སྒོ་ལྔའི་རྣམ་ཤེས་སྒྱུ་མའི་མགྲོན་དུ་བུས།།
ཕྱི་རོལ་ཚོགས་དྲུག་རྐུན་པོའི་ཡུལ་དུ་ཆས།།
གཞོན་པའི་དུས་ཀྱི་སྣང་བ་ལང་ལང་པོར།།
རྨུག་ལོང་ཁྲོད་ཀྱི་ཀུན་གསལ་ཟླ་བ་བཞིན།།

དྲིན་ཅན་མ་ཡིས་བུ་ལ་སློབ་པ་བཞིན། ། ཕན་པར་དགོངས་ནས་ཕན་ཐབས་མཛད་པའི་ཁྲིམས། །བཤང་གཅི་འདོར་ཚུལ་ཡན་ཆད་གསུངས་པ་ཡི། །ཚུལ་འདི་བསམ་ན་སྙིང་རྩ་མི་འདར་རམ། །གཤིས་ངན་བུ་ཡིས་མ་ལ་བརྡུང་བ་བཞིན།།བཀའ་དྲིན་ལོག་པར་གཞལ་བའི་སྤྱོད་ངན་གྱིས། །ཕན་པའི་བཅས་ཁྲིམས་ཁྱད་དུ་བསད་ནས་སུ། །བསམ་བཞིན་གཡང་སར་འཕྱོང་ལ་མི་སྐྲགས་སམ། །འོན་ཀྱང་སྙིགས་མ་ལྔ་བདོའི་མུན་སྟུག་གིས། །ཕན་པའི་ལམ་དང་གནོད་པའི་གཡང་ས་ཀུན། །དབྱེར་མེད་སྒྲིབ་པའི་དམུས་ལོང་མགོ་བསྐོར་རྣམས། །ཐུགས་རྗེ་ཕྱག་གིས་ཁྲིད་ཅིག་བཅོམ་ལྡན་འདས། །

བོད་མི་ཕལ་ཆེ་བའི་གདོང་མདོག་སྐྱ་བོ་རང་མིན་པར་དམར་ཤས་ཆེ་བའི་རྒྱུ་མཚན་གྱིས་བོད་ཡུལ་ལ་གདོང་དམར་ཅན་གྱི་ཡུལ་ཞེས་ཟེར། མདོ་ལས་ཀྱང་། གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ།ཞེས་དང་། རྒྱའི་དེབ་ཐེར་དུ་བོད་མི་རྣམས་ལ་གདོང་གི་མཛེས་བྱེད་དུ་ཚོས་དམར་པོ་བགོ་བའི་གོམས་སྲོལ་ཡོད་པར་བཤད་པ་དང་། བོད་རང་གི་ཡི་གེ་རྙིང་པ་རྒྱལ་པོའི་བཀའ་ཐང་སོགས་ལས་ཀྱང་ཤ་ཟན་གདོང་དམར་ཅན་ཞེས་ཀྱང་སྣང་ངོ་།