གཞན་སྐྱོན་གླེང་ལ་རིགས་གཅིག་ཁ་མཐུན་ནས། །
མཉམ་རུབ་བྱས་ཏེ་མདོ་མེད་ངག་འཁྱལ་ནི། །
སོ་སོའི་ངན་འཚང་རུལ་བ་ཕྱིར་བཏོན་ནས། །
ཚོང་ཟོག་ཐང་མར་བརྡལ་བའི་ཚུལ་འདི་སྐྱོ། །

——སྐུ་འབུམ་པ་རྒྱལ་སྲས་ནས།

འཆི་བདག་རྒྱལ་མོ་ཁྲོས་པའི་བཀའ་ལུང་དེ། །
མཐོ་དམན་སྲོག་ལ་གནམ་ལྕགས་ཐོག་ལས་གཟུ། །
གློ་བུར་སྙིང་གི་དཀྱིལ་ལ་མ་ཐེབས་གོང་། །
མང་ཐོས་ནོར་གྱི་ཕུང་བོ་འབད་པས་གསོག །

བཟོད་སྒོམ་བྱས་ན། གྱོང་རག་པ་ཡིན་ཞེས་པའི་ལྟ་ཚུལ་དེ་འགྲིག་གམ།
ཚན་པ་གསུམ་པ།
གཞན་འཚོ་བ་དངོས་ལ་ལ་སྦྱར་ཏེ། བཟོད་སྒོམ་བྱས་པས་རང་ལ་ཁེ་ཕན་ཅི་ཞིག་འབྱུང་མིན་ལ་ཞིབ་ཏུ་དཔྱད་ན། ཕྱིར་ཕ་རོལ་བོར་སྡང་སེམས་ཆེན་པོ་བསྟན་ཏེ། རླུང་ཁམས་སུ་ཆེ་དང་དཔའ་སུ་ཡོད་ལ་འགྲན་མིན་ནི། སོ་སོའི་རང་དབང་ཡིན་མོད། ཁོང་ཁྲོའི་དབང་དུ་ཤོར་ཚར་ན། སྐད་ཅིག་དེ་ཉིད་ལ་ཡང་དག་པའི་ལམ་ལ་འཇུག་པའི་བསམ་གཞིག་གི་འཆར་སྒོ་ཡོད་ཚད་བཀག་འགྲོ་ལ། སེམས་ཀྱི་ལྷོད་བག་དང་ཞི་བདེ་ཡང་ཡོངས་སུ་བཅོམ་འགྲོ་ཞིང་། ལེ་བདའ་དང་། འཁང་ར། སྐྱོ་གདུང་། འགྱོད་སེམས་སོགས་གུ་དོག་པའི་ཚོར་བ་མང་བོའི་འདམ་ལ་ཟུག་པར་བྱས་འགྲོ་བས། ཁོང་ཁྲོ་དང་དུ་བླངས་ན་རྒྱལ་ཁ་དང་ཁེ་ཕན་ཅི་ཞིག་འདུག་གམ། དེ་ལས་བཟོད་པ་སྒོམ་པ་ནི། དོན་ལ་སེམས་ཀྱི་ལྷིང་འཇགས་མི་དཀྲུགས་པའི་ཆེད་ཡིན། ཚུལ་དང་ཚུལ་མིན་ལ་དཔྱོད་པའི་རྣམ་དཔྱོད་ཀྱི་ཤེས་རབ་མི་བརླགས་པའི་ཆེད་ཡིན། ཚོར་སྣང་ཉི་ཚེ་བའི་བྲན་གཡོག་ཏུ་མ་ཚུད་པར་སེམས་ཀྱི་བདེ་སྐྱིད་བསྲུང་བའི་ཆེད་ཡིན་པས། བཟོད་པ་དང་དུ་ལེན་པ་ནི། སེམས་ཀྱི་བཙན་ས་ཟིན་པའི་རྒྱལ་སྲས་དཔའ་བོ་དངོས་མ་ཞིག་གི་བྱ་སྤྱོད་ལས་རང་སྡུག་རང་གིས་ཉོས་པ་དང་སྡར་མའི་བྱ་སྤྱོད་ཅིག་ཏུ་ཇི་ལྟར་འགྱུར་རམ། རང་གི་ཁེ་ཕན་དང་རང་དོན་སྒྲུབ་པ་ལ་ཡང་དེ་ལས་ལྷག་པའི་ལམ་བཟང་ཅི་ཞིག་མཆིས། ལན་རེར་མི་བུ་རེ་འགས་ནི་ཁོང་ཁྲོ་མ་བཟོད་པར་ཁྱིམ་གྱི་ཅ་དངོས་དག་ཕར་གཡུག་ཚུར་གཡུག་བྱེད་པའམ། ཀར་ཡོལ་སོགས་བཅགས་ཏེ། ནང་སེམས་ཀྱི་ཁོང་ཁྲོ་ཕྱིར་རུ་འདོན་ཐབས་ལ་བརྩོན་ཅིང་། འུ་ཐུག་པའི་ཐབས་ལམ་དེ་འདྲའི་ལམ་ནས་སེམས་ཀྱི་ན་ཟུག་སེལ་ཐབས་བྱེད་མོད། དོན་དམ་དུ་ཤེས་པ་རང་བཞིན་དུ་གནས་པ་ཞིག་གིས་བལྟས་ཚེ། ཚུལ་དེར་སྙིང་བོ་ཅི་ཞིག་འདུག་གམ། ཡིན་ཡང་མི་དེའི་རིགས་ཀྱིས་ནི་སྐབས་དེར་ཤིན་ཏུ་ཡ་ང་བའི་ནོར་འཁྲུལ་དེ་འདྲ་བཟོ་བཞིན་པ་ཡང་ཤེས་ཀྱི་མེད། རྗེས་སོར་ཁྲོང་ཁྲོའི་རྨོངས་གཉིད་ལས་སད་པ་ན། གནོད་འགྱོད་ཀྱིས་གང་བའི་ནོར་འཁྲུལ་ལྟ་བས་མི་བཟོད་པ་མང་བོ་ཞིག་བཟོས་ཟིན་པ་ཡང་གཞི་ནས་ཤེས་རྟོགས་འབྱུང་ངེས། མི་སུ་ཡིན་ཡང་ཁོང་ཁྲོའི་བྲན་དུ་ཚུད་པ་ན། གནས་སྟངས་དེ་ལས་མ་འདས་པ་རེད། གནས་དང་གནས་མིན་ལ་དཔྱོད་པའི་རྣམ་དཔྱོད་ཡོད་ཚད་ཀྱི་སྒོ་བཀགས་ཏེ། ཤིན་ཏུ་དོན་སྙིང་བྲལ་བའི་ནོར་འཁྲུལ་ཅི་ཞིག་བཟོ་བཞིན་པ་དེ་རང་ཉིད་ཀྱིས་ཀྱང་མི་ཚོར་བའི་གནས་སུ་བསྐྱལ་འགྲོ་བ་དེ་ནི། ཆེས་འཇིགས་ཉེན་ཆེ་བའི་ཁོང་ཁྲོའི་ཉེས་བྱས་ཤིག་གོ།། ཚུལ་དེ་འདྲའི་ལན་ནས་བལྟས་ན་ལྷག་པར་ཁོང་ཁྲོ་དབང་དུ་གཏོང་བ་ནི། རང་ཉིད་རང་གིས་མི་གྲལ་ནས་ཕུད་པའི་བྱ་སྤྱོད་ཅིག་ཏུ་སོང་འདུག་ན། ད་དུང་བཟོད་པ་དང་དུ་ལེན་པ་ནི། ཉམ་ཆུང་སྡར་མའི་བྱ་སྤྱོད་ཅེས་ནི། སུ་ཞིག་སྨྲ།

གཏམ་རྒྱུད་ཅིག་ལ། ཉིན་ཞིག་སྒོམ་མཁྱེན་པ་ཞིག་སྒོམ་ལ་བཞུགས་ནས་བསྡད་ཡོད་པའི་སྐབས་ཤིག་ལ་རྐུན་མ་གཉིས་སླེབས་ཏེ། བཙན་ཐབས་ཀྱིས་སྒོམ་མཁྱེན་པའི་ཅུང་རིན་ཐང་ཆེ་བའི་ཅ་དངོས་ཡོད་ཚད་བརྐུས་པ་རེད། རྗེས་ནས་ཡོན་བདག་ཚོས་སྒོམ་མཁྱེན་པར་ཁྱེད་ཚང་གིས་རྐུན་མ་དེ་གཉིས་ལ་ཇི་ལྟར་བཟོད་སྒོམ་བྱས་པ་ཡིན་ནམ། ཞེས་དྲིས་པ་ན། སྒོམ་མཁྱེན་པས་གསུང་རྒྱུར། ངས་ནི་དམིགས་བསལ་གྱིས་ཁོ་གཉིས་ལ་བཟོད་སྒོམ་བྱས་པ་མིན། རང་གི་བདེ་སྐྱིད་ཆེད་དུ་ད་གཟོད་བཟོད་སྒོམ་གྱི་ཐབས་ལམ་འདི་བདམས་པ་ཡིན་ཞེས་གསུངས། ཡོན་བདག་ཚོས་གློ་རྡེག་ལ་ཁོང་གི་གསུང་དེའི་གོ་བ་མ་ལོན་པར་མིག་ཅེར་ཅེར་གྱིས་བསྡད། དེ་ནས་སྒོམ་མཁྱེན་པས་ཡང་བསྐྱར་གསུང་རྒྱུར། ངས་ནི་རང་ཉིད་ལ་བཟོད་སྒོམ་བྱས་ཏེ། རྐུན་མ་དེ་གཉིས་ཀྱི་ཕྱོགས་ལ་བསམ་བློ་མ་བཏང་བ་ཡིན། ང་ལ་ད་དུང་ཆོས་ཀྱི་བྱ་བ་མང་བོ་སྒྲུབ་ཀྱི་ཡོད། སྔར་བཞིན་བདེ་སྐྱིད་ཀྱི་འཚོ་བ་རོལ་དགོས་ཡོད། ང་ལ་ལེ་འདའ་བྱེད་པ་དང་རྐུན་མ་དེ་གཉིས་ལ་ཚིག་པ་ཟ་བའི་དུས་ཚོད་མི་འདུག གལ་སྲིད་སྔར་བཞིན་སྡང་སེམས་ཆེན་པོའི་ངང་ནས་རྐུན་མ་དེ་གཉིས་ལ་ཚིག་པ་ཟ་ནས་བསྡད་པ་ཡིན་ན། རང་གི་འཚོ་བར་འགྱོད་གདུང་དང་སྐྱོ་སྣང་གིས་གང་ངེས་པས། མཐར་ཐུག་གནད་དོན་ཆུང་ཆུང་དེ་ཉིད་སེམས་ནད་དུ་གྱུར་ཏེ། རང་གི་མི་ཚེའི་བདེ་སྐྱིད་ཀྱང་བརླག་ཉེན་ཆེ། ཚད་དེར་སླེབས་ན། རྐུན་མ་དེ་གཉིས་ཀྱིས་ཁྱོད་ཀྱི་རྒྱུ་ནོར་ཉུང་ཉུང་ཙམ་དེ་བརྐུས་ཚར་བ་མ་ཟད། ཁྱོད་ཀྱི་མི་ཚེའི་བདེ་སྐྱིད་དང་སེམས་ཀྱི་ལྷིང་འཇགས་ཀྱང་བསྐུར་ཚར་བ་རེད། དེ་བས་ང་རང་སྔར་བཞིན་ཞི་ལྷོད་བག་ཕེབས་དང་དགའ་དགའ་སྐྱིད་སྐྱིད་ཀྱི་ངང་ནས་འཚོ་དགོས་ཡོད་པས། བཟོད་པའི་ཉམས་ལེན་ལ་བརྟེན་ཏེ། རང་ཉིད་དང་དུ་བླངས་བ་ཡིན་ལ། རྐུན་མ་དེ་གཉིས་ཀྱང་དང་དུ་བླངས་པ་ཡིན་ནོ།། ཞེས་གསུངས་པས། ཡོད་བདག་རྣམས་ལ་ཡང་ཡིད་འགུལ་ཚད་མེད་ཐེབས། གཏམ་རྒྱུད་ཁྱད་མཚར་བ་འདིས་ཀྱང་། བཟོད་པའི་ཉམས་ལེན་ལ་འབད་པ་དེ། དོན་ལ་རང་ཉིད་དང་དུ་ལེན་ཐབས་ཤིག་དང་རང་གི་བདེ་སྐྱིད་དང་སེམས་ཀྱི་ལྷིང་འཇགས་བསྲུང་ཐབས་དམ་ཞིག་ཡིན་པའི་གནད་དེ་ཡང་ཤིན་ཏུ་གོ་སླའི་ངག་གིས་གསལ་བར་འགྲེལ་འདུག་པ་དེའོ།།
མུ་འགོད། ་་་་་་་