回復單身的名媛徐綺雯忙得精彩又充實，繼投資珠寶生意，她最近又進軍美容界，並親自做生招牌，獲讚身形及狀態更佳，被朋友力推出寫真！早前承認結束7年婚姻的徐綺雯（Candy），不但繼續模特兒事業、律師樓工作及珠寶生意，最近更投資美容院。她有感時下美容院提供的療程收費過貴：「我嘅概念係收費合理啲，應使得使，幫多啲客人變靚。我哋冇人斟茶、冇靚裝修，情願投資落機器或請專業嘅人手，收費相對平啲。」Candy更體驗生酮減肥、無針埋線等療程，親自做生招牌，她說：「之前因為公幹或者朋友聚會，要去意大利、日本、希臘，順道影咗啲靚相，好多朋友話我靚咗、瘦咗、精神咗，仲講笑叫我出寫真。出寫真我冇興趣，反而鍾意同人分享健康之道，健康美好緊要，唔係話某個部分大就係靚，均勻先係關鍵。」至於感情生活有否着落，她笑說：「我要拍廣告、返律師樓、搞生意兼周圍飛，又要抽時間做運動，每日時間排到密麻麻，要追我嘅話，真係要睇吓我個時間表先，哈！女人唔一定有拖拍先至叫做幸褔開心，識得錫自己、自我增值、有自信同健康先至矜貴。緣分唔使強求，真命天子要嚟，點擋都擋唔住！」

選美盛事《#2019香港小姐競選#》在日本進行第二天外景拍攝，愛美的佳麗都有愛吃的一面，到埗後忍不住大吃大喝，要拉筋及狂做運動減肥。她們又去了《寵物小精靈》主題餐廳拍攝，與「比卡超」親密接觸！港姐大隊 7月24日啟程去東京進行七天外景拍攝，15名候選港姐分兩批在各區拍攝，25日其中10位佳麗先到東京車站取景。大熱佳麗黃嘉雯和楊詠彤齊齊受訪，楊詠彤表示25日晨去了主題餐廳拍攝，令黃嘉雯大感羨慕：「我好鍾意比卡超，冇得去好失望！」今日會去築地拍攝的她笑言應該跟楊詠彤交換行程：「佢好鍾意食刺身！」曾任職空姐的楊慧敏之前經常飛東京，對當地市中心非常熟路，由她向佳麗介紹地方特色。她同樣去了主題餐廳拍攝，大表興奮：「係我同哥哥嘅童年回憶，我攞咗啲紀念品，到時可以同哥哥分享！」日本出名多美食，選美卻要保持苗條身段，她坦言：「都有掙扎，不過覺得日本菜唔係好肥同油膩，而且我每晚都拉筋同做瑜伽。」同場的古佩玲（Kelly）和廖倬竩話題離不開「食」，Kelly說：「日本有好多美食，但都要忍口唔食咁多，因為要保持身形。」廖倬竩表示去過日本三、四次，主要是食和買，大會建議身形略胖的她減肥，問到如何面對美食誘惑？她坦言：「雖然依家要Keep Fit，但見到啲好想食嘅嘢都會食少少，唔擔心減唔切肥，一路食一路減，自己有做運動。」記者笑言她應與其他佳麗分享美食，這樣就可以一齊肥，她笑說：「大家有Share零食，但都係啲健康零食，其實減肥唔難，最緊要減糖戒糖。」又指此行有把握時間買零食。

【新闻】#关智斌[超话]##关智斌头顶有角#
2019-12-10 少男變熟男！關智斌嘆瘦底爆肌唔容易
早前完成首個紅館演唱會的關智斌（Kenny）今日（10日）推出全新個人廣東單曲《頭頂有角》。今次MV Kenny加入了很多自己的想法，他說：「歌詞講無論你幾咁古怪、點同人哋唔同都好，都要be yourself，勇敢去做好自己，可能你最古怪嘅就係你最可貴嘅嘢。MV入面嘅肢體動作、animation、graphic都落足心思，冇預先排好嘅舞蹈，完全係即興。」首歌feat. SHIMICA，即使rapper SHIMICA的舞蹈也不例外，完全FreeStyle。

說到蛻變，由BOYZ出道至今他自覺幸運，在成長過程中，得到很多人提攜、照顧，他說：「『BOYZ』嘅時期最無憂無慮；依家做『MAN』必須要獨立、自主，要肩負更多責任，雖然負嘅責任多咗，但完全唔覺得係負累，反而從成長過程中嘅經驗累積令我更快樂。」

由少男變成熟，他更被形容為爆肌型男，他說：「其實一個瘦底嘅人要增肌，係比一個要減肥嘅人更難。減肥只需減食同做運動就可輕易達標，但瘦底嘅人係要食好多唔同，又唔係太好食嘅嘢加上大量運動同操練先可以增肌肉，所以話『瘦底要爆肌係好難㗎』，不過都係嗰句，要達到目標就要付出100%嘅努力，唔懶得㗎。」

原文链接：https://t.cn/AieroSdf