ནད་སོགས་ལམ་དུ་ཁྱེར་ཚུལ།

ཐོགས་མེད་ཀྱིས་མཛད།

ན་མོ་གུ་རུ།
བདག་གཞན་སྒྱུ་ལུས་ཀྱི་ཕུང་པོ་འདི།།
ན་ན་ན་སྟེ་ན་བས་དགའ།།
སྔར་བསགས་ཀྱི་ལས་ངན་འཛད་པ་ཡིན།།
ཆོས་སྤྱོད་ཀྱི་བྱ་བ་སྣ་ཚོགས་ཀྱང་།།
སྒྲིབ་གཉིས་སྦྱང་བའི་ཆེད་དུ་ཡིན།།

ན་བ་མེད་ན་མེད་དེ་དགའ།།
ལུས་སེམས་བདེ་ན་དགེ་སྦྱོར་འཕེལ།།
མི་ལུས་དོན་ཅན་བྱེད་པ་ཡང་།།
སྒོ་གསུམ་དགེ་ལ་སྦྱོར་བ་ཡིན།།

འབྱོར་བ་མེད་ན་མེད་དེ་དགའ།།
བསྲུང་བྲལ་གྱི་བྱ་བྲེལ་དེ་ལ་མེད།།
འཐབ་རྩོད་ཀྱི་ཁྲོ་འཁྲུགས་ཇི་སྙེད་པ།།
འཛིན་ཆགས་ཀྱི་ནོར་ལས་བྱུང་བར་ངེས།།

འབྱོར་པ་ཡོད་ན་ཡོད་དེ་དགའ།།
བསོད་ནམས་ཀྱི་དགེ་ཚོགས་སྤེལ་བས་ཆོག།
འཕྲལ་ཕུགས་ཀྱི་ཕན་བདེ་ཇི་སྙེད་པ།།
བསོད་ནམས་ཀྱི་འབྲས་བུ་ཡིན་པར་ངེས།།

མྱུར་དུ་ཤི་ན་ཤི་བས་དགའ།།
རྐྱེན་ངན་གྱིས་བར་དུ་མ་ཆོད་ཅིང་།།
མཚམས་སྦྱོར་གྱི་བག་ཆགས་བཟང་འགྲོགས་པས།།
མ་ནོར་གྱི་ལམ་དུ་ཚུད་པར་ངེས།།

ཡུན་དུ་གསོན་ན་གསོན་པས་དགའ།།
ཉམས་མྱོང་གི་ལོ་ཐོག་སྐྱེས་པ་ལ།།
གདམས་ངག་གི་བརླན་དྲོད་མ་ཡལ་བར།།
ཡུན་དུ་བསྟེན་པས་སྨིན་པར་འགྱུར།།
གང་ཡིན་ཡང་དགའ་བ་སྒོམས་ཤིག་ཨང་།།
ཞེས་པ་ས་སྐྱར་དགེ་བཤེས་གཅིག་གིས་ནད་ལ་སོགས་པ་བྱུང་ན་ཇི་ལྟར་བྱེད་དྲིས་པའི་ལན་དུ། ནད་ལ་སོགས་པ་ལམ་དུ་འཁྱེར་ཚུལ་འདི། ཆོས་སྨྲ་བའི་བཙུན་པ་ཐོགས་མེད་ཀྱིས་བཀོད་པའོ།། །།སརྦ་མངྒ་ལཾ།། །།

འདི་དག་ཀྱང་ཉི་མ་ལ་སྟོད་མང་ཡུལ་གོང་ཐང་སྐྱིད་གྲུང་མཐིལ་གྱི་རྗེ་མི་ལའི་སྒྲུབ་གནས་མཇལ་བ་དེའི་སྐོར་ནས་གནས་རྩ་ཆེན་འགའ་ཞིག་ཡིན། ལྷན་རྒྱས་ལ་ཁོམ་པ་ཡོད་ན་མཇལ་ཙམ་གནང་རོགས་ཞུ།

མར་མི་དྭགས་གསུམ་གྱི་ཞབས་རྗེས་འཚོལ་བ་ཞེས་པའི་གནས་མཇལ་ལས། མང་ཡུལ་གོང་ཐང་སྐྱིད་རོང་སྨད་ཀྱི་རྗེ་མི་ལའི་སྒྲུབ་གནས་སྐོར་ལ་ཅུང་ཙམ་མཇལ་བའི་སྐོར་འདི་ན་བཀོད་ཡོད། ཁྱེད་ཚོ་ལ་ཁོམ་པ་ཡོད་ན་གཟིགས་འཚལ་ལགས།