རང་བཞིན་བསམ་པ་དྲང་ན་བཟང་མོད་ཀྱང་།།
ཧ་ཅང་དྲང་ན་དུས་ངན་མི་རྣམས་ཀྱིས།།
རྩེད་དགོད་བྱེད་རྟེན་སྤྲང་བོའི་སྤྲེའུ་འདྲ།།
རང་ཚོད་རན་པར་འཛིན་པ་སྙིང་གཏམ་ཡིན།།
࿐ཐུའུ་བཀྭན་ཆོས་ཀྱི་ཉི་མས། #名言#

࿐སྐྱེ་མི་འདོད་པའི་མེ་ཏོག་ཁྱིམ་ནས་རྨོས་རུང་སྐྱེ་དཀའ་ལ། སྐྱེ་འདོད་པའི་མེ་ཏོག་བྲག་བར་ཡིན་རུང་མཛེས་སྡུག་དང་ལྡན་པར་སྐྱེ། མི་རྣམས་ཀྱིས་ཀྱང་རང་གིས་བསྒྲུབ་པར་འདོད་པའི་བྱ་བ་དག་ལ་ནམ་ཡིན་ཡང་དུས་ཚོད་དང་ཐབས་བཀོད་ཡོད། བསྒྲུབ་མི་འདོད་ན་རྣམ་པ་སྣ་ཚོགས་ཀྱི་ཁ་བཙལ་ས་རེ་ཡོད།
不想生长的花，即使在温暖的家中养植也难生长，
想生长的花在石缝中也能完美的生长。
我们人也是，自己想做的任何事，随时有时间和精力，还有方法，如果不太意乐的事，随时有各种理由。

———嘎绒泽仁

࿐ དེ་རིང་ཀྲེ་ཅང་ཚི་ཞེས་༼ 慈溪 ༽གྲོང་ཁྱེར་ན་ཡོད། ཕྱི་དྲོའི་ཆུ་ཚོད་བེད་སྤྱད་དེ་སྦྱིན་བདག་འགའི་འགྲོ་རོགས་དང་བསྟུན་ནས་ས་དེ་གའི་ཡུལ་ལྗོངས་སྐོར་ཅིག་ལ་སྤྲོ་འཁྱམ་དུ་སོང་བ་ཡིན།

གྲོང་ཁྱེར་འདིའི་ཐོན་སྐྱེད་གྲགས་ཆེན་གྱི་བཤམས་སྟོན་ཁང་དུ་འདམ་བཟོས་རྒྱུ་ཆ་ཡིན་པས་རྫ་མ་སྣ་ཚོགས་ཀྱི་བྱུང་རིམ་དང་འབྲེལ་བའི་ལོ་རྒྱུས་མཚམས་སྦྱོར་ཧ་ཅང་ཡག་པོ་ཞིག་བྱས་འདུག་པས་བཀའ་དྲིན་ཤིན་ཏུ་ནས་ཆེ།

ད་དུང་ལོ་ངོ་སྟོང་གཅིག་དང་བཞི་བརྒྱ་ལྷག་གི་ལོ་རྒྱུས་ཡོད་པས་ཅིན་ཧྲན་དགོན་པ་༼ 金仙寺༽་དང་དེའི་ཉེ་འདབས་ཀྱི་གནའ་བོའི་གྲོང་བརྡལ་དག་གི་ཕྱི་ནང་བཀོད་པར་ཞིབ་ཚགས་ལྡན་ལ་རང་བྱུང་གི་འཁོར་དང་ལྷན་སྐྱེས་སུ་ཡོད་པ་ལྟ་བུའི་ཚོར་སྣང་ཞིག་ངང་གིས་སྐྱེས་ཡོང་།

མི་རིགས་གང་ཞིག་ཡིན་ན་ཡང་དེངས་རབ་གྱི་ཚན་རྩལ་ལས་བྱུང་བའི་ཕྱི་ནང་གི་བཀོད་པ་ལས། གནའ་བོའི་ཁྱད་ཆོས་དག་གི་གྲ་མ་ཉམས་ཤིང་གྲུ་མ་ཆག་པའི་བཟོ་བཀོད་ལ་རིན་ཐང་ཆེན་པོ་འདུག་པར་བསམ།

ད་དུང་སྐབས་དེའི་འཚོ་བ། མི་གཤིས། མཛའ་བརྩེ། འབད་བརྩོན་སོགས་གང་ཅིའི་ཐད་ལ་ཕྱི་དྲན་དང་རྒྱུས་ལོན་རག་ཙམ་རེ་བྱེད་ཐུབ་པ་བྱུང་།

ཁོར་ཡུག་དེ་དག་ལ་ཞེན་ཆགས་ཆེ་བའི་ལོ་ལོན་རྒ་རྒས་དག་འཚེར་ཤུལ་རྙིང་པ་དེར་ཉི་མར་ལྡེ་ནས་མེས་པོ་དག་གི་དེབ་ཐེར་བཀླགས་པ་ལས།

ལས་འབྲས་དང་དྲིན་བཟོ་མི་ཤེས་པའི་དེངས་རབ་གྱི་ན་གཞོན་
ཕོ་མོ་ཚོའི་རྣམ་ཤེས་ཀྱི་ཟུར་ཙམ་ཡང་གནས་དེ་རུ་འཁོར་གྱིན་མེད་པ་
འདྲ་ལ།

སྤྱི་ཚོགས་དང་དུས་རབས་ཀྱི་འཕེལ་འགྱུར་ལས་མི་རིགས་གང་དང་གང་གི་ལོ་རྒྱུས་རྨེག་མེད་དུ་འགྲོ་བཞིན་ཡོད་པ་གཅིག་མཚུངས་སུ་གནས་བར་བསམ།

སྤྲོ་འཁྱམ་པ་ང་ལྟ་བུ་ཞིག་ལ་མཚོན་ན་དགའ་སྐྱོ་འདྲེས་མའི་ཚོར་བ་ཞིག་དང་མཉམ་དུ་རང་གི་ཉིན་ཐོ་ཐར་ཐོར་ལ་བརྗེད་བྱང་ཞིག་མི་འབྲི་ཐབས་མེད་དུ་གྱུར།