#噶举祖庭一洛卓沃龙寺[超话]#

࿐རྡོ་རྗེ་འཆང་གི་བཀའ་ལས་ལྷག་པ་སུ་ལའང་མི་འབྱུང་བས། རྟོག་གེའི་དྲན་རྐྱེན་གྱི་བཤད་པ་དང་། ལྷ་འདྲེའི་ཐོལ་བྱུང་གི་མན་ངག་ཧལ་ཧོལ་ལ་ཡིད་མི་རྟོན་པར་མཚན་ཙམ་ཡང་ཐོས་པར་དཀའ་བའི་རྒྱུད་སྡེ་རིན་པོ་ཆེ་སངས་རྒྱས་ཀྱི་ཉེ་ལམ་རྡོ་རྗེ་འཆང་གི་གསང་ཚིག་འདི་རྣམས་སྤྱོད་པའི་སྐལ་བ་བཟང་པོ་འདི་ལྟ་བུ་དང་ལྡན་པའི་སྐབས།ཉམས་རྟོགས་ཇི་བཞིན་མ་སྐྱེས་རུང་འབྲེལ་འཇོག་ཙམ་རེ་བྱུང་ནའང་ལྟར་སྣང་གི་དགེ་བ་མི་ཚེ་གཅིག་ཏུ་བྱས་པ་ལས་ཀྱང་དགའ་བ་སྔོན་གྱི་མཁས་གྲུབ་ཆེན་པོ་རྣམས་ཀྱི་རྡོ་རྗེའི་ཚིག་ངེས་པ་ཅན་ཡིན་ནོ། །
____________སྒྲུབ་བརྒྱུད་སྐྱེ་སྔ་རིན་པོ་ཆེས་སོ། །

࿐སྐྱེས་མཆོག་སྒྲ་སྒྱུར་གྱི་རྒྱལ་པོ་མར་སྟོན་རྡོ་རྗེ་འཆང་གི་ཆེ་བ་བརྒྱད།

མཛད་པ་པོ།

ཀུན་མཁྱེན་བསྟན་པ་རབ་རྒྱས།

བཀའ་བརྒྱུད་ཀྱི་བསྟན་པའི་ཤིང་རྟའི་སྲོལ་འབྱེད་ནི་གངས་ཅན་ན་ཆེ་བའི་༧མར་སྟོན་རྡོ་རྗེ་འཆང་ཆོས་ཀྱི་བློ་གྲོས་ཡིན་ཞིང་། ཁོང་ནི་ཆེ་བ་བརྒྱད་ལྡན་ཡིན་པས།

༡༽ དང་པོ་ཡོངས་གྲགས་ཆེ་བའི་ཕུལ་བྱུང་གི་རྒྱ་གར་གྱི་པཎ་ཆེན་ལ་དངོས་སུ་གཏུགས་པའི་ཆེ་བ།
༢༽ གཉིས་པ་རྩོད་མེད་ཀྱི་རྒྱུད་སྡེ་རྒྱ་མཚོ་ལྟ་བུར་བརྟེན་ནས་ཐོས་སྒོམ་ཟུང་འབྲེལ་གྱི་སྒོ་ནས་ཐོས་སྒོམ་མཐར་ཕྱིན་པའི་ཆེ་བ།
༣༽ གསུམ་པ་སྐུ་ཚེ་དེ་ལ་དག་པའི་སྒྱུ་ལུས་གྲུབ་ནས་སངས་རྒྱས་པའི་ཆེ་བ།
༤༽ བཞི་པ་བཤད་སྒྲུབ་ཀྱི་ཕྱོགས་སོ་སོར་བཀའ་བབ་པའི་མཁས་ཤིང་གྲུབ་པ་བརྙེས་པའི་སློབ་མ་ངོ་མཚར་ཅན་མང་དུ་འཕེལ་བའི་ཆེ་བ།
༥༽ ལྔ་པ་རྒྱུད་སྡེའི་བཅུད་ཀྱི་མན་ངག་ངོ་མཚར་བ་རྣམས་ཟུར་དུ་ཕྱུང་སྟེ་སྐལ་ལྡན་གྱི་སློབ་མར་སྐྱེས་སུ་བཞག་པའི་ཆེ་བ།
༦༽ དྲུག་པ་གངས་ཅན་གྱི་གསང་སྔགས་གསར་མའི་རྒྱུད་སྡེའི་ཁུངས་ཚད་ལྡན་ཕལ་ཆེར་ཁོང་རང་ཉིད་ལ་ཐུག་པའི་ཆེ་བ།
༧༽ བདུན་པ་ཁོང་རང་ཉིད་ཀྱི་མན་ངག་ཟབ་མོ་དག་ཁུངས་མེད་རྡོལ་ཆོས་ཀྱིས་མ་བསླད་པའི་ཆེ་བ།
༨༽ བརྒྱད་པ་བརྒྱུད་པ་གཞན་འཛིན་པ་ཕལ་ཆེ་བ་དག་གིས་དབང་བཞི་གདན་ཐོག་གཅིག་ཏུ་བསྐུར་བ་ལས་ཁོང་ཉིད་ཀྱི་ནང་མཆོད་ཀྱི་བདུད་རྩིའི་རོ་མྱོང་བ་བྱིན་རླབས་ཆེ་བའི་ཆེ་བའོ། །

དེ་ལྟ་བུའི་བཀའ་བརྒྱུད་པའི་ཤིང་རྟའི་སྲོལ་འབྱེད་ཆེན་པོ་དེ་ལ་དེའི་བརྒྱུད་འཛིན་ཏུ་རློམ་པའི་དེང་དུས་ཀྱི་བཀའ་བརྒྱུད་པའི་མིང་ཅན་མང་པོ་ཞིག་གིས་བཀུར་བསྟི་འོས་འཚམས་ཤིག་ཤེས་ཀྱི་མེད་དོ།།

࿐ གུས་ཞབས་དང་བཟོད་སྒོམ་ནི་སྤྱི་ཚོགས་ནང་འཛུལ་བྱེད་ཀྱི་ལྡེ་མིག་ལྟ་བུ་དང་། ཤེས་ཡོན་དང་ཡིད་ཆེས་ནི་སྤྱི་ཚོགས་སྟེང་བྱ་བ་སྒྲུབ་བྱེད་ཀྱི་ལག་ཆ་ལྟ་བུ་ཡིན། མ་ཟད། དུས་རབས་འདིས་ང་ཚོའི་ཁོར་ཡུག་ནང་གསར་དུ་བསྐྲུན་པའི་ལམ་ཀ་ཞིག་ཀྱང་ཡིན།