རྙེད་ན་འབྱོར་དགུ་ཇེ་བས་ཇེ་ཆེ་རུ་བསགས་ཤིང་།།
མ་རྙེད་སྒོ་གསུམ་ཤ་ཐང་ཆད་ཆད་དུ་འབད་དེ།།
གཞན་དོན་བྱེད་མདོག་ངང་ནས་དད་འབུལ་གྱི་ནོར་རྫས།།
བསགས་བསགས་འཆི་ཁའི་དྲན་པ་གཏད་ས་རུ་བཞག་འདུག།

བསྟོད་ན་རང་སྙེམས་རྒྱགས་པའི་མེ་ཆེན་དེ་འབར་ཞིང་།།
སྨད་ན་མི་དགའ་སྐྱོ་གདུང་ཁྲོ་ཚིག་གིས་མནར་བ།།
གང་ལྟར་བྱས་ཀྱང་མི་བདེ་རྣམ་རྟོག་གི་རྦ་རླབས།།
ཐ་མལ་བག་ཡངས་གནས་ལ་རེག་དུས་ནི་མི་འདུག།

—འཇམ་མགོན་མི་ཕམ་རིན་པོ་ཆེའི་གསུང་།

འཛམ་གླིང་བུམ་པའི་རྐང་རྩེད་སྤོ་ལོའི་འགྲན་བསྡུར་གཟབ་རྒྱས་ངང་འགོ་ཚུགས་པ་དང་།་མེ་སྒྲོན་པ་ནི་སྤྲོ་སེམས་དང་།་བརྒྱུད་སྤྲོད་བྱེད་པ་ནི་ཡིད་ཆེས།་མཚོན་པ་ནི་མཉམ་དུ་མ་འོངས་པར་བསྐྱོད་པའི་ཆོད་སེམས་བཅས་ཡིན།སྐབས་འདིར་རྐང་རྩེད་སྤོ་ལོས་ཁྱེར་ཡོང་བའི་སྤྲོ་སྣང་ཁོ་ན་ལོངས་སུ་སྤྱོད་རོགས།世界杯盛大开启，揭幕战即将开踢，尽情享受足球带来的纯粹乐趣吧！

࿑ གོམས་པ་དང་སྒོམ་པ།

འཇམ་དཔལ་སྒྱུ་འཕྲུལ་ཚངས་པ་ལྷའི་མེ་ཏོག །
སྙིགས་འགྲོའི་དཔལ་དུ་བཤེས་གཉེན་ཚུལ་འཆང་བ། །
བཀའ་བབས་བདུན་ལྡན་མདོ་སྔགས་གླིང་པ་རྗེའི། །
རྣམ་རོལ་མཁྱེན་བརྩེ་ཆོས་ཀྱི་རྒྱ་མཚོའི་ཞབས། །

གང་ཡང་ཉོན་མོངས་གཉེན་པོར་བསྒྱུར་ཤེས་སྒོམ། །
ཅིར་ཡང་ཚེ་འདིར་ཞེན་པ་སྤངས་པ་སྒོམ། །
དེ་ཡང་དལ་འབྱོར་རྙེད་དཀའ་ཤེས་པ་སྒོམ། །
ཡང་ཡང་ནམ་འཆི་ཆ་མེད་སེམས་པ་སྒོམ། །

གང་དུ་དམ་ཆོས་དྲན་ན་དེ་རུ་སྒོམ། །
དུས་ཐུང་གྲངས་མང་ཉམས་ལེན་གོམས་པ་སྒོམ། །
ཅིར་སྣང་ཆོས་ཀྱི་སྣང་བར་རྟོགས་པ་སྒོམ། །
བློ་སྣ་བསྟུང་ལ་འདི་སྣང་བསྐྱུར་པ་སྒོམ། །

ཐོས་པ་ཅན་ལ་སྒོམ་པ་མེད་སྙམ་འཁྲུལ། །
སྒོམ་པ་ཅན་ལ་ཐོས་པ་ཆུང་སྙམ་འཁྲུལ། །
སྨྲ་ཤེས་དོན་གོ་དལ་བརྒྱད་འབྱོར་བཅུའི་རྟེན། །
ཡང་ཡང་རྙེད་དཀའ་སྙིང་པོ་ལེན་ལ་རེམ། །

སྒོམ་ཆེན་ང་ཡིན་མཁས་པ་ང་ཡིན་དང་། །
གྲུབ་པ་ང་ཡིན་བྱ་བཏང་ང་ཡིན་སོགས། །
ང་འོ་སྙམ་པའི་ང་རྒྱལ་བསྐྱུང་ཤེས་སྒོམ། །
རང་ཉིད་ཀུན་ཀྱི་ཐ་མར་འཇོག་ཤེས་སྒོམ། །

རྒྱ་ཆེ་རྒྱུན་རིང་ཆོས་ཚུལ་བྱེད་བློ་ཡིས། །
སང་བྱ་གནངས་བྱས་མི་ཚེ་རྫོགས་ཤེས་སྒོམ། །
སྤྲོས་ཆུང་དུས་ཐུང་སྦས་པའི་ཉམས་ལེན་ལ། །
སྣང་མེད་བརྙས་པས་འདི་སྣང་ཚར་ཤེས་སྒོམ། །

འདི་བསྒྲུབ་གན་བསྒྲུབ་འདུན་པས་དུས་ཚོད་ཤོར། །
ངས་བྱེད་ངས་བསྒྲུབ་དམ་བཅས་ལུས་སེམས་མནར། །
རང་ཆེ་རང་མཐོང་རང་འདོད་ལས་ཀྱིས་བྲེལ། །
འདི་མེད་ཕྱི་མེད་བྱེད་འདུག་ཚོར་བ་སྒོམ། །

སྲོག་འཕྲོག་ནད་ཀྱིས་འཇིགས་ཤིང་དངངས་པའི་བུར། །
བརྩེ་བའི་འཛུམ་བཅས་ཚེ་སྲོག་སྟེར་མཁས་མས། །
སེམས་སྐྱེད་དམིགས་མེད་བསྔོ་བའི་སྒོམ་དང་བཅས། །
གསོ་དཔྱད་ལག་ཏུ་ལེན་ཤེས་འཕྲལ་ཕུགས་དགེ །

འདི་ཡང་དམ་པའི་གསུང་གི་རྗེས་འབྲང་སྟེ། །
རང་གིས་རང་ལ་དྲན་སྐུལ་གསལ་འདེབས་ལས། །
རང་མགོ་མི་ཐོན་རོ་མགོར་ལུང་བསྟན་པའི། །
གཟུགས་བརྙན་དེ་འདྲ་མིན་ནོ་སྒོམ་ཆེན་དག །
ཅེས་རྫོང་སར་མཁྱེན་བརྩེ་རིན་པོ་ཆེའི་ཞལ་གདམས་ཚན་པ་ཞིག་ཐོས་པའི་རྐྱེན་བྱས་ཏེ་ཀུན་ཀྱིས་བཏགས་མིང་ལ་བསྟན་རྒྱམ་དུ་འབོད་པ་དེས་དེ་དོན་ཡིད་ལ་བརྣག་བཞིན་འཕྲལ་མར་རང་ལ་སྨྲས་པའོ། །