ཀུན་མཁྱེན་འཇིགས་མེད་གླིང་པས། རྟོགས་པ་དོན་གྱི་བརྒྱུད་པ་དང་ལྡན་པའི་བླ་མ་དམ་པ་མཚན་ཉིན་དང་ལྡན་པ་ཞིག་དང་མཇལ། དེ་ལ་རྩེ་གཅིག་གི་དད་འདུན་དྲག་པོས་ཡིད་ཁྱེད་ཤེས་ཀྱི་བློ་ཁེལ་གསོལ་བ་འདེབས་ཤེས་ན་རྐྱེན་མོས་གུས་ཀྱིས་བྱས་ཏེ་བླ་མའི་རྟོགས་པ་སློབ་མ་ལ་འཕོས་ནས་རང་བཞིན་བརྗོད་བྲལ་རྫོགས་པ་ཆེན་པོའི་གནས་ལུགས་རྟོགས་པར་གསུངས།

ལོ་རྒས་སོང་ཟེར་ནས་སློབ་གཉེར་གྱི་སེམས་ཤུགས་ཉམས་པ་དེ་ཡང་སློབ་གཉེར་གྱི་བཀག་རྡོ་ཆེན་པོ་ཡིན། ད་རྒས་སོང་སློབ་གཉེར་མི་བྱེད་ཉམས་ལེན་བྱེད་ཟེར་མཁན་དག་གིས་སློབ་གཉེར་གྱི་ཆོས་དང་ཉམས་ལེན་གྱི་ཆོས་སོ་སོར་ཕྱེ་བ་དེ་ནོར་འཁྲུལ་ཆེན་པོ་ཡིན། གང་ལ་སློབ་གཉེར་བྱས་པའི་ཆོས་དེ་ཉིད་ཉམས་སུ་ལེན་དགོས་པ་ལས་ཉམས་ལེན་གྱི་ཆོས་ཡན་གར་བ་ཞིག་གཏན་ནས་མེད། སློབ་གཉེར་ཅི་ཙམ་མང་བ་དེ་ཙམ་གྱི་ཉམས་ལེན་གྱི་ཆོས་མང་བ་ཡིན། ཡང་ལ་ལས་སློབ་གཉེར་མི་བྱེད་ཁ་བཏོན་བྱེད་ཟེར། སློབ་གཉེར་མེད་པའི་ཁ་བཏོན་ཕལ་ཆེར་རྣམ་གཡེང་དང་ཆགས་སྡང་གིས་འཁྱེར་བ་སླ། དཔེ་ཆ་ལྟ་དུས་མ་མཐའ་ན་ཡང་རྣམ་གཡེང་འགོག་ཐུབ། ཡང་ལ་ལས་ད་རྒས་ཏེ་རིག་པ་ཉམས་སོང་བས་དཔེ་ཆར་ལྟས་ཡང་མི་ཤེས་ཀི་སྙམ་པ་ནི་སློབ་གཉེར་གྱི་བཀག་རྡོ་ཡིན། ལོ་རྒས་ན་རིག་པ་དེ་ཙམ་མི་མྱུར་ཡང་རིག་པ་གཏིང་ཇེ་ཟབ་དང་རྒྱ་ཇེ་ཆེར་འགྲོ་བཞིན་ཡོད་པས་རྒས་ནས་དཔེ་ཆར་བལྟས་ན་ལྷག་པར་གོ་བ་ཡག་པོ་ཆགས་ཐུབ། རྒྱུ་མཚན་དེ་དག་གི་ཕྱིར་དཔེ་ཆར་ལྟ་བ་ཉམས་ལེན་གྱི་མཆོག་ཏུ་འཛིན་རྒྱུ་ནི་ཤིན་ཏུ་གལ་ཆེ།མི་ཚེ་གང་བོར་སློབ་གཉེར་བྱེད་པ་དང་། འཆི་དུས་དཔེ་ཆ་དང་འགྲོགས་ཏེ་འཆི་རྒྱུ་དམ་བཅའ་བརྟན་པོ་ཡོད་ན་བློ་ངན་འདི་བཟློག་ཐུབ། ལོ་ཅི་ཙམ་རྒས་ཀྱང་དཔེ་ཆ་མ་བཏང་ན་དཔེ་ཆ་བ་བཟང་བོ་ཞིག་ཏུ་འགྱུར་བར་ཐེ་ཚོམ་མེད།

༼༣༧༽
ཕུགས་བསམ་གྱི་གཤོག་པ་རང་དབང་གི་
ནམ་མཁར་རྐྱོང་རྒྱུའི་སེམས་ཤུགས་མ་ཉམས་པའི་ཡར་སྔོན་དུ།
དངོས་ཡོད་ཀྱི་འཚོ་བ་དང་སྤྱི་ཚོགས་ཀྱི་འགལ་འདུ་ཡིས་
ཉམ་ཆུང་བའི་རང་ཉིད་ཀྱི་ཚིགས་ཀ་མ་མཐོང་བའི་ཡར་སྔོན་དུ།
ངོ་སོ་དང་རྒྱུ་འབྱོར་གྱིས་རྣམ་ཤེས་ཀྱི་རྒྱུ་བ་མ་འགག་པའི་ཡར་སྔོན་དུ།
ངས་ཅིས་ཀྱང་ཁྱེད་ལ་སྙན་ངག་ཅིག་འབྲི་དགོས།

འདང་བརྩེ་ཡི་རི་མོ་དེ་
ངའི་རྣམ་ཤེས་ཀྱི་གཏིང་རུམ་ནས་མ་སུབ་གོང་།
མཛའ་དུང་གི་སྣང་བ་དེ་
ངའི་ཤ་གསེང་གི་ཁྲག་རྒྱུན་ནས་མ་སྐམ་གོང་།
ངས་གཞོན་པའི་ཁ་སྟབས་དང་སྣང་བའི་མཐོ་རླབས་ཀྱི་བར་ནས་
ཕྱིས་ཀྱང་སྙན་ངག་ཅིག་འེ་འཁྱོངས་ལྟ་དགོས།

དེ་མ་གཏོགས
ད་ལྟ་ངས་ཅི་ལའང་འགྱུར་བ་གཏོང་མི་ཐུབ་པ་ཤེས་ལ།
ད་ལྟ་ང་ཁྱེད་རང་ནང་བཞིན་རང་ཉིད་ལ་ཡིད་ཆད།