ཆེས་ཡོད་རྒྱུ་རེད། གྲོགས་པོ་འགའ་ཞིག་གིས་ཁྱོད་ཀྱི་ངོ་ལ་བལྟས་ནས་བསྟོད་པ་དང་། ལྐོག་ནས་སྨད། དེ་ནས་བཟུང་ཁྱོད་ལ་གནོད་པ་སྣ་ཚོགས་ཀྱི་ལས་བརྩམ་རྒྱུ་རེད།

ཆོས་རྗེ་ཡིད་བཞིན་ནོར་བུས་གསུངས།
ཧོར་པོ་ཤཱཀྱ་ནོར་བུས་ཡི་གེར་ཕབ།

གཏམ་རྒྱུད་གསེར་ཐང་ལས།
ཀླ་ཀློའི་ཆོས་ལུགས་ནི་མཚོན་ཆ་ཐོགས་པའི་དམག་དཔུང་དག་གིས་ཁྱེར་ཏེ་ཁྲག་གི་རྫིང་བུ་བསྐྱིལ་ནས་འཇིག་རྟེན་དུ་དར་བར་བྱས་ཤིང་། དེ་བཞིན་ཡེ་ཤུ་པའི་ཆོས་ལུགས་ཀྱང་ཡང་དག་པའི་དམག་ཅེས་བྱ་བའི་དཔུང་ཆེན་པོ་བཤམས་ཏེ་སྔར་བཞིན་སྤེལ་བ་སྔོན་གྱི་ཚེ་བྱུང་ལ། རང་རེའི་གནས་བརྟན་སྙིང་རྗེ་ཅན་དེའི་བསྟན་པ་ནི་དགེ་སློང་སྲིན་བུ་མི་གསོད་པ་དག་གིས་ཁྱེར་ཏེ་ཤར་ནུབ་ཀྱི་རྒྱ་མཚོ་ཆེན་པོ་ཡང་བརྒལ་ནས་དར་བ་ཡིན་ནོ་ཞེས་མི་འདྲ་བའི་ཆོས་འབྱུང་རྣམས་ཤེས་པར་བྱའོ།། ཞེས་གསུངས།