སྣང་བའི་ཁྲོད་ཀྱི་འཇིག་རྟེན།

མཁའ་ཡི་སྤྲིན་པ་བྲེལ་མོ་སོང་ཤུལ་ནས།།
རླུང་བུ་འཁྱམ་པོ་ས་མཐའི་ཡུལ་ལ་རྒྱུགས།།
ཆར་ཟིམ་སྒུག་པའི་དབྱར་གྱི་མེ་ཏོག་གིས།།
རེ་བཞག་བརྗེད་མེད་སེམས་ཀྱིས་རྨ་ཁ་བཟོས།།
 
ཡར་བལྟས་རི་བོ་ལྷུན་པོ་འགྱིང་ཉམས་ཀྱིས།།
ཕྱིར་ཡི་དགྲ་ཁ་འགོག་པའི་དཔའ་ངར་ཅན།།
མར་གྱི་ཆུ་ཡི་བཞུར་སྒྲ་འདོན་པ་དེས།།
རྒོད་པོ་ཟིལ་ཤུགས་རྒྱས་པའི་དཔུང་རྟགས་ཤིག།
 
སྤང་ཐང་ཁ་བ་ཁེངས་པའི་ཉིན་མོ་སྟེ།།
མེ་རྡུལ་སད་ཀྱིས་བཅོམ་པའི་ན་བུན་ཞིག།
དཀར་གོས་ལ་བ་གྱོན་པའི་དགུན་ཀ་དེ།།
སྦྲང་མའི་སྐྱོ་གླུ་ཉིན་མཚན་བར་མེད་ཅིག།
 
ཆར་རྗེས་དེད་པའི་འཇའ་ཚོན་མཛེས་པོ་སྟེ།།
ཡུན་རིང་འདུག་མེད་འགྲོ་བའི་ཆོས་ཉིད་དམ།།
ཡུན་ཙམ་མཐོང་ལམ་མཛེས་པའི་རང་བཞིན་ཀྱིས།།
གཏན་གྱི་འཚོ་བ་འཕྲོག་པའི་བསྐུལ་མ་ཞིག།
 
སྡོང་འགྲམ་ལོ་མས་གང་བའི་བསིལ་གྲིབ་ན།།
ལྷིང་འཇགས་ཞི་བའི་བུ་ཆུང་བདེ་སྐྱིད་འཁོར།།
འདུ་འཛི་དཔག་ཚོགས་འཇམ་པའི་ཞི་བདེ་པས།།
གཞན་ཕན་དོན་མཛད་འཁོར་བའི་འཁོར་ལོ་ཞིག།
 
དྲོད་འཇམ་ཉི་མ་བཞིན་དུ་གསལ་བ་སྟེ།།
བྱམས་ལྡན་ཨ་མའི་རུམ་ཁ་སླེབས་པ་ཡིན།།
ངག་སྙན་ཁུ་བྱུག་གདངས་ཀྱིས་འཐེན་པ་སྟེ།།
ཡུམ་གྱི་བརྩེ་གཏམ་སྙིང་ལ་འཁོར་བ་ཡིན།།
 
མཚར་སྡུག་རི་སྤང་འབྱོར་ཡོན་སླེབ་པ་བཞིན།།
ལང་ཚོ་རྒྱན་གྱིས་དཀྲིས་པའི་ན་གཞོན་ཚོ།།
མེས་པོའི་བརྩེ་འདང་ཤུལ་བཞག་ཡོད་པ་སྟེ།།
སོ་སོ་སྲོག་ཡ་ཇི་བཞིན་སྐྱོང་མཁས་དགོས།།
 
ལུགས་གཉིས་ཕྱོགས་རིས་མེད་པའི་དཔའ་བོ་སྟེ།།
གསོན་ཤི་བློ་མཐུན་གྲོགས་ཀྱིས་བསུ་མ་ཡོད།།
ཕྱོགས་རེ་ཕན་སེམས་འཚོལ་བའི་དཔུང་སྡེ་སྟེ།།
ན་ཟུག་སྟོང་གིས་གཅིག་པུས་བསུ་མར་བྱེད།།

ཁོ་བོས་ཀྱག་ཀྱོག་ལམ་འཕྲང་རྨི་ལམ་བཞིན།།
རྟག་མེད་གློ་བུར་མི་རྟག་རྗེས་ཉུལ་ཞིག། 
སོང་སོང་ཡལ་ཡལ་འདི་ཡོད་མེད་པ་འདི།།
སླར་ཡང་ཁོ་བོས་རྨི་ལམ་ལེན་གཅིག་བྲིས།།

མིར་སྐྱེས་ཀྱང་མི་ལས་བརྒལ་བའི་སྐྱེས་བུ།

_________ ཀིར་སྒར་ཕུན་ཚོགས།

སྡུག་བསྔལ་རྒྱུ་དང་རྟག་ཏུ་བདེ་བའི་གནས།།
གང་ཡིན་རང་གིས་རང་ལ་དྲི་བ་བསྐུལ།།
བདེན་པའི་ཆེད་དུ་རྒྱལ་སྲིད་བློས་གཏོང་བ།།
རྒྱལ་སྲས་དོན་གྲུབ་གཽ་ཏམ་བུ་དེར་འདུད།།

རང་གི་མགོན་དང་རང་གི་དགྲ་དཔུང་ལ།།
རང་ཉིད་གཏད་དེ་རྣམ་དག་རིག་སྟོབས་ཀྱིས།།
བསྲེག་བཅད་བརྡར་བའི་ངེས་ཤེས་འདྲེན་པར་གདམས།།
རང་ཉིད་རྒྱལ་བའི་ལྷ་མཆོག་ཤཱཀྱར་འདུད།།

ཟག་བཅས་བདེ་བའི་འདོད་འདུན་རིང་དུ་དོར།།
ཏིང་འཛིན་ཞི་བའི་འཆར་སྣང་ཡིད་དུ་ཕབ།།
ཡང་དག་ལམ་དང་ཡང་དག་ལྟ་བ་དང་།།
ཡང་དག་ཆོས་ཀྱི་རྒྱལ་ཁམས་གསར་དུ་བསྐྲུན།།

ཡང་དག་གནས་ལུགས་བདེན་བཞིའི་འགྲོས་སུ་བཏེགས།།
རྟེན་འབྱུང་ཆོས་ཉིད་གྲུབ་པའི་གཤིས་ལུགས་ལ།།
རྣམ་འབྱེད་ཤེས་རབ་གཏམ་གྱིས་རང་སྒྲ་བསྒྲོགས།།
རྒྱལ་བ་ཡང་དག་སྨྲ་བའི་མགོན་དེ་རྒྱལ།།

སེམས་ཅན་ཁམས་དང་མོས་པ་བག་ཆགས་སུ།།
འཁོར་གསུམ་ཐེག་ལུགས་བདེན་པའི་གཏམ་དུ་བྱས།།
དྲང་དོན་ངེས་དོན་ལྡེམ་དགོངས་མན་ངག་སྦར།།
མི་རུ་སྐྱེས་པ་ལྷ་ཡི་མཆོག་གྱུར་རྒྱལ།།

_______ དེ་ཝི་ཀོ་ཊའི་ལུང་པ་ནས།

སངས་རྒྱས་ཀྱིས་བདག་ཉིད་བདག་གི་མགོན་ཡིན་པ་དང་། ཐམས་ཅད་རང་ཉིད་ལ་རགས་ལས་ཡོད་པར་གསུངས་ཤིང་།

དེས་བདེ་བ་དང་སྡུག་བསྔལ་ཞེས་པ་དེ་ཕྱི་ནས་བྱུང་བ་མ་ཡིན་པར།

རང་རྒྱུད་ཀྱི་དགེ་བ་དང་མི་དགེ་བའི་ལས་ལས་འབྱུང་བར་རམ།