སྟོན་མཇུག་གི་མྱ་ངམ་ལས་མེ་སྟག་མཆེད
ལོ་མ་སེར་པོ་རེ་རེས་འཆི་བའི་ཟློས་གར་འཁྲབ
རྩྭ་ཐང སྔར་བཞིན
རྩྭ་ཡང་གི་མིའང་སྔར་བཞིན
ཚོད་ཚོད་ལ་འབབ་སྲིད་པའི་མཐོ་སྒང་གི་ཁ་བ
ཚོད་ཚོད་ལ་ཞུའང་ནུས་པས
སྟོན་མཇུག་འདིའི་འཁྲེང་ཞེན་གྱི་མིག་ཆུ
གང་དུ་གཏོར་ཨང

ཨ་རི་དང་ཨི་རན་བར་གྱི་རྐང་རྩེད་པོ་ལོའི་རྒྱལ་ཕམ་འགྲན་བསྡུར་དེ་ནི་དཀྱེལ་ཡངས་ཀྱི་སྙིང་སྟོབས་ཤིག་གི་ཁྲོད་དུ་འགོ་བཙུགས་པ་མ་ཟད་མཛའ་སེམས་ཀྱི་འོད་མདངས་ཤིག་གི་ཁྲོད་དུ་མཇུག་སྒྲིལ་སོང་།

ཨ་རི་དང་ཨི་རན་བར་གྱི་རྐང་རྩེད་པོ་ལོའི་རྒྱལ་ཕམ་འགྲན་བསྡུར་དེ་ནི་དཀྱེལ་ཡངས་ཀྱི་སྙིང་སྟོབས་ཤིག་གི་ཁྲོད་དུ་འགོ་བཙུགས་པ་མ་ཟད་མཛའ་སེམས་ཀྱི་འོད་མདངས་ཤིག་གི་ཁྲོད་དུ་མཇུག་སྒྲིལ་སོང་བས། བསམ་ཚུལ་ཙམ་གྱིས་དོན་དངོས་ལ་ཆོད་སྡོམ་མ་འཇོག་ཅེས་གསུངས་པ་ཅི་མ་བདེན། ཕྱི་རོལ་ཡུལ་གྱི་འཇིག་རྟེན་འདི་ཉིད་ཞེ་འཁོན་དམར་ཤེད་ཅན་དང། གུ་དོག་ཐ་ཤལ་ཅན། ཞེན་འགོག་ཐལ་མཐའ་ཅན་ཚོས་བསམ་པ་ལྟར་གྲུབ་མེད་པ་ར་སྤྲོད་གསལ་བོར་ཐུབ་སོང་བས། ཕྱོགས་གཉིས་ཀའི་རྐང་རྩེད་པོ་ལོའི་རུ་ཁག་གི་དཀྱེལ་ཡངས་ཀྱི་སྙིང་སྟོབས་དང་། ཆེད་ལས་ཀྱི་བྱང་ཚད། ཆེད་ལས་ཀྱི་རྩ་དོན། ཞི་མཐུན་གྱི་མཛའ་སེམས་སོགས་ལ་གུས་བཀུར་ཞུ་རྒྱུ་མ་ཟད། ད་རེས་ཀྱི་འགྲན་བསྡུར་ཐོག་རྣམ་པར་རྒྱལ་བའི་ཨ་རིའི་རྐང་རྩེད་པོ་ལོའི་རུ་ཁག་འདི་ཉིད་འགྲན་རིམ་རྗེས་མའི་ནང་ཡག་ཐོག་ཡག་བརྩེགས་ཀྱི་འགྲུབ་འབྲས་བཟང་པོ་འཐོབ་ནས་ལོ་རྒྱུས་ཀྱི་ཟིན་ཐོ་གསར་པ་གཏོད་ཐུབ་པ་དང་། འགྲན་སྟེགས་ཐོག་ཕམ་ཉེས་བྱུང་བའི་ཨི་རན་རྐང་རྩེད་པོ་ལོའི་རུ་ཁག་འདི་ཉིད་སྐབས་རྗེས་མའི་འཛམ་གླིང་བུམ་པའི་རྐང་རྩེད་པོ་ལོའི་གར་སྟེགས་ཐོག་སླར་ཡང་མཇལ་བའི་སྨོན་འདུན་གྲངས་མེད་ཞུ། ལྷག་པར་དུ་གཞན་དབང་སྡུག་གི་ན་ཟུག་ཚད་མེད་མྱོང་བཞིན་པའི་ཨི་རན་མི་དམངས་སྤྱི་དང་ཡང་དགོས་སུ་གནམ་བསྐོས་ལས་ཀྱི་གཉའ་གནོན་དང་དམར་ཤེད་བཙན་གྱི་མནར་གཅོད་ཚད་མེད་མྱངས་དང་མྱོང་བཞིན་པའི་ས་གནས་དེ་ཀའི་བུད་མེད་རྣམས་གང་མྱུར་རང་བསྐོས་ལས་ཀྱི་འཚོ་ལམ་ཞིག་བརྙེད་ནས་ཞི་བདེ་དང་། རང་དབང། འདྲ་མཉམ། དྲང་བདེན་སོགས་དུས་རབས་ཉེར་གཅིག་པའི་རྫོགས་ལྡན་གྱི་དཔལ་ཡོན་ལ་རོལ་ཐུབ་པའི་སྨོན་འདུན་སྙིང་ཁོངས་རུས་པའི་གཏིང་ནས་ཞུ།