རྣམ་དཔྱད་རིག་པའི་ཉི་ཟླའི་དཀྱིལ་འཁོར་ལ།།
རྣོ་ངར་རིག་པའི་མཚམས་སྤྲིན་རབ་མཛེས་པའི།།
འཛམ་གླིང་རྒྱལ་ཁམས་རིག་པས་བསྐོར་མཛད་པ།།
དགེ་འདུན་ཆོས་འཕེལ་གཉིས་པའི་སྙན་གྲགས་གསོལ།།

[合十][玫瑰][强][烟花][太阳]

 སྐྱེས་ཕྲུག་ཚོས་དྲུག་གཅིག་བྱིས་པའི་དུས་ཆེན་བསུ།

                                                        རྩེ་རོང་དཔེ་སྨྱོན་ནས།

                                 
ཟླ་ཚེས་ཡག་པོ་ཡག་པོ་ཞིག།
བསུ་ལུགས་སྤྲོ་བོ་སྤྲོ་བོ་ཞིག།
དྲུག་གཅིག་བྱིས་པའི་དུས་ཆེན་ལ།།
རྟེན་འབྲེལ་སྙན་ཚིག་མཆོད་པ་འབྲི།།

སྨོན་ལམ་བཟང་པོ་བཟང་པོ་ཞིག།
ལས་འབྲས་མོད་པོ་མོད་པོ་ཞིག།།
ཤ་རུས་གཅིག་པའི་བྱིས་པ་ཚོར།།
གཏན་དུ་བདེ་ཞིང་སྐྱིད་པར་ཤོག།

ཕྱོར་ལྭ་མཛེས་པོ་མཛེས་པོ་ཞིག།
སྤྲོ་སྣང་དགའ་བོ་དགའ་བོ་ཞིག།
དྲུག་གཅིག་ཚུར་ལ་བསུ་བ་ཚོ།།
མུན་པ་སེལ་བའི་སྒྲོན་མེ་ཡིན།།

ཁོར་ཡུག་ཡངས་པོ་ཡངས་པོ་ཞིག།
དཔྱིད་རླུང་འཇམ་པོ་འཇམ་པོ་ཞིག།
ཀ་ཁའི་དབྱངས་སྙན་སྒྲོག་མཁན་ཚོགས།།
རིག་པའི་འཛུམ་མདངས་གྲོལ་བར་ཤོག།

སྨྲ་སྐད་ཕྲ་མོ་ཕྲ་མོ་ཞིག།
སྙིང་ལ་རྗེ་བོ་རྗེ་བོ་ཞིག།
དྲི་མེད་དྭངས་གཙང་བྱིས་པ་ཚོས།།
དྲུག་གཅིག་དུས་ཆེན་རོལ་བ་སྐྱིད།།

མི་བུ་ཆུང་ཆུང་ཆུང་ཆུང་ཞིག།
ལྷག་བསམ་དཀར་པོ་དཀར་པོ་ཞིག།
མཐུན་སྒྲིལ་བྱོས་ལ་ཤེས་རིག་སློབ།།
མ་འོངས་བོད་པའི་རྒྱུད་འཛིན་ཡིན།།

མཛའ་བརྩེ་དྭངས་མོ་དྭངས་མོ་ཞིག།
ནང་སེམས་སྐྱིད་པོ་སྐྱིད་པོ་ཞིག།
ན་ཆུང་པད་མའི་འགྱུར་ཁུག་དེ།།
གངས་ཅན་བོད་ཀྱི་གཅེས་ཕྲུག་ཡིན།།

སྐད་ཡིག་གཙང་མ་གཙང་མ་ཞིག།
རང་སྐད་རྣལ་མ་རྣལ་མ་ཞིག།
རྒྱུན་པར་སྨྲ་བའི་བྱིས་པ་ཚོ།།
ནམ་ཡང་སྐྱིད་པའི་ཁ་གཡང་འབོད།།

ཕུགས་འདུན་རིང་མོ་རིང་མོ་ཞིག།
རྣམ་པ་གསར་བ་གསར་བ་ཞིག།
བློ་རིག་ལྡན་པའི་ན་ཆུང་དག།
གཡུར་དུ་ཟ་བའི་འབྲས་བུ་ཡིན།།

བྱིས་པ་ཆ་འགྲིག་ཆ་འགྲིག་ཞིག།
སེམས་པ་མཐུན་པོ་མཐུན་པོ་ཞིག།
སེའུ་འབྲུ་ལྡན་པའི་ལོ་ཏོག་ལེགས།།
ཕུགས་བསམ་ཡོད་པའི་ན་ཆུང་མཛེས།།

རྩམ་དྲི་ཞིམ་པོ་ཞིམ་པོ་ཞིག།
མིག་རྒྱང་བརྟན་པོ་བརྟན་པོ་ཞིག།
ཀ་ཁ་ག་ངའི་བདག་པོ་ཚོ།།
གངས་ཅན་པ་ཡི་རེ་བ་ཡིན།།

རྣམ་དཔྱོད་རྒོད་པོ་རྒོད་པོ་ཞིག།
སེམས་རྒྱུད་དྲང་མོ་དྲང་མོ་ཞིག།
སྙན་ཚིག་རྟེན་འབྲེལ་དེ་རིང་ཞུ།།
རླུང་རྟ་དར་བའི་སྨོན་འདུན་ཡིན།།

མི་རིགས་འཛོམས་པོ་འཛོམས་པོ་ཞིག།
ཤེས་རིག་རྩ་ཆེན་རྩ་ཆེན་ཞིག།
རྒྱུད་འཛིན་བྱེད་པའི་སློབ་ཕྲུག་ཚོ།།
དེ་རིང་དྲུག་གཅིག་དུས་ཆེན་བསུ།།

                              ༢༠༢༣.༦.༡ ཉིན་བྲིས།

སྣང་བའི་ཁྲོད་ཀྱི་འཇིག་རྟེན།

མཁའ་ཡི་སྤྲིན་པ་བྲེལ་མོ་སོང་ཤུལ་ནས།།
རླུང་བུ་འཁྱམ་པོ་ས་མཐའི་ཡུལ་ལ་རྒྱུགས།།
ཆར་ཟིམ་སྒུག་པའི་དབྱར་གྱི་མེ་ཏོག་གིས།།
རེ་བཞག་བརྗེད་མེད་སེམས་ཀྱིས་རྨ་ཁ་བཟོས།།
 
ཡར་བལྟས་རི་བོ་ལྷུན་པོ་འགྱིང་ཉམས་ཀྱིས།།
ཕྱིར་ཡི་དགྲ་ཁ་འགོག་པའི་དཔའ་ངར་ཅན།།
མར་གྱི་ཆུ་ཡི་བཞུར་སྒྲ་འདོན་པ་དེས།།
རྒོད་པོ་ཟིལ་ཤུགས་རྒྱས་པའི་དཔུང་རྟགས་ཤིག།
 
སྤང་ཐང་ཁ་བ་ཁེངས་པའི་ཉིན་མོ་སྟེ།།
མེ་རྡུལ་སད་ཀྱིས་བཅོམ་པའི་ན་བུན་ཞིག།
དཀར་གོས་ལ་བ་གྱོན་པའི་དགུན་ཀ་དེ།།
སྦྲང་མའི་སྐྱོ་གླུ་ཉིན་མཚན་བར་མེད་ཅིག།
 
ཆར་རྗེས་དེད་པའི་འཇའ་ཚོན་མཛེས་པོ་སྟེ།།
ཡུན་རིང་འདུག་མེད་འགྲོ་བའི་ཆོས་ཉིད་དམ།།
ཡུན་ཙམ་མཐོང་ལམ་མཛེས་པའི་རང་བཞིན་ཀྱིས།།
གཏན་གྱི་འཚོ་བ་འཕྲོག་པའི་བསྐུལ་མ་ཞིག།
 
སྡོང་འགྲམ་ལོ་མས་གང་བའི་བསིལ་གྲིབ་ན།།
ལྷིང་འཇགས་ཞི་བའི་བུ་ཆུང་བདེ་སྐྱིད་འཁོར།།
འདུ་འཛི་དཔག་ཚོགས་འཇམ་པའི་ཞི་བདེ་པས།།
གཞན་ཕན་དོན་མཛད་འཁོར་བའི་འཁོར་ལོ་ཞིག།
 
དྲོད་འཇམ་ཉི་མ་བཞིན་དུ་གསལ་བ་སྟེ།།
བྱམས་ལྡན་ཨ་མའི་རུམ་ཁ་སླེབས་པ་ཡིན།།
ངག་སྙན་ཁུ་བྱུག་གདངས་ཀྱིས་འཐེན་པ་སྟེ།།
ཡུམ་གྱི་བརྩེ་གཏམ་སྙིང་ལ་འཁོར་བ་ཡིན།།
 
མཚར་སྡུག་རི་སྤང་འབྱོར་ཡོན་སླེབ་པ་བཞིན།།
ལང་ཚོ་རྒྱན་གྱིས་དཀྲིས་པའི་ན་གཞོན་ཚོ།།
མེས་པོའི་བརྩེ་འདང་ཤུལ་བཞག་ཡོད་པ་སྟེ།།
སོ་སོ་སྲོག་ཡ་ཇི་བཞིན་སྐྱོང་མཁས་དགོས།།
 
ལུགས་གཉིས་ཕྱོགས་རིས་མེད་པའི་དཔའ་བོ་སྟེ།།
གསོན་ཤི་བློ་མཐུན་གྲོགས་ཀྱིས་བསུ་མ་ཡོད།།
ཕྱོགས་རེ་ཕན་སེམས་འཚོལ་བའི་དཔུང་སྡེ་སྟེ།།
ན་ཟུག་སྟོང་གིས་གཅིག་པུས་བསུ་མར་བྱེད།།

ཁོ་བོས་ཀྱག་ཀྱོག་ལམ་འཕྲང་རྨི་ལམ་བཞིན།།
རྟག་མེད་གློ་བུར་མི་རྟག་རྗེས་ཉུལ་ཞིག། 
སོང་སོང་ཡལ་ཡལ་འདི་ཡོད་མེད་པ་འདི།།
སླར་ཡང་ཁོ་བོས་རྨི་ལམ་ལེན་གཅིག་བྲིས།།