ཀུན་ལ་ཧབ་ཐོབ་ཆེ་བ་མ་ཡིན་ཀྱང་།།
གང་ཞིག་འཐོབ་འདོད་རེ་བ་ཆེ་དྲགས་པས།།
གཞུང་ལུགས་ཡ་མ་ཟུང་ལ་བལྟས་བལྟས་ནས།།
མདོར་དོན་གཅིག་ཏུ་དྲིལ་ན་སྟོང་པ་ཉིད།།

གང་ལ་འགྲོ་སའི་ལམ་བུ་མ་རྙེད་ཅིང་།།
ཅི་ཞིག་འཚོལ་བའི་དམིགས་འབེན་བོར་བའི་བདག།
སྙོམ་ལས་རབ་རིབ་ཅིག་གིས་བཏུམས་བཏུམས་ནས།།
མི་ཚེའི་ཁ་དོག་དེ་ཡང་སྐྱ་བོར་གྱུར།།

བཀླགས་པའི་དཔེ་དེབ་གྲངས་འབོར་མཐུག་ཅིང་ལྗིད།།
བསོགས་པའི་དོན་པོ་ཡང་ཞིང་སྲབ་པ་ཉིད།།
གང་ལ་བསྙབས་ཀྱང་ཕན་འབྲས་མི་རྙེད་པར།།
ཕངས་སེམས་གཅིག་པུ་ཁུར་ནས་འབྲོ་དགོས་བྱུང་།།

ཚིག་དོན་རེ་རེར་མྱུལ་མའི་སྟབས་ཀྱིས་ནི།།
ཞིབ་མོའི་གནད་ལ་འབད་ཅིང་འབུངས་ན་ཡང་།།
གྲོགས་ངན་ལེ་ལོའི་གཤིས་དང་བསྡོངས་ནས་ནི།།
འཇུག་འབྲས་སྙིམ་པ་གང་ཡང་མ་རྙེད་དོ།།

དགའ་བའི་གཏམ་གྱིས་སྙོར་སྐྱོང་མ་བྱས་ཤིང་།།
བརྩེ་བའི་འཛུམ་གྱིས་རམ་འདེགས་མ་གནང་ཚེ།།
ད་ལྟའི་བདག་ནི་རྐྱེན་ངན་གྲོགས་ཤར་གྱི།།
གཞོན་ནུ་ཕུགས་བསམ་ཅན་ཞིག་ཡིན་ནའང་ཐང་།།

                _____    བོད་ཟླ་༩.༢༣ཉིན་སྒྲེ་བོ།

སྟོན།

ཞལ་ཁེབས་མཐོན་མཐིང་གསོལ་བའི་བུ་མོ་དེའི
འོག་འཇུག་ཉི་མར་སྐམ་འདྲའི་ཆུ་འཛིན་དག
གནས་མོ་བུ་ཁྲིད་ཀྱི་ལོ་ཆང་བཏུང་བ་བཞིན
ཡམ་ཡོམ་དུ་རྒྱུ འགྲོ་ཞོར་འདུག་ཞོར་དུ
ཟླ་བ་སྒྲོལ་མ་དང་སྐར་མ་མཚམས་གཅོད་སོཊ་ལ
རེག་ཙམ་དང་ཐུག་ཙམ་རེ་བྱེད

བུ་ཆུང་ཞིག་ལྷུམས་སུ་ཞུགས་སམ་ཅི
ཟོས་ཟོས་པའི་འབྲུ་སྣ་ལྔ་བོ
གསེར་རྩི་ཞིག་དང་སྦྲགས
ཉིན་རེ་བཞིན་ཇེ་མང་དུ་འགྲོ

སྟོན་ག་འདི དབང་ཁོ་ཐག་ནི་སུ་ལའང་མི་དབང

ཕ་བླ་མ་འདྲ་བའི་མགོན་ཞིག་ཡོད། །
མགོན་དེ་ནི་རྫོགས་པའི་སངས་རྒྱས་ཡིན། །
གནས་རྩེ་གཅིག་གུས་པས་གསོལ་བ་འདེབས། །
བྱིན་རླབས་ཀྱི་རྟོགས་པ་འཕོ་ནུས་ཤོག །

རྩོམ་མིང་པས་སོ། །