#圖文不符##迪迪的Diary# 32

我細個屋企住觀塘嘅，我又好鍾意躝街嘅。嗰時最鍾意去尖沙咀，如果阿哥家姐同男女朋友拍拖，又同阿媽阿爸申請搵我過橋，即係帶個細佬出街玩，其實暗簡係去拍拖嗰啲，我一定會提議話去尖沙咀。原因係我好鍾意坐1號A呢架巴士，由觀塘兜兜轉轉睇到好多風景，然後慢慢熬到尖沙咀。

鍾意去尖沙咀嘅原因係嗰度五光十色，有得行街有得睇戲，又有海邊，又冇旺角嗰啲咁複雜；另一個原因係，喺觀塘嗰個1號A巴士站附近，有一檔炸雞翼，超好味，我次次等巴士嘅時候，就要求阿哥家姐，攞返啲油水，梗係啦，我俾你過橋去秘密拍拖喎，仲唔有風洗盡利咩！我會叫佢哋買隻炸雞全翼俾我，然後我就會上車慢慢食！（當年坐巴士係仲可以食嘢嘅）

一隻雞全翼，我可以由觀塘慢慢㗳到尖沙咀碼頭。我嗰時會由雞翼尖嘅第一節開始食，食完雞翼尖就食雞中翼，然後最後食雞鎚，總之留到啖啖肉最後先至食就最滋味。

差唔多成個小學階段都係咁，有街去就去，去親就話去尖沙咀，然後就食雞翼。直至到差唔多六年級，都大個啦，自己都會同啲同學仔躝出街玩。有一次又係咁，攞住隻雞全翼上車，啲同學仔喺度玩，又推推撞撞，架巴士又「櫈」，啱啱食完隻雞翼尖，跟住剩返嗰兩節雞翼，跌落地下，冇得再食！我當時好傷心，狂鬧啲同學仔，望住地下喺啲垃圾塵埃區嘅兩節雞翼，我當時覺得佢對住我喊緊，其實可能係我自己個心喺度淌淚！

自此以後，我明白咗啲嘢，我逢親再食雞全翼嘅時候，我都調返轉嚟食，食咗雞鎚先，然後雞中翼，再食雞翼尖；因為我原來明白咗，細個嘅時候，你會留返啲好嘢，最尾先慢慢嘆；大個咗啲，有啲經歷嘅時候，尤其係世事多變，今日唔知聽日事，有好嘢，係應該嘆咗先！

但係呢個理論，係咪人人都咁諗嘅呢？未必。

成長咗之後，我記得有一次同媽咪去shopping，我買咗好多衫俾佢同自己。第二日我去返工，我着晒全套新衫，阿媽見到就同我講：咁快就著晒啲新嘢啦？我話：梗係啦，唔通等到去飲先着咩，今朝有酒今朝醉，珍惜今天，活在當下吖嘛，我突然間死鬼咗仲邊有得着啊！我阿媽唔理我，笑笑口咁走開咗。

然後佢嗰啲新衫呢，我叫極佢，佢都唔肯著，我仲鬧佢話你係咪想啲衫過晒時你先至拎返出嚟着呢？佢都唔理我。

直到過咗冇耐，有個親戚結婚，佢竟然自動自覺，識得攞嗰日我同佢買嗰啲新衫出嚟著，我心諗：都好，起碼佢肯著！然後佢同我講：今日去飲，拎啲新衫出嚟著，就抵返晒啦，因為多啲人睇到吖嘛！

佢又好似有佢嘅道理喎！非常合乎經濟效益——多啲人睇到，啲新衫更有價值！

咁即係點呢？我有我嘅雞全翼理論，我阿媽有佢嘅經濟效益理論！兩個理論都冇錯㗎，而當我以為呢兩個相反嘅理論，係會隨着年紀同埋人生經歷，會改變嘅時候，我見到我阿媽年長我咁多，人生經驗多我咁多，佢都係會選擇食雞全翼嘅時候，食雞翼尖先，咁即係話，可能當你年紀更大嘅時候，你對你嘅未來，應該更有信心，知道你有朝一日，一定會嘆到嗰舊啖啖肉嘅雞鎚！

冇呀，無端端有感而發咋，總之我依家，活到今天，我仍然係會嘆咗先，食咗舊啖啖肉先，或者過多幾年，我都會變成我阿媽！

你呢？係點食雞全翼㗎 ？

歌曲：#沈殿霞# 《燒雞翼》

【音乐沙龙——走进江南丝竹】近日，金阊街道学士社区党委联合苏州市歌舞剧院有限公司开展了一场以《音乐沙龙——走进江南丝竹》为主题的讲座。通过边讲解边演奏的形式，居民们充分了解了江南丝竹的基本知识、历史由来、主要演奏乐器、演奏特点等，聆听了甘涛先生传承谱系代表作品《欢乐歌》《鹧鸪飞》《行街四台》等。

【扫街见摊商爱犬也会“拜托拜托” 侯友宜笑：到底谁学谁？】新北市长选举进入倒数，寻求连任的新北市长侯友宜11日前往溪州、励行街市场扫街拜票时，巧遇一名摊商的爱犬竟然模仿起“拜票”手势，与侯友宜互动，侯友宜也高喊“冻蒜、冻蒜、冻蒜”、“拜托、拜托、拜托”，画面萌翻众人。侯友宜表示，热情摊商的爱犬竟然也会“拜托拜托”！这到底是谁学谁？