#圖文不符##迪迪的Diary# 32

我細個屋企住觀塘嘅，我又好鍾意躝街嘅。嗰時最鍾意去尖沙咀，如果阿哥家姐同男女朋友拍拖，又同阿媽阿爸申請搵我過橋，即係帶個細佬出街玩，其實暗簡係去拍拖嗰啲，我一定會提議話去尖沙咀。原因係我好鍾意坐1號A呢架巴士，由觀塘兜兜轉轉睇到好多風景，然後慢慢熬到尖沙咀。

鍾意去尖沙咀嘅原因係嗰度五光十色，有得行街有得睇戲，又有海邊，又冇旺角嗰啲咁複雜；另一個原因係，喺觀塘嗰個1號A巴士站附近，有一檔炸雞翼，超好味，我次次等巴士嘅時候，就要求阿哥家姐，攞返啲油水，梗係啦，我俾你過橋去秘密拍拖喎，仲唔有風洗盡利咩！我會叫佢哋買隻炸雞全翼俾我，然後我就會上車慢慢食！（當年坐巴士係仲可以食嘢嘅）

一隻雞全翼，我可以由觀塘慢慢㗳到尖沙咀碼頭。我嗰時會由雞翼尖嘅第一節開始食，食完雞翼尖就食雞中翼，然後最後食雞鎚，總之留到啖啖肉最後先至食就最滋味。

差唔多成個小學階段都係咁，有街去就去，去親就話去尖沙咀，然後就食雞翼。直至到差唔多六年級，都大個啦，自己都會同啲同學仔躝出街玩。有一次又係咁，攞住隻雞全翼上車，啲同學仔喺度玩，又推推撞撞，架巴士又「櫈」，啱啱食完隻雞翼尖，跟住剩返嗰兩節雞翼，跌落地下，冇得再食！我當時好傷心，狂鬧啲同學仔，望住地下喺啲垃圾塵埃區嘅兩節雞翼，我當時覺得佢對住我喊緊，其實可能係我自己個心喺度淌淚！

自此以後，我明白咗啲嘢，我逢親再食雞全翼嘅時候，我都調返轉嚟食，食咗雞鎚先，然後雞中翼，再食雞翼尖；因為我原來明白咗，細個嘅時候，你會留返啲好嘢，最尾先慢慢嘆；大個咗啲，有啲經歷嘅時候，尤其係世事多變，今日唔知聽日事，有好嘢，係應該嘆咗先！

但係呢個理論，係咪人人都咁諗嘅呢？未必。

成長咗之後，我記得有一次同媽咪去shopping，我買咗好多衫俾佢同自己。第二日我去返工，我着晒全套新衫，阿媽見到就同我講：咁快就著晒啲新嘢啦？我話：梗係啦，唔通等到去飲先着咩，今朝有酒今朝醉，珍惜今天，活在當下吖嘛，我突然間死鬼咗仲邊有得着啊！我阿媽唔理我，笑笑口咁走開咗。

然後佢嗰啲新衫呢，我叫極佢，佢都唔肯著，我仲鬧佢話你係咪想啲衫過晒時你先至拎返出嚟着呢？佢都唔理我。

直到過咗冇耐，有個親戚結婚，佢竟然自動自覺，識得攞嗰日我同佢買嗰啲新衫出嚟著，我心諗：都好，起碼佢肯著！然後佢同我講：今日去飲，拎啲新衫出嚟著，就抵返晒啦，因為多啲人睇到吖嘛！

佢又好似有佢嘅道理喎！非常合乎經濟效益——多啲人睇到，啲新衫更有價值！

咁即係點呢？我有我嘅雞全翼理論，我阿媽有佢嘅經濟效益理論！兩個理論都冇錯㗎，而當我以為呢兩個相反嘅理論，係會隨着年紀同埋人生經歷，會改變嘅時候，我見到我阿媽年長我咁多，人生經驗多我咁多，佢都係會選擇食雞全翼嘅時候，食雞翼尖先，咁即係話，可能當你年紀更大嘅時候，你對你嘅未來，應該更有信心，知道你有朝一日，一定會嘆到嗰舊啖啖肉嘅雞鎚！

冇呀，無端端有感而發咋，總之我依家，活到今天，我仍然係會嘆咗先，食咗舊啖啖肉先，或者過多幾年，我都會變成我阿媽！

你呢？係點食雞全翼㗎 ？

歌曲：#沈殿霞# 《燒雞翼》

楊卓娜在《美麗戰場》演完衰格後母「芳姨」，搞到老公慘死後，緊接在《超能使者》飾演苦命的「喬若詩」，風水輪流轉被衰老公害死，兩角表現都獲讚。熱愛演戲的她，經歷過抑鬱及推劇的日子，對於演「芳姨」再被揭家事，更獲封「最強後母」，她謙稱對「最強」一詞感汗顏，又計劃明年跟未婚夫完成婚事。講到如擁有超能力，她最想時光倒流，可以回到有爸爸的日子，更邊講邊喊，非常傷感。 採訪：杜杜 攝影：譚志光 髮型及化妝：Gipsy Image

訪問當日，剛好是卓娜44歲生日前夕，她笑指生日願望很簡單，「年年都keep住28歲嘅心態，因28歲係有美貌又有智慧嘅年紀，38歲都得，會有啲財富嘅累積囉！哈哈！」雖然近期兩個角色反應俱佳，但她不期望獎項成為生日大禮，「生日實際啲好，頒獎時離我生日好耐，如果畀我揀，我會揀多啲發揮到戲份嘅角色，較獎項更加緊要，如果冇其他角色承接，變咗停咗喺度，我需要得到更多觀眾嘅掌聲，所以無時無刻都期待好角色。」

卓娜曾於訪問中透露，2001年選港姐時發生「批肘事件」，令被抹黑的她對圈中發展感到壓力，埋下患抑鬱症伏線，「嗰時自己傻啫！家諗返都係啲雞毛蒜皮事，如果我識得處理，嗰十年我就唔會白過。」卓娜坦承事件後一直不懂享受當演員的樂趣，「做到好灰心，唔識點樣投入，做嚟做去都係啲過鏡，可有可冇嘅角色，更加唔想做，所以我話以前冇演員道德，自從《愛‧回家》之後投入咗，識得點樣去處理情緒。」

卓娜承認試過推劇，幸得未婚夫楊志翹開解才跳出抑鬱陰霾，「試過推啲角色，戲份唔多，但一嚟要我喊，當然我係喊得出，但係我唔享受，好痛苦好似機械人咁，喺工廠啤膠咁啤出嚟，我都想做得好，但問題係冇空間，推完之後又內疚喎！」因為怕影響楊茜堯，所以該段日子冇搵妹妹傾訴，幸有正能量未婚夫在身邊，「佢會開解吓我，係我心靈導師。」

卓娜2009年為「燈箱大王」楊志翹誕下一女，一直跟對方與遺孀的一對女兒相處融洽，最近《美》劇令她後母身份再被報道，更被封為「最強後母」，她完全不介意，但坦承擔不起「最強」稱號，「我唔覺得自己係最強，呢兩個字令我唔好意思，我都唔係做過啲咩，得到一個咁高嘅榮譽，真係有啲汗顏。」她謂未婚夫看到報導都笑言：「又係呢樣嘢。」

卓娜有計劃明年辦喜事，因為未婚夫經常求婚，「一直都想完成，不過因為好多親人唔喺香港。」她笑指婚禮一拖再拖，三個囡囡已由花女變伴娘。另外，提到想去希臘度蜜月，她依然想預埋三個女，「去歐洲要好長假期，我又唔想去一、兩個星期，好趕咁，去唔到啲咩地方，不過未必適合一家大細去。」

《超》劇中卓娜雖然冇份擁有超能力，但她覺得陳展鵬的角色能停頓時間很有意思，「可能一個決定，一件事會影響成個人生，如果可以停頓一個時間或者可以去返某一個時間嘅空間，已經會改變咗成個故事。」

問到卓娜若可重回人生的某一刻，會選擇那個時候？父親早在她四歲時已離世，一時感觸的她爆喊：「有能力我梗係想有返爸爸啦！」邊抹眼淚的她承認童年缺乏父愛，一直是人生的一大缺口，「我諗我童年嘅生活對我成長影響好大，令到我唔夠自信，如果我童年係好完整，我媽媽會好幸福，我希望我媽媽幸福。」

連續第三年，生日決定唔大搞，而係由十月中開始分別同唔同嘅親朋好友逐一食飯，到呢刻總結原來食咗足足有三十餐！

可能好多人會覺得好誇張，竟然搞出個生日月，不過如果你知道我嘅年紀，怕且你都會同意而家一定係我人生中最多朋友嘅時候，以前讀書或者啱啱出嚟社會做嘢未有累積到咁多朋友，自然冇咁多慶祝，到第日年紀再大啲，朋友亦肯定會買少見少，咁既然今年身邊咁多朋友一知道我生日都盛意拳拳話要請食飯，我亦當然卻之不恭，好襯生日同各方好友團聚一番！

再次多謝大家，今年生日嘅每一餐飯，都令我既滿足又難忘，總之就真係感激不盡⋯下一年，請早啦！