རིག་གཞུང་དབྱར་གྱི་བཅུད་འཛིན་ཀུ་ས་མའི།།
བཅུད་རོལ་ཆུང་དུས་ནེའུ་ལྡངས་སྦྲང་མ་རྭ།།
ཕན་ཚུན་མཛའ་བརྩེའི་གེ་སར་མངར་ཞིམ་ཕྱིར།།
དགའ་སྤྲོ་རྣམ་པའི་རི་མོ་ངལ་མེད་བྲིས།།[鲜花][咖啡]

ལུས་བར་སྟོང་ཕྲག་སྒལ་བའི་བརྩེ་འཕྲིན་ཞིག

མི་བཤད་དགུ་བཤད་བཤད་པའི་བརྩེ་བ་གླིང་། མཐའ་མལ་འཇའ་ཚོན་ལྟ་བུའི་རྨི་ལམ་ཞིག

དུས་ཚོད་སྐད་གཅིག་ལྟ་བུའི་འགྱུར་ཟློག་ཞིག

རྟེན་འབྲེལ་ཞུ།

མཁན་ཐུབ་བསྟན་ཉི་མ་ལགས། ཁྱེད་ཀྱིས་༼ཤེར་ཕྱིན་དངོས་པོ་བརྒྱད་དང་དོན་བདུན་ཅུའི་རྣམ་གཞག་༽ལེགས་པར་གྲུབ་པ་ལ་རྟེན་འབྲེལ་ཞུ།

འོ་རེད། འདི་ནས་ཡར་བརྩིས་པའི་ལོ་གསུམ་གྱི་སྔོན་དེ། ལོ་དེར་མཁན་པོ་ཚེ་རིང་དར་རྒྱས། འུ་གསུམ་པོས། དགུན་དཔྱིད་ཀྱི་ཟླ་བ་ལྔ་ཙམ་རིང་ལ། ནངས་ཟར་ནུབ་ཕྱི་བྱས་ནས། སྔར་སློབ་ཕྲུག་ཡིན་དུས་སྔ་འགྱུར་མཐོ་སློབ་ཆེན་མོ་ནས་དཔེ་ཀློག་བྱེད་པ་ལྟར། སྡུད་པ་རྒྱན་སྦྱར་གཙོར་བཟུང་། མངོན་རྟོགས་རྒྱན་གྱི་རྒྱ་འགྲེལ་ཉེར་གཅིག་དང་། བོད་འགྲེལ་གང་མང་ཞིག་ལ་དཔེ་ཀློག་དང་། བགྲོ་གླེང་ལྷུག་པོར་བྱས་ཤིང་། ཞོར་དུ་རང་རང་གིས་གང་ཐུབ་སྡོམ་ཚིག་བཀོད་ནས། མངོན་རྟོགས་རྒྱན་གྱི་གཞུང་རྫོགས་པའམ། དངོས་བརྒྱད་དོན་བདུན་ཅུའི་རྣམ་གཞག་རེ་འབྲི་རྒྱུའི་མགོ་བརྩམས་ཤིང་། མཇུག་ཕུད་རྒྱུའི་དམ་བཅའ་ཡང་བྱས་མོད། ཁྱེད་ཀྱིས་སྔོན་ལ་གྲུབ་པ་ལ་ཡི་རངས་དང་། ངེད་གཉིས་ཀྱིས་ཀྱང་རིམ་པར་འགྲུབ་ཐུབ་པའི་སྨོན་འདུན་ཡོད་ལ།

ལོ་དེར་བགད་ཞོར། རྩེ་ཞོར། རྩོད་ཞོར། ཐ་ན་གད་དར་དང་། བཟའ་བཏུང་གཡོ་བསྐོལ་ཚུན་ཆད་འདྲ་མཉམ་བྱས་ནས་ལས་སྐལ་བགོས་ཏེ། རང་རང་གི་ལས་དོན་ལ་རང་འགན་འཁུར་ནས། གཟའ་མཇུག་མ་གཏོགས་ཉིན་རེའི་དུས་ཚོད་མང་ཆེ་བ་དཔེ་ཀློག་ལ་བསྐྱལ་པ་དེ་ནི་བརྗེད་དུ་མེད་པ་ཞིག་རེད། ཁྱད་པར་དུ་རིན་ཆེན་འབྱུང་གནས་ཞི་བ་དང་། འཇིགས་མེད་འབྱུང་གནས་སྦས་པ་གཉིས་ཀྱི་མཚན་ནོར་བ་དང་། གཞུང་ནོར་བ་ཐེབས་པ་མང་ཆེས་པས། དེ་ལས་འཕྲོས་པའི་དགོད་གཏམ་སྣ་ཚོགས་བསྒྲིགས་ནས་བར་གྱི་ངལ་དུབ་སོས་པར་བྱས་པའང་ག་ལ་བརྗེད། ཧ་ཧ་ཧ་་་་་[偷笑]

འོན་ཀྱང་སེམས་ཕངས་པ་ཞིག་ལ། ལོ་དེར་དུས་ཐུང་ངུར་འབད་པ་ཆེན་པོས་གཞུང་མང་པོ་བཀླགས་མོད། ད་སྐབས་གཞུང་སོ་སོའི་འདོད་ལུགས་མི་འདྲ་བ་ཕལ་ཆེར་བརྗེད་ཟིན་འདུག་ལ། འགའ་རེ་ཡིད་ངོར་ཡོད་པའང་མོག་མོག་པོ་ཙམ་ལས་གསལ་པོ་རང་མི་འདུག། ལོས་ཡིན་ཏེ། སྤྱིར་མངོན་རྟོགས་རྒྱན་ན་ཤེས་བྱའི་རྣམ་གྲངས་ཧ་ཅང་མང་ཞིང་། ལྷག་ཏུ་རྒྱ་བོད་ཀྱི་འགྲེལ་པ་སོ་སོས་འགྲེལ་ཚུལ་ནི་དེ་བས་ཀྱང་མི་འདྲ་ས་མང་བས། འཇམ་མགོན་མི་ཕམ་རིན་པོ་ཆེས། བཀའ་དང་བསྟན་བཅོས་སྦྱར་ནས་འཆད་པ་ནི། འཆད་ཚུལ་བླ་ན་མེད་པ་ཡིན་པར་གསུངས་པ་ལྟར། མངོན་རྟོགས་རྒྱན་འཆད་པ་ལ། རྒྱལ་བའི་ཡུམ་ལ་མ་གཏུགས་པར་མཐའ་ཆོད་དཀའ་བའི་ཚོར་སྣང་ཡང་ཡང་བྱུང་ཡོད།

གང་ལྟར་གཞུང་མང་པོ་དེ་འདྲ་ཞིག་ལ་བལྟས་ནས། རང་གིས་སྔ་ཕྱིར་དཔྱད་བསྡུར་ཡང་ཡང་བྱས་ཏེ། ཡུམ་དང་བསྟན་བཅོས་སྦྱར་བའི་གོ་བའི་གནད་བསླངས་ནས། རང་གིས་གོ་བའི་སྡོམ་ཚིག་ཡིག་ཐོག་ཏུ་བཀོད་པ་ནི། གཞན་དག་སུ་མ་མགུ་ཡང་རང་ལ་བརྗེད་ཐོ་ལེགས་པོ་ཞིག་ཡིན་གཤིས། དེ་ལ་རང་མཐོང་གིས་ང་རྒྱལ་བྱ་མི་འོས་ཀྱང་། རང་རྟོན་གྱི་ཡིད་ཆེས་ཡོད་པ་ཞིག་གིས། རང་གི་ཤེས་རབ་ཀྱི་སྣང་བ་ཅུང་ཟད་རེ་ཡོད་པ་དེ། གཞན་ལ་མཉམ་སྤྱོད་བྱེད་དུ་འཇུག་པ་ནི། སྦྱངས་པའི་གྲུབ་དོན་གྱི་ཆ་ཤས་ཤིག་ཀྱང་ཅི་ལ་མིན།

ད་མང་པོ་མི་བཤད། གང་ལྟར་ཁྱེད་སྔོན་ལ་ཤོར་སོང་། ངེད་གཉིས་རྗེས་ལ་ལྷག་ཡོད། འོན་ཀྱང་རྗེས་དེད་ནས་ཐོན་ཡོང་། ཧ་ཧ་་་་་

ནུ་བོ་དགེ་འདུན་རབས་རྒྱས་གྱིས། བོད་རབ་བྱུང་ ༡༧ པའི་ཆུ་ཡོས་ས་ག་ཟླ་བའི་ཚེས་ ༡ ལ།