༄༅། །བདུན་ཕྲག་སྔོན་མ་ནས་བཟུང་། ཆམ་ནད་ཀྱིས་མནར་ཏེ་དཔེ་ཆ་ལྟ་བའི་ཡི་ག་འགག་པ་ཡང་དེ་རིང་ཅུང་ལེགས་སུ་ཕྱིན་པས། བུ་ཡིག་ཏུ་གོ་དཀའ་སའི་གནད་རེ་རེ་བཞིན་མ་ཡིག་དང་གོ་བསྡུར་ནས་ལྟ་བའི་དབུ་བརྩམས་ལ། དེ་ཡིས་རིག་སྟོབས་གསོ་བྱེད་ཀྱི་སྨན་དང་བདུད་རྩིའི་ངོ་བོར་འཕེལ་གྱུར་ཅིག་གུ །[干杯][鲜花]

ཚངས་སྲས་སྒེག་མོ།

བཅུ་དྲུག་ཟླ་བ་ཚེས་པའི་དཀྱིལ་འཁོར་དབུས།།
ཉམས་བརྒྱའི་གར་དགུ་སྤྱོད་པས་མ་ཚིམས་པར།།
མཐོན་ཀའི་པི་ཝང་དཀྲོལ་བས་བདེ་ཆེན་དབྱིངས།།
འཇམ་དཔལ་ཡབ་ཆེན་རྗེས་ཆགས་ཉིད་དུ་སྐུལ།།

བཞིན་ལེགས་པདྨ་འཛུམ་པའི་དགའ་ཚལ་ན།།
དཀྱུས་རིང་སྤྱན་གྱི་བུང་བ་གནག་ཅིང་སྣུམ།།
མཆུ་སྒྲོས་འདབ་ཡངས་དམར་པོ་བཞད་པ་ན།།
ཚེམས་གྱི་གངས་དཀར་ཕྲེང་བ་བསྟར་ལ་བརྒྱུས།།

བདེ་སྟོང་ཉམས་བརྒྱ་གར་གྱིས་སྐུ་ལ་འཁྲིལ། །
དབྱངས་བདུན་རྫོགས་པ་གསུང་ལ་བྱིན་གཡང་འབར། །
དྲི་མེད་མཁྱེན་པ་ཐུགས་ཀྱི་དཔལ་བེའུ་འཛུམ། །
སྐུ་གསུང་ཐུགས་ཀྱི་ཡོན་ཏན་གཞལ་མཐའ་བྲལ། །

ཕྱག་མཐིལ་རི་མོ་བཀྲ་བས་བསོད་ནམས་ཕུལ། །
མཚན་དཔེའི་དགེ་ལེགས་མཐོ་བས་ཚོགས་ཆེན་རྫོགས། །
འགག་མེད་གདངས་དབྱངས་གསལ་བས་ངག་གི་ལྷ། །
ཚངས་སྲས་མའོ་ལང་ཚོའི་མཆོད་དབྱངས་འབུལ། །

ཉ་རྒྱས་ཟླ་བ་འགྲན་པའི་ཞལ་བཟང་དཀྱིལ། །
བཟོད་པས་ལེགས་སྨིན་སྤྱན་གྱི་འབུར་བྲིས་མ། །
སྨིན་མཆོག་དགའ་མའི་འཕྱོར་སྒེག་སྲིད་ན་རིང་། །
ཞལ་སྒོ་པདྨ་འཛུམ་པའི་དགའ་སྟོན་འགྱེད། །

སྲིད་ཞི་དགེ་ལེགས་འབར་བའི་འོ་མཚོ་ལས། །
ཚངས་སྲས་དགའ་མ་འཁྱུག་པའི་མཛེས་པ་ཡིས། །
ངག་རིག་པདྨ་རྒྱས་པའི་དགའ་ཚལ་ཡང་། །
ཕྱོགས་བརྒྱ་མཐའ་ལ་གཏུག་པའི་འདབ་ཡངས་འཛུམ། །

རྒྱལ་ཀུན་ངག་གི་ཟླ་ཤེལ་སྟོང་བཞུས་པར།།
སྨྲ་བའི་དབང་ཕྱུག་དཔལ་དུ་ཤར་བ་གང་།།
ངག་དབང་ལྷ་མོ་ཞེས་པའི་ཅོད་པན་བརྒྱ། །
སྣང་སྲིད་ཁམས་ཀྱི་མཐའ་ལ་དོན་གྱིས་འགྲེམ། །

ཞེས་པ་འདི་སྐྱེས་མིང་སྟོབས་ལྡན་དུ་འབོད་པ་དེས་གང་ཤར་རང་གྲོལ་གྱིས་སྨྱུག་ཁ་གློག་ལྟར་འཁྱུག་པའོ། །

དེ་ཡང་གཞུང་བརྒྱ་སྨྲ་བའི་མཁས་ཆེན་དག་གི་འདོད་པ་བཀོད་ནས། དེ་ལ་འཐད་མི་འཐད་ཀྱི་རྣམ་བཞག་བྱས་ནས་བརྒལ་ཞིང་བརྟག་པ་ནི་རང་ཉིད་ཀྱི་ཤེས་རབ་འཕེལ་བའི་རྒྱུའམ་ཡན་ལག་ཡིན་གྱི། མཐའ་གཅིག་ཏུ་འགོག་པའམ་མ་གུས་པ་ནི་མ་ཡིན་ནོ།།