ཁ་སང་།
བོད་རྒྱལ་ལོ་༢༡༥༠ལོའི་ཆོས་འཁོར་ཟླ་བའི་ཚེས་བཅུ་དང་བསྟུན་གསང་ཆེན་སྔ་འགྱུར་བའི་ཆོས་སྡེ་བྲག་ནག་དགོན་གྱི་བཤད་གྲྭ་བསླབ་གསུམ་དར་རྒྱས་གླིང་དུ་སློབ་དཔོན་དང་སྐྱོར་དཔོན་གྱི་མཚན་གསོལ་བའི་མཛད་སྒོ་བདེ་ལེགས་ཀྱི་ངང་ནས་མཇུག་ལེགས་པར་གྲུབ་སོང་། སྙིང་ནས་དགའ་བྱུང་།

རྒན་རྒྱའི་མཁར་ནང་ནི། དེང་གི་ཀན་སུའུ་ཞིང་ཆེན་བསང་ཆུ་རྫོང་ནས་བྱང་ངོས་ཀི་ལོ་མི་ཊར་ ༣༥ ཡི་མཚམས་སུ་ཡོད། བྱང་ངོས་རེབ་གོང་དང་ཉེ་ཞིང་། ལྷོ་ངོས་བླ་བྲང་དང་ཉེ་བ་ཡིན། ལོ་རྒྱུས་རྣམས་སུ་གསལ་བ་ལྟར་ན། མཁར་ཤུལ་འདི་ནི་སྔོན་དུས་མི་ཉག་རྒྱལ་རྒོད་ཀྱིས་མདོ་སྨད་ཀྱི་ས་ཁུལ་མང་པོར་མཁར་རྫོང་ཁ་ཤས་བཏབས་པའི་ནང་གི་གཅིག་ཡིན་པར་གསལ་ཡོད་ལ། གནས་འདི་ནི་གནའ་སྔ་མོར་མདོ་སྨད་ལྷོ་བྱང་བར་གྱི་འགྲིམ་འགྲུལ་ས་ཚིགས་གལ་ཆེན་ཞིག་ཡིན། བོད་དང་མི་ཉག རྒྱ་ནག་བཅས་ཀྱི་དམག་དོན་ཐད་འབྲེལ་བ་གལ་ཆེན་ཡོད་པའི་ས་གནས་ཤིག་ཀྱང་ཡིན་པར་བཤད་ཡོད།

བོད་སྐད་དུ་རྒན་རྒྱའི་མཁར་ནང་ཞེས་འབོད་ཅིང་། རྒྱ་སྐད་དུ་༼八角城༽ཟུར་བརྒྱད་མཁར་ཞེས་འབོད་ཀྱི་ཡོད་པ་ནི། མཁར་ཤུལ་འདི་བཞིན་མཁར་གྱང་གི་རྩིག་སྣེ་ཕྱོགས་མཐར་བརྐྱངས་རིམ་དེ་རྒྱ་གྲམ་གྱི་གཟུགས་སུ་ཡོད་པར་ཟུར་སྣེ་བརྒྱད་ཡོད་པའི་ཆ་ནས་བཏགས་པ་ཞིག་ཡིན་པར་བཤད། དོན་དངོས་སུ་མཁར་འདིའི་དབྱིབས་ནི་བོད་ལུགས་ཀྱི་གཡུང་དྲུང་རི་མོའི་གཟུགས་སུ་ཡོད་པ་ཞིག་ཡིན་སྟབས། དེང་རབས་ཀྱི་ལོ་རྒྱུས་སྨྲ་བ་ཚོས་གཡུང་དྲུང་མཁར་ཞེས་ཀྱང་འབོད་ཀྱི་ཡོད།

དེང་སྐབས་མཁར་འདིའི་རྩིག་གྱང་གི་ཕྱི་ལྗོངས་རྣམ་པ་ལྷག་ཡོད་པ་འདིའི་ནང་། གྲོང་སྡེའི་རྣམ་པ་ཞིག་གཞིས་ཆགས་ནས་ཡོད་པ་ནི། ལོ་ཉིས་བརྒྱའི་ལོ་རྒྱུས་ཡོད་པ་ཞིག་ཡིན། དེ་ཡང་ལོ་ 200 གོང་ལ་འདིར་གཞིས་ཆགས་པའི་བོད་རིགས་དང་། ལོ་ 100 གོང་ལ་ཉིང་ཞ་ནས་འདིར་ཡོང་བའི་རྒྱ་རིགས་བཅས་དེང་སྐབས་ཁྱིམ་ཚང་ 70 ཡོད་པར་ཁྱོན་མི་གྲངས་ 500 ཡས་མས་ཡོད་འདུག

ལོ་རྒྱུས་རྣམས་སུ་གསལ་བ་ལྟར་ན། མི་ཉག་ནི་བོད་ཀྱི་རུས་ཆེན་བཞིའི་ནང་གི་ལྡོང་གི་རིགས་སུ་གཏོགས་པར་བཤད་ཡོད། མི་ཉག་རྒྱལ་རབས་ཟེར་བ་ནི་། ཕྱི་ལོ་ ༡༠༣༩ ལོར་ལྡོང་རིགས་ཚོ་སྐོར་ཁག་ཅིག་དེང་སང་ཉིན་ཞཱ་ཟེར་བའི་ས་ཆར་གཞིས་ཆགས་ནས་ཞིས་ཞཱ་ཟེར་རྒྱལ་སྲིད་བཙུགས་པ་ནས་བྱུང་བ་ཡིན། དེའི་ཆབ་འབངས་ནི། བོད་དང་། རྒྱ་རིགས། ཧོར་སོག་གི་རིགས་བཅས་འདུས་པའི་རྣམ་པ་ཅན་ཞིག་ཡིན་འདུག ཡིན་ནའང་། ཆོས་འབྱུང་མཁསད་པའི་དགའ་སྟོན་ནང་། སྲོང་བཙན་སྒམ་པོའི་བཙུན་མོ་རུ་ཡོངས་བཟའ་རྒྱལ་མོ་བཙུན་དེ་མི་ཉག་རྒྱལ་པོའི་བུ་མོ་ཡིན་པར་གསལ་བའི་མི་ཉག་གི་རྒྱལ་པོ་ནི་བཙན་པོའི་སྐབས་ཀྱི་རྒྱལ་ཕྲན་ཞིག་ཡིན་པ་ལས། ཕྱིས་ཀྱི་མི་ཉག་རྒྱལ་རབས་དེ་མིན། ཕྱིས་ཀྱི་མི་ཉག་རྒྱལ་རབས་ནི་ཕྱི་ལོ་༡༠༣༨།༡༢༢༧ བར་བྱུང་བའི་རྒྱལ་རབས་ཤིག་ཡིན་པ་དང་། སྔ་མ་ནི་ཕྱི་ལོ་༦༡༧།༦༥༠ བར་གྱི་བྱུང་བ་ཞིག་ཆགས་ཡོད།

དེང་སང་གི་ཉིན་ཞཱ་རྒྱལ་སར་བྱས་པའི་མི་ཉག་རྒྱལ་རབས་འདི་ནི། ཕྱི་ལོའི་དུས་རབས་བཅུ་གཅིག་ནས་བཅུ་གསུམ་༡༠༣༨།༡༢༢༧བར་བྱུང་བའི་མི་ཉག་རྒྱལ་རབས་དྲུག་པ་མི་ཉག་རྒྱལ་རྒོད་དུ་གྲགས་པའི་རིང་ཕྱི་ལོ་ ༡༢༢༧ ལོར་ཧོར་ཇིང་གིར་གྱིས་རྒྱལ་སྲིད་འཕྲོགས་ཏེ་རྒྱལ་ཁབ་རྩ་ཐོར་དུ་ཕྱིན། ཧོར་གྱིས་མི་ཉག་བླངས་པའི་དགའ་སྟོན་གྱི་ཟླ་བ་ལ་ཧོར་ཟླར་གྲགས་པ་འདི་བྱུང་ཞིང༌། ད་ལྟའང་མདོ་སྨད་ཁུལ་དང་ཁམས་ཁུལ་མང་བོ་ཞིག་ན་ལི་ཐོ་རྩི་ལུགས་ཀྱང་འདི་དང་བསྟུན་ནས་ལོ་སར་གྱི་ཟླ་ཚེས་དབུས་གཙང་དུ་དར་བའི་རྩིས་ལུགས་དང་མི་མཐུན་པ་བྱུང་ཡོད།

གང་ལྟར། མི་ཉག་རྒྱལ་རྒོད་ཀྱི་རིང་ལ་མདོ་སྨད་ལྷོ་བྱང་གི་ཡུལ་དུ་བཙན་འཛུལ་དང་འཁྲུག་སློང་མང་བོ་བྱས་པའི་ངག་རྒྱུན་མང་ཞིང་། རྒན་གྱ། བསང་ཁོག་སོགས་བླ་བྲང་ཉེ་འཁོར་གྱི་རི་ལུང་དག་ན་མི་ཉག་རྒྱལ་རྒོད་སྐབས་ཀྱི་ཞིང་ས་ཡིན་པར་གྲགས་པའི་རྗེས་ཤུལ་མང་། དེ་བཞིན་ད་ལྟའི་རྒན་རྒྱའི་མཁར་ནང་དང་། གཞན་ཡང་། ཧོར་གཙང་དུང་རིའི་མདུན་ངོས་སུ་མཁར་ཤུལ་ཆེན་པོ་གཉིས་ཡོད་པ་དང་། རྒན་གྱའི་སུ་རུག་གི་རྒྱབ་ངོས་དང༌། རུ་ངན་གྱི་ཉེ་འགྲམ། བསང་ཁོག་བཅས་སུའང་མཁའ་ཤུལ་ཡོད་པ་འདི་དག་མི་ཉག་རྒྱལ་རྒོད་ཀྱི་མཁར་ཤུལ་ཡིན་པར་གྲགས། མཁར་འདི་དག་ནི་ཕྱི་ལོ་༡༠༣༨།༡༢༢༧གྱི་མི་ཉག་རྒྱལ་རབས་སྐབས་བྱུང་ཞིང་། དེ་ཡང་རྒྱལ་རབས་དྲུག་པ་མི་ཉག་རྒྱལ་རྒོད་སྐབས་བྱུང་བར་དཔག་ན། ཕྱི་ལོ་ ༡༡༢༧ ནས་ ༡༢༢༧ བར་བྱུང་བ་ཞིག་ཡིན་པར་ཚོད་དཔག་བྱས་ཆོག#八角古城##རྒན་རྒྱའི་མཁར་རྙིང་།#

༄༅། །སྤྲེལ་ལོ་སྤྲེལ་ཟླའི་ཚེས་བཅུའི་རྗེས་དྲན་གྱི་མགུར་ཚིག་དད་པའི་མེ་ཏོག་ཅེས་བྱ་བ།
མཁན་ཆེན་འཆི་མེད་རིག་འཛིན། 

ལྷོ་ནུབ་འོ་མའི་མཚོ་མོའི་མེ་ཏོག་གི་སྟེང་དུ། །
སྣང་མཐའི་ཐུགས་ལས་སྤྲུལ་པ་རིག་འཛིན་གྱི་སློབ་དཔོན། །
ང་ཅག་མགོན་དུ་ཐོབ་པ་སྟེས་དབང་གིས་མ་ཡིན། །
འབུམ་ཕྲག་སྐྱེ་བ་དུ་མའི་ལས་སྨོན་གྱིས་འབྲེལ་ཡོད། །

མི་མིན་མཁའ་འགྲོ་བྱེ་བའི་ཚོགས་དཔོན་དུ་ཕེབས་ཀྱང་། །
ཐུགས་རྗེའི་འདུན་མའི་ཕྱེད་ཀ་གངས་ཅན་ནས་ལུས་པས། །
དུས་བཟང་ཡར་ཟླའི་ཚེས་བཅུའི་ཉི་ཟེར་གྱི་རྒྱུད་ནས། །
ཡང་ཡང་ཞིང་འདིར་བྱོན་པའི་སྐལ་བཟང་རེ་ཡོད་འདུག །

ལས་སྨོན་རྟེན་འབྲེལ་དུས་བབས་གང་འདུལ་གྱི་སྤྲུལ་པས། །
འབྲེལ་ཚད་དཔལ་རིའི་རིག་འཛིན་ཚོགས་གྲལ་དུ་ཁྲིད་པས། །
འདི་ནས་ལྷོ་ནུབ་སྲིན་པོའི་གླིང་ཕྲན་གྱི་བར་ལ། །
མི་དང་མི་མིན་རྒྱུ་བའི་ལམ་ཆེན་ཞིག་དོད་ཡོད། །

ཕོ་བྲང་པདྨ་འོད་ཀྱི་ཐེམ་སྐས་ན་ཕེབས་པའི། །
མཁའ་འགྲོའི་བརྡ་སྐད་གླེང་བའི་དཔའ་བོ་དང་དཔའ་མོ། །
ཞིང་ཁམས་གཞན་ནས་བྱོན་པའི་འཕགས་ཆེན་རེ་མ་ལགས། །
ལས་ལྡན་བོད་ཀྱི་པདྨའི་གདུལ་བྱ་ཚོ་ཡིན་འདུག །

ང་ཅག་ལས་ཀྱི་མེ་ཏོག་ལྟོས་མེད་དུ་འཕང་བ། །
ཨོ་རྒྱན་རྗེ་འབངས་འདུས་པའི་ཚོགས་གྲལ་གྱི་དབུས་ནས། །
སྣ་ནམ་རིག་འཛིན་སྤྲུལ་པའི་ཕྱག་སོར་གྱིས་བཟུང་བས། །
སྤྱི་གཙུག་རྒྱན་དུ་ཐོབ་པའི་རིགས་བདག་དེ་ཤེས་སོང་། །

སྐྱིད་སྡུག་ལས་ཀྱི་བསྐོས་ཐང་ཅི་ཞིག་ལ་བབས་ཀྱང་། །
མཚུངས་མེད་བླ་མའི་གསང་གསུམ་བྱིན་རླབས་ཀྱི་སྣང་བར། །
ནམ་ཡང་འབྲལ་བ་མེད་པའི་སྨོན་ལམ་གྱི་འདུན་མ། །
མཚན་ཡང་རྨི་ལམ་འོག་ནས་སེམས་ཁོང་ན་བཞག་ཡོད། །

ཅེས་པ་འདི་རང་ལ་མཚོན་ན་ཆུང་ངུའི་དུས་སུ་རྒྱལ་དབང་ཨོ་རྒྱན་ཆེན་པོར་གསོལ་འདེབས་ལ་བརྩོན་ཞིང་དད་གུས་ཆེ་ཡང་བར་སྐབས་སུ་དཔེ་ཆའི་སྦྱང་བརྩོན་ཁོ་ན་ལ་གཡེང་ནས་འདོན་སྒྲུབ་ཀྱི་བྱ་བ་དུ་མ་གལ་ཆུང་དུ་ལུས་ཀྱང་གུ་རུ་རིན་པོ་ཆེ་དང་སྤྲུལ་པའི་གཏེར་སྟོན་མང་པོའི་རྣམ་ཐར་དང་ཟབ་ཆོས་སོགས་ལ་དད་གུས་ཀྱིས་སྦྱང་བརྩོན་ལ་བརྟེན་ནས་ཡིད་ཆེས་ཀྱི་དད་པ་བརྟན་པོ་རྙེད་ཅིང་མགུར་ཚིག་འདི་ཡང་སྤྲེལ་ལོ་སྤྲེལ་ཟླའི་ཚེས་བཅུའི་ཚོགས་མཆོད་ཀྱི་དུས་སུ་བློ་ལ་བརྩམས་པ་རྗེས་སུ་བོད་མེ་བྱའི་ལོའི་ཟླ་བ་༢པའི་ཚེས་༡༠ རྒྱལ་ཕུར་དང་ལེགས་བརྒྱད་འཛོམས་པའི་གཟའ་སྐར་བཟང་པོ་ལ་འཆི་མེད་རིག་འཛིན་ཞེས་བྱ་བས་སྨྲས་རིམ་བཞིན་ཡིག་གཟུགས་ལེགས་པའི་སློབ་ཕྲུག་ལྷ་མོ་མཚོ་ཟེར་བ་ཞིག་ལ་རྒྱ་ནག་སྤོས་ལྡན་གྲོང་ཁྱེར་ནས་ཡི་གེར་ཕབ་ཏུ་བཅུག་པ་དགེ། །