༄༅།།རྗེ་ཙོང་ཁ་པའི་རྣམ་ཐར་མདོར་བསྡུས་ཚིགས་བཅད་བཅུ་བདུན་པ་བཞུགས་སོ།།

རྡོ་སྦིས་དགེ་བཤེས་ཤེས་རབ་རྒྱ་མཚོས་མཛད།

འཇམ་དབྱངས་ངུར་སྨྲིག་ཟློས་གར་ཙོང་ཁ་པའི། །
ཕྲ་ཞིབ་རིགས་ལམ་རྡོ་རྗེ་ཟེགས་མའི་མཚོན། །
གངས་ཅན་ལོག་སྨྲའི་གཤེད་དུ་གདེངས་པའི་གཏམ། །
འཛམ་གླིང་བློ་ལྡན་སྐྱེ་བོའི་ངག་ན་མཛེས། །

རབ་བྱུང་དྲུག་པའི་མེ་མོ་བྱ་ཡི་ལོར། །
སངས་རྒྱས་བྱང་སེམས་མང་བོའི་ལུང་བསྟན་བཞིན། །
དཔལ་ཆེན་ཀླུ་འབུམ་དགེ་དང་སྲས་སུ་འབྲེལ། །
ཙོང་ཁའི་ཡུལ་དུ་བལྟམས་པའི་རྣམ་ཐར་ཡིན། །

ལྟེ་བའི་མཚལ་ཐིགས་ས་ལ་འཕོས་པ་ནས། །
ཙནྡན་ལྗོན་པ་ལོ་འདབ་འབུམ་ཕྲག་ཅན། །
སེངྒེ་ང་རོའི་སྐུ་ཡིས་བརྒྱན་པ་འཁྲུངས། །
སྔ་རབས་གཞན་ལ་མེད་པའི་རྣམ་ཐར་ཡིན། །

དགུང་ལོ་གསུམ་པར་གྲུབ་དབང་ཀརྨ་བས། །
དགེ་བསྙེན་བསྒྲུབས་ཤིང་བདུན་པར་ཆོས་ཀྱི་རྗེ། །
དོན་གྲུབ་རིན་ཆེན་དྲུང་ནས་རབ་ཏུ་བྱུང་། །
རྒྱལ་བའི་བསྟན་ལ་ཞུགས་པའི་རྣམ་ཐར་ཡིན། །

བཅུ་བདུན་པ་ལ་དུས་གསུམ་གཟིགས་པ་ཡི། །
བླ་མའི་བཀའ་དང་རང་གི་དད་སྟོབས་ཀྱིས། །
དབུས་གཙང་ཆོས་ཀྱི་ལྗོངས་སུ་གོམ་ཁ་བསྒྱུར། །
ཉི་ཟླ་ཤར་ནས་འཆར་བའི་རྣམ་ཐར་ཡིན། །

རྒྱ་གར་པཎ་གྲུབ་ལྟ་བུའི་མཁས་མང་ལས། །
མདོ་སྔགས་ཐ་སྙད་གཙུག་ལག་ཀུན་ལ་སྦྱངས། །
རབ་འབྱམས་ཤེས་བྱ་ནམ་མཁའི་ཕ་མཐར་སོན། །
དང་པོར་ཐོས་པ་བཙལ་བའི་རྣམ་ཐར་ཡིན། །

གདུལ་བྱའི་ཁམས་དང་འཚམ་པར་འཇུག་པ་ཡི། །
རྒྱལ་བའི་བཀའ་ལས་ཡི་གེ་འབྲུ་གཅིག་ཀྱང་། །
ལུས་པ་མེད་པར་ཐར་བའི་ཐབས་སུ་དགོངས། །
བར་དུ་གདམས་པར་ཤར་བའི་རྣམ་ཐར་ཡིན། །

མཁའ་ཁྱབ་སྐྱེ་རྒུ་སྐྱོབ་པའི་བརྩེ་བ་དང་། །
ཟབ་རྒྱས་ལམ་གྱི་རིམ་པའི་དམིགས་རྣམ་ལ། །
མཉམ་རྗེས་ཉིན་མཚན་ཀུན་ཏུ་གཡེལ་བ་མེད། །
ཐ་མར་ཉམས་སུ་བླངས་པའི་རྣམ་ཐར་ཡིན། །

བཀའ་དང་བསྟན་བཅོས་བྱེ་བའི་གནད་ལ་རྣོ།།
སོར་ཐར་བྱང་སེམས་གསང་སྔགས་ཚུལ་ཁྲིམས་གཙང་།།
བྱམས་དང་སྙིང་རྗེ་ཕྱིན་དྲུག་བསྡུ་བཞིའི་གཏེར།།
ཕུལ་བྱུང་མཁས་བཙུན་བཟང་བོའི་རྣམ་ཐར་ཡིན།།

དོན་དམ་དབུ་མ་ཆེན་པོའི་དེ་ཉིད་གཟིགས། །
ཉེས་པ་ལྔ་སྤོང་འདུ་བྱེད་བརྒྱད་དང་འགྲོགས། །
འདོད་གདུང་མཐའ་གཉིས་སྐྱོན་བྲལ་པདྨའི་ལྗོན། །
ཟླ་མེད་ལྟ་སྒོམ་སྤྱོད་པའི་རྣམ་ཐར་ཡིན། །

གཞུང་ཆེན་བཅུ་ཕྲག་མང་བོ་བློ་ནས་འགྲེལ། །
ཕས་རྒོལ་གླང་སྨྱོན་ཀླད་པའི་བུམ་པ་འགེམས། །
ཕྲ་ཞིབ་གསུང་ངག་སྲིད་ཞིའི་ཁོངས་ན་བརྗིད། །
ངོ་མཚར་འཆད་རྩོད་རྩོམ་པའི་རྣམ་ཐར་ཡིན། །

རྫིང་ཕྱིའི་མི་ཕམ་རྟེན་དང་བརྟེན་པ་གསོས། །
གཉལ་གྱི་ལུང་རིང་སྔོན་མེད་ཆོས་འཁོར་བསྐོར། །
ཆོ་འཕྲུལ་སྨོན་ལམ་སྟག་རྩེའི་སྒྲུབ་མཆོད་སྤེལ། །
བསྔགས་འོས་མཛད་ཆེན་བཞི་ཡི་རྣམ་ཐར་ཡིན། །

སྣང་ཡང་སྟོང་བའི་རྟེན་འབྱུང་ཟབ་མོ་དང་། །
གཉུག་རླུང་ལྷ་སྐུར་ཤར་བའི་སྒྱུ་ལུས་ལ། །
ལེགས་བཤད་གློག་གི་སྒྲོན་མེ་ཆེར་སྦར་བ། །
གནད་ཀྱི་རྨོངས་མུན་སེལ་བའི་རྣམ་ཐར་ཡིན། །

ང་གསུམ་ས་མོ་གླང་ལ་དགའ་ལྡན་བཏབ། །
རེ་གསུམ་ཕག་ལ་བྱམས་པའི་མདུན་སར་གཤེགས། །
རྗེས་འཇུག་དགོན་དང་སློབ་མས་ས་སྟེང་ཁྱབ།།
སྲིད་ན་འགྲན་ཟླ་བྲལ་བའི་རྣམ་ཐར་ཡིན། །

དེ་ལས་འོང་བའི་བསོད་ནམས་འོ་མའི་ཀླུང་། །
ཟླ་བ་བདུད་རྩིའི་མཛོད་ལ་འཁུ་འདྲ་བས། །
དབྱུག་གི་བློ་གྲོས་མ་འདི་ནད་མཚོན་དང་། །
མུ་གེའི་བསྐལ་པས་ཀུན་ནས་དབེན་གྱུར་ཅིག།།

དེ་ལྟར་ཆོས་ཀྱི་རྒྱལ་བོ་ཙོང་ཁ་བའི། །
རྣམ་ཐར་མདོར་བསྡུས་ཚིགས་བཅད་བཅུ་བདུན་པ།
ཤིས་ངན་བཀྭང་རིན་ཟི་ཡི་ཏཱ་བླ་མ། །
གོན་ཧྥུ་ཆིན་གྱིས་རིང་ནས་བསྐུལ་བའི་ངོར། །

རྒྱལ་བ་གཉིས་པའི་བྱིན་གྱི་ཆ་ཤས་ཙམ། །
སྙིང་གི་ཟེའུ་འབྲུར་རོལ་པའི་མཐུ་ཉིད་ལས། །
མདོ་རྒྱུད་གཞུང་མང་སྨྲ་བའི་སྤོབས་པ་ཅན། །
ཤེས་རབ་རྒྱ་མཚོས་འཕྲལ་མར་བྲིས་ཏེ་སྤེལ།།

རྟག་པར་འཇའ་ཚོན་འཆར་བའི་ཚེ་ན། ཁ་དོག་མང་བོ་ཞིག་ཏུ་འཕྲུལ་བའི་གྲོགས་པོ་ཚོ་དང་ཁོ་ཚོ་དང་འབྲེལ་བའི་གཏམ་རྒྱུད་མོད་པོ་ཞིག་དྲན་འོང་།མིག་ཆུ་དང་འཛུམ་མདངས་གཉིས་ཀྱིས་སྐྱོར་བའི་འཚོ་བ་དག ལན་རེར་ཕ་མ་དང་སྤུན་མཆེད་གཉིས་དང་ལྷན་དུ་ནང་སེམས་ཞིབ་ཏུ་བྲུད་ཆོག་ལ། ལན་རེར་གནོན་ཤུགས་དང་སེམས་ངལ་ཙག་ཙིག་ཅིག་གིས་མིག་ཆུའི་ཕྲེང་ཐག་ཀྱང་མང་དུ་བཏོན་མྱོང་བས། བཞུད་ལམ་འདིའི་དཀྱོག་མཚམས་ཞིག་ཏུ། ག་ལེར་སེམས་སྐྱ་མོ་ཐང་ལ་བཞག་སྟེ་ལས་བཙན་པོ་རྡོག་ཁྲེས་སུ་ཁུར་ཙ་ན། འཚོ་བ་འཚོ་བའི་དོན་དུ་བསྐྱར་ཟློས་ཞིག་ཏུ་ཆགས་ཤིང་འཇིག་རྟེན་འཇིག་རྟེན་དུ་ངོས་བཟུང་སྟེ་མཐོང་སྣང་དུ་བཀྲམ་ཙ་ན། གསལ་བཤད་དང་ལད་ཟློས་ཤིག་གིས་སེམས་ཁོག་དོག་པར་ཕྱིན་དོན་མེད་ཅིང་། རྣམ་འགྱུར་དང་ཚིག་ཟུར་ཙམ་གྱིས་ངོ་གདོང་ལ་སྨུག་སྤྲིན་གྱིས་གཡོག་རྐྱེན་ཡང་ཡེ་ནས་མེད་པ་གསལ། སྐྱེས་ནས་འཆི་བའི་བར་དུ་ངོ་གདོང་མང་དུ་བརྗེ་དགོས་ཤིང་འཁྲབ་སྟོན་མང་དུ་སྤེལ་དགོས་སྟབས། ཤ་ཁྲག་རུས་གསུམ་གྱིས་གྲུབ་པའི་ཆགས་གཞི་དེ་ནི་སྤྱི་ཁྱབ་ཀྱི་ཆོས་ཉིད་ཞིག་ཏུ་གྲུབ་ཀྱང་། བཏགས་མིང་ཞིག་གི་སྲོག་ཤིང་དུ་གཟུག་རུང་ལོ་ཟླའི་ན་ཟུག་མི་ཐེག་པའི་ཉམ་ཐག་གི་སྙི་གཟུགས་ཤིག་ལས་ཅི། གང་ལྟར་མི་རུ་སྐྱེས་ཞིང་ཚེ་རུ་བརྡོལ་བའི་སྐབས་ལ། ཁ་དོག་དང་ཚོས་སྣས་བསྒོས་པའི་བག་ཆགས་དེ་ཉིད་སེམས་ཀྱི་མཛེས་བ་ཞིག་ཏུ་སྒོམ་རྒྱུ་ལས། སུ་ཞིག་གིས་ཀྱང་ཁྱེད་ཉིད་དཀར་པོ་དཀར་པོ་དུང་ལྟ་བུ་ཞིག་ཏུ་འཛིན་མཁན་བྲལ་ཞིང་། ཁྱེད་ཀྱིས་ཀྱང་གང་ཞིག་དྭངས་གསལ་ཤེལ་སྒོ་ནང་བཞིན། དྲི་མེད་ཁ་་བཏགས་ཇི་བཞིན་སྤྱི་གཙུག་ཏུ་ཡང་འདེགས་མི་ནུས་པས། མིག་གི་ཕྲ་ས་ཞིག་ཏུ་བཟུང་སྟེ་སེམས་ཀྱི་སྲབ་ས་ཞིག་ཏུ་ཉར་རྒྱུ་ནི་ཅི་འདྲའི་མཛེས་ནའང་་་་་་་

༢༠༢༢ལོའི་ཟླ་༡༠བའི་ཚེས༢༥ཉིན་ལ་བྲིས་པ་དགེའོ། ། https://t.cn/A6fUA3bw

འདི་ན་མཁས་པར་གྲགས་པ་ཕལ་མོ་ཆེས།།
འབད་ཀྱང་བློ་ཡི་སྤྱོད་ཡུལ་མ་གྱུར་བ།།
བློ་བཟང་རྒྱལ་བའི་ལེགས་བཤད་དཀའ་གནད་ཀུན།།
འདི་ཡིས་ལག་པའི་མཐིལ་གྱི་རྫས་བཞིན་གཟིགས།།