རྡོ་རྗེ་བདུད་འཇོམས་རྒོད་ལྡེམ་ལེགས་ལྡན་རྗེ།།
ངག་གི་དབང་པོའི་ཡང་སྲིད་དེ་མ་ཐག།
རིག་འཛིན་ཆེན་པོ་པདྨ་འཕྲིན་ལས་ལ།།
གསོལ་བ་འདེབས་སོ་བྱིན་རླབས་ཆར་དུ་སྙིལ།།
༢༠༢༢/༡༡/༢༦ཉིན། སྨན་ཆར་གྱིས།

༡༣ སྣ་ནམ་ཡེ་ཤེས།
#莲师[超话]#

སྒྲ་བསྒྱུར་ལོ་ཙཱའི་མཆོག་ཏུ་རབ་ཕྱིན་ཅིང་། །མཁའ་ལྡིང་རྒྱལ་པོའི་བརྟུལ་ཞུགས་འཛིན་པ་ཡིས། །ནམ་མཁའི་ལམ་ནས་གྱ་གྱུར་གཤེགས་མཛད་པ། །སྣ་ནམ་ཡེ་ཤེས་སྡེ་ལ་གསོལ་བ་འདེབས། །གྲུབ་ཆེན་རྗེ་འབངས་ཉེར་ལྔའི་ཡ་གྱལ། ཀཻ་ལ་ཤ་ཡི་ལྗོངས་འདིར་སྒྲ་བསྒྱུར་ཡོངས་ཀྱི་རྒྱལ་པོ་བཻ་རོ་སྐ་ཅོག་ཞང་གསུམ་གྲགས་པའི་ཞུ་ཆེན་གྱི་ལོ་ཙཱ་ཆེན་པོ་ཡེ་ཤེས་སྡེ་ནི། ཕྱི་ལོ་ལྟར་བརྒྱ་ཕྲག་བརྒྱད་པའི་ནང་ལ་སྣ་ནམ་གྱི་རིགས་སུ་སྐུ་འཁྲུངས། མཁན་ཆེན་ཐམས་ཅད་མཁྱེན་པ་ཞི་བ་འཚོ་ལས་ངེས་པར་འབྱུང་བ་ཚུལ་ཁྲིམས་ཀྱི་སྡོམ་པ་ནོད་ནས་འདུལ་འཛིན་གྱི་དབང་པོར་བཞུགས། མཁན་སློབ་ཀྱི་དྲུང་ནས་ལེགས་སྦྱར་གནས་ལ་སྦྱང་པས་མི་རིང་བར་སྒྲ་རིག་རྒྱ་མཚོའི་དབུས་སུ་བློ་གྲོས་ཀྱི་ཆ་ཤས་ཡོངས་སུ་རྫོགས་པས་སྒྲ་མཁན་གདོང་དྲུག་ཀྱང་མི་སྨྲའི་བརྟུལ་ཞུགས་ལ་གནས། ཁྱད་པར་ཨོ་རྒྱན་སངས་རྒྱས་གཉིས་པའི་དྲུང་ནས་དཔལ་ཆེན་རྡོ་རྗེ་ཕུར་པའི་ཆོས་བཀའ་རབ་འབྱམས་ཞུས་ནས་བསྒྲུབ་པས་གྲུབ་ཅིང་ཕུར་པའི་བཀའ་བབས་ཆེན་པོར་བཞུགས་པས་ཕུར་པ་སྣ་ནམ་ལུགས་ཅེས་དར་ཁྱབ་ཆེན་པོ་བྱུང་། སྟོང་ཆེན་སྒེག་མོའི་ལྷ་ལམ་གྱི་ངོགས་སུ་བཞེངས་པ་དང་། བཞུགས་པ་དང་། འཆག་པ་སོགས་སྤྱོད་ལམ་བཞི་ཡི་ཟློས་གར་བསྒྱུར་བ་སོགས་གྲུབ་པའི་མཚན་མའང་མཐའ་ཡས་སྟོན་པར་མཛད་དེ། སྣ་ནམ་ཡེ་ཤེས་མཁའ་ལ་བྱ་ལྟར་ལྡིང༔ ཞེས་དང་། གཞན་ཡང་། སྒྲ་བསྒྱུར་བམ་གཉིས་ལས། ལོ་ཙཱ་བ་མཁས་པར་ཆུད་པ་ཛྙཱ་ན་སེ་ན་ཞེས་སོགས་མདོར་ན་མཁས་གྲུབ་དམ་པའི་ཕ་རོལ་ཏུ་སོན། རྒྱལ་བའི་བཀའ་དང་དེ་དག་གི་དགོངས་འགྲེལ་ཐུན་མོང་དང་ཐུན་མིན་གྱི་རིག་གནས་མང་པོ་བསྒྱུར་བར་མཛད། མཁས་གྲུབ་ལོ་ཆེན་ཉིད་ཀྱིས་མཛད་པའི་བསྟན་བཅོས་མང་དུ་ཡོད་པར་གྲགས་ཏེ། ད་ལྟའང་དྷ་ཏི་རྒྱས་འབྲིང་བསྡུས་གསུམ་ལ་བརྟེན་པའི་ཡིག་སྣ་ཅི་རིགས་ཡོད་པར་སྣང་ངོ་། །འདིས་མཛད་པའི་བསྟན་བཅོས་ནི། ལྟ་བའི་ཁྱད་པར། བམ་པོ་གཅིག་དང་ཕྱེད། ལྟ་བའི་ཁྱད་པར་དེའི་དྲན་བྱེད། བཟང་པོ་སྤྱོད་པའི་འགྲེལ་བ་བཞིའི་དོན་བསྡུས་པ། འཇིག་རྟེན་ཕ་རོལ་སྒྲུབ་པ། དགོངས་པ་བཞི་དང་ལྡེམ་དགོངས་བཞིའི་བརྗེད་བྱང་སོགས་ཡོད་པར་གསུངས་སོ། ། https://t.cn/R2WxDGB

༡༢ སོག་པོ་ལྷ་དཔལ།#莲师[超话]#
ཛྙཱ་ན་ཀུ་མཱས་གྲུབ་པའི་སྒྱུ་འཕྲུལ་གྱིས། །རྗེས་སུ་བཟུང་བས་ཐེག་མཆོག་མཛོད་དུ་གྱུར། །བརྟུལ་ཞུགས་གཅན་གཟན་གདུག་པའི་གཉའ་ནས་འཛིན། །དཔལ་གྱི་ཡེ་ཤེས་ཞབས་ལ་གསོལ་བ་འདེབས། །ཞེས་པའི་གྲུབ་ཆེན་སོག་པོ་དཔལ་གྱི་ཡེ་ཤེས་ནི། ཡུལ་ཡར་འབྲོག་ཏུ་སྐུ་འཁྲུངས་ཤིང་། སློབ་དཔོན་ཆེན་པོའི་དུས་ནས་དངོས་གྲུབ་བརྙེས་ཚར་བ་གཅིག་ཐུན་མོང་གི་སྣང་ངོར་མགར་བའི་ཚུལ་དུ་བཞུགས་ཀྱང་ཟེར། དེ་ལ་གཉགས་ལོ་ཆེན་པོ་མཁྱེན་པ་ཤིན་ཏུ་རྒྱ་ཆེ་བས་སློབ་དཔོན་རྣམས་ལས་རང་ཉིད་མཁས་སྙམ་པའི་ང་རྒྱལ་གྱི་རྟོག་པ་ལན་གསུམ་སྐྱེས་པའི་ཉེས་པས་སྲོག་ལ་བབ་པའི་སྐུ་དགྲ་ལན་གསུམ་བྱུང་། དེ་དག་བཟློག་པའི་གྲོགས་སུ་སློབ་དཔོན་བཱི་མ་ལས་མངོན་སྤྱོད་ཀྱི་མཚན་དང་ལྡན་པའི་གྲོགས་ཤིག་རྙེད་དགོས་པ་ལུང་དུ་བསྟན་པ་ལྟར་འཚོལ་དུ་བྱོན་པ་ན། སོག་པོ་བེག་ཙེ་བྱ་བ་མི་ཁྲོ་བོའི་དབྱིབས་སུ་ཡོད་པ་གཅིག་རྙེད། དེའི་མགོ་བོ་རྒྱ་མདུད་དུ་འདྲིལ་ཞིང་། རོ་སྨད་ཟུར་གསུམ་པའི་རྣམ་པར་ཤར་བ་ལ་སོགས་པའི་མཚན་རྟགས་ཐམས་ཅད་ཚང་བར་གཟིགས། གཉགས་ཀྱིས་ཁོས་མགར་བྱེད་པའི་སྦུད་པ་འབུད་གྲོགས་མཛད་ཀྱིན་མཚན་ཉིད་ཐེག་པའི་ཆོས་བཤད་པས་ཁོའི་རྣ་ལམ་དུ་མ་སོང་། ཕྱི་རྒྱུད་སྡེ་གསུམ་བཤད་པས་རེས་འགའ་ཉན་ཞིང་གཞན་ཐོ་བ་ཆེམས་ཆེམས་བརྡུང་། ནང་རྒྱུད་སྡེ་གསུམ་བཤད་ཀྱིན་ལྕགས་ཀྱི་ལྕུག་མ་སྟོར་པ་རྣམས་ཁྱུར་མིད་བྱས་པས་ཁོ་ཡ་མཚན་སྐྱེས་ཏེ་འདི་ལྟ་བུའི་རྫུ་འཕྲུལ་ཅི་ལས་བྱུང་ཟེར། ད་ལྟ་བཤད་པའི་ཆོས་དེ་ཉམས་སུ་བླངས་པ་ལས་བྱུང་སྨྲས་པས། ཁོ་ཤིན་ཏུ་དད་དེ་ལག་ཆ་ཐམས་ཅད་ཕུལ་ནས་སློབ་མར་བྱས། རྗེས་སུ་བཟུང་ནས་ལྷ་དཔལ་གྱི་ཡེ་ཤེས་སུ་མིང་སྤོས། ཕྱིས་ཤིག་གཉགས་དམར་གྱིས་ཕ་སྤུན་གྱི་མི་ཤ་འཁོན་དུ་བྱས་ནས་སློབ་དཔོན་བཙོན་དུ་བཟུང་། སོག་པོ་དཔལ་ཡེ་པས་བླ་མའི་ཆེད་དུ་ལུས་སྲོག་འདོར་ཕོད་པའི་རྡོ་རྗེའི་དམ་ཚིག་གཉན་པོ་ལ་དགོངས་ཏེ་བཙོན་སྲུང་གཉིས་བཀུམས་ནས་སློབ་དཔོན་བཙོན་དོང་ལས་སྤྱན་དྲངས་པ་སོགས་སྐུ་དགྲ་ལན་གསུམ་བཏུལ། སློབ་དཔོན་ཐུགས་ཤིན་ཏུ་དགྱེས་པས་རྡོ་རྗེ་ཕུར་པའི་དཀྱིལ་འཁོར་དངོས་སུ་སྤྲུལ་ནས་རྗེས་སུ་བཟུང་ཞིང་སྨིན་གྲོལ་རྒྱུད་བཤད་ཀྱི་གདམས་པ་མཐའ་དག་བསྩལ། ཕྱིས་སུ་གཉགས་ལས་གསན་པའི་ཆོས་བཀའ་མཐའ་དག་གནུབས་ཆེན་ལ་གནང་བ་བཅས་ཕྲིན་ལས་མཐར་རྒྱས་ངང་སྐུ་གཤེགས་སོ། ། https://t.cn/R2WxDGB