མཐོ་བོད་བཙན་པོའི་རུ་དཔུང་དམག་སྡེ་ལ་བསྔགས་པ་ངག་རིག་དབྱངས་ཀྱི་རླབས་སྒྲ།

རྟ་མཆོག་རྒོད་པོས་རྨིག་པའི་ཐག་སྒྲས་ནོར་འཛིན་ལྟོ་བ་འཁུན་ཞིང་འདར། །
དཔའ་བོའི་ཀི་སྒྲས་གནམ་ས་བསྒུལ་བས་གཤིན་རྗེའི་གྲོང་ལ་བག་ཡོད་སྦྱིན། །
བར་བར་ཁྲག་གི་ལྡེང་ཀ་འཁྱིལ་བར་ལྦུ་བ་གསར་བའི་གདུགས་དཀར་ཕུབ། །
རྒོད་པོ་དཔུང་གིས་སྤྲིན་དཀར་འདབས་ནས་སྡེར་མོ་གདེངས་ཤིང་གཤོག་པ་རྡེབ། །

ལྷ་མིན་རྒྱལ་བོའི་གོ་ཁྲབ་སིལ་སྒྲས་གྱ་གྱུའི་འགག་འཕྲེང་འཕྲེད་ཀྱིས་བཅད། །
སྲིད་པའི་ས་ཆེན་ཡོམ་ཡོམ་སྒུལ་ཞིང་ལྟ་བ་མིག་གིས་མི་བཟོད་ཅིང་། །
དཔའ་བོའི་ཕྱག་གིས་རལ་གྲིའི་གཟི་འོད་ལན་གཅིག་ཕས་རྒོལ་ཝ་སྐྱེས་བཞིན། །
ངེས་མེད་འཁོར་བའི་རི་གྲོང་འདི་ནས་མཛའ་བ་གསེར་གྱི་དར་ཐག་བརྐྱངས། །

ཤར་ནུབ་སུམ་ཉིས་ས་ལ་དབང་བསྒྱུར་འཇིག་རྟེན་བྱེད་པོ་མ་ཡིན་ནམ། །
ལུགས་གཉིས་བསྟན་པའི་སྲོག་ཤིང་འཛུགས་བཞིན་ལན་རེ་ཁྱོད་ནི་ཐུབ་པའོ། །
བརྩེ་བའི་ཕྱོགས་ལྷུང་སྤྱོད་པ་དོར་ཏེ་གཤིན་རྗེའི་རྒྱ་མ་སྐེད་ལ་དྲངས། །
ལ་རྒྱའི་རུ་དར་མཁའ་རུ་བསྒྲེངས་ཏེ་ཕྱོགས་བཞིའི་རྒྱལ་ཕྲན་ཆམ་ལ་ཕབ། །

ཁྱེད་ནི་མུན་པའི་གླིང་བཞི་བསལ་བའི་ཡིད་འོང་ཀུན་གསལ་བྱེད་པོ་ཡིན། །
ཐུབ་བསྟན་ཕུན་ཚོགས་ཨ་གར་ལྗོན་ཤིང་དུག་ལྔའི་བུ་ལ་སྨན་ཆབ་གསོལ། །
རྒྱལ་ཐབས་ཆེན་པོ་སེང་གེའི་ཁྲི་འཕང་ཚངས་པའི་འགག་མེད་རྡོ་རྗེའི་དབྱངས། །
གང་གི་སྒྲ་འཛིན་ཕང་བའི་དཀྱིལ་ཏུ་དལ་གྱིས་འཇགས་ཏེ་འདུད་པར་རྩོམ། །

ད་ནི་ཡངས་བའི་རྩྭ་ཐང་དཀྱིལ་ཏུ་རྟ་མཆོག་བང་རྩལ་རླུང་ལ་འགྲན། །
ན་ཆུང་རི་སྐྱེས་མེ་ཏོག་བཞིན་དུ་ཁྱེད་ཀྱི་དྲུང་དུ་འཛུམ་ཞིང་རྩེན། །
བསྟོད་པའི་གྲགས་སྙན་དཀར་པོ་རིང་སོང་ཚངས་པའི་རྣ་བ་རབ་ཏུ་སྙེམ། །
ཁྱོད་ཀྱི་ཞབས་སེན་ཟླ་བའི་ཅོད་པན་ས་སྐྱོང་རྣམས་ཀྱི་སྤྱི་བོར་བསྙེན། །
༢༠༢༣/༤/༨ ལའོ།།[鲜花][太阳]

སྐད་བརྡའི་རྒྱུན་ཐག་ཆད་ཚུལ།། ད་ལྟའི་གནས་བབ་ནི་ཏག་ཏག་་རྒྱུད་ཐག་ཆད་ལ་ཁེད་པའི་དུས་ཡིན་ཏེ། ཕ་མ་ཚོའི་རྨང་གཞི་ཞན་པ། བུ་ཕྲུག་གི་སློབ་སྦྱོང་ཁོར་ཡུག་གཞན་སྐད་ཁྱབ་གདལ་ཆེ་བས། རང་སྐད་མི་ཤེས་ཤིང་གཞན་སྐད་ལ་ཤིན་ཏུ་བྱང་བའོ།། 语言的活力，语言的代际传承

མདོ་སྡེ་རྒྱན་ལས།
བཤེས་གཉེན་དུལ་བ་ཞི་བ་ཉེར་ཞི་བ། །
ཡོན་ཏན་བརྩོན་བཅས་ལྷག་པར་ལུང་གིས་ཕྱུག །
དེ་ཉིད་རབ་ཏུ་རྟོགས་པ་སྨྲ་མཁས་ལྡན། །
བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །ཞེས་གསུངས།