རྟག་ཏུ་ཡོན་ཏན་ལས་ནི་རྒྱལ་བ་དྲན། །
གསེར་མཆོག་མདོག་འདྲ་ཤིན་ཏུ་འོད་མཛད་པ། །
མཚན་མོ་གནམ་ལ་སྐར་མས་གང་བ་ལྟར། །
ཐུབ་པའི་སྐུ་ནི་མཚན་གྱིས་ཡོངས་སུ་རྒྱས། །
འཆག་ཅིང་འདུག་དང་འགྲེང་ཞིང་ཉལ་བ་ན། །
མི་གང་ཐུབ་པའི་ཟླ་བ་དྲན་བྱེད་པ། །
དེ་ཡི་མདུན་ན་རྟག་ཏུ་སྟོན་པ་བཞུགས། །
དེ་ནི་རྒྱ་ཆེར་མྱ་ངན་འདས་པར་འགྱུར། །
གདུགས་དང་རྒྱལ་མཚན་བླ་རེ་བ་དན་མཆོག །
ཕྱེ་མ་བྱུག་པ་མང་པོ་ཀུན་ཐོགས་ལ། །
རྟག་ཏུ་བདེ་བར་གཤེགས་ལ་མཆོད་པ་གྱིས། །
རིང་པོར་མི་ཐོགས་ཏིང་འཛིན་མཆོག་འདི་འཐོབ། །

མདོ་ཏིང་འཛིན་རྒྱལ་པོ་ལས།

࿐ ངག་དབང་བློ་གཏེར་དགྱེས་པའི་རྣམ་སྤྱོད་ཀྱིས། །
ཆོས་ཚུལ་འབུམ་གཏེར་དཔལ་ལ་དབང་འབྱོར་ཞིང་། །
ཕུན་ཚོགས་གོ་འཕང་རྙེད་པའི་དྲིན་ཅན་རྗེ། །
རྗེ་བཙུན་བླ་མའི་ཞབས་ལ་གསོལ་བ་འདེབས། །
[鲜花][鲜花][鲜花]

སྤྲིན་དཀར་གྱི་ཕུང་བོ་དེ་ཉི་རྒས་ཀྱི་ངོ་བོར་གྱུར་བ་ནས། ངས་དུས་གཏན་དུ་སྐྱབས་འཇུག་གི་དབུགས་རྒྱུན་དྲོན་མོ་དེ་ཁྱེད་ཀྱི་ཕྱོགས་སུ་སྤུར་ཞིང་། ངའི་འགྲོ་འདུག་སྤྱོད་གསུམ་གྱི་འཚོ་བ་ལ་སྔར་ལས་དབྱར་ཟླ་གསུམ་གྱི་མཛེས་སྡུག་མེད་ལ། འཇིག་རྟེན་ལ་ལོངས་སྤྱོད་ཀྱི་སྙིང་བོ་མེད་ཅིང་སྤྲོ་སྐྱིད་ཀྱི་སོ་མདངས་ཤར་སའི་སྲིད་པའི་མེ་ལོང་རྣམས་ཀྱང་ཞིག་རལ་དུ་གྱུར་ཟིན།