࿐ང་ལ་བརྩེ་སེམས་ཀྱིས་ཕྱུགས་པའི་ཨ་མ་ཞིག་ཡོད།

首页发布

གཟའ་འཁོར་སྔོན་མའི་རེས་གཟའ་སྤེན་པའི་ཉིན་དེར་རང་ཉིད་ཀྱི་བརྩེ་བའི་དྲིན་ཆེན་གྱི་ཨ་མ་ལགས་ལ་ཁ་པར་ཞིག་བཏང་བ་ཡིན། ཉིན་དེ་ནི་དྲིན་ཆེན་གྱི་མ་ལོ་འཇིག་རྟེན་འདིར་ཕེབས་ནས་ལོ་ངོ་ལྔ་བཅུ་ཏག་ཏག་འཁོར་བའི་ཉིན་དེ་རེད། དེར་བརྟེན། ངས་ཨ་མ་ལགས་ལ་རྟེན་འབྲེལ་གྱི་འཚམས་འདྲི་ཞིག་ཞུ་དགོས་སྙམ། ཁ་པར་བླངས་མ་ཐག། ཁོང་གིས་ཨ་མའི་གཅེས་ཕྲུག་ཁྱེད་རང་ག་རེ་བྱེད་ཀྱི་ཡོད། ཁྱེད་རང་ན་ཡི་མི་འདུག་གམ། ཆམ་པ་འདྲ་ཕོག་མི་འདུག་གམ། བུ་རང་ནང་ལ་ག་དུས་ལོག་ཡོང་གི་ཡིན། ཨ་མ་ཁྱེད་དྲན་གྱི་འདུག་ཅེས་སོགས་ཀྱི་མཚམས་མི་ཆད་པའི་ཐུགས་ཁུར་གྱི་འདྲི་ཚིག་རེ་རེ་བདག་གི་རྣ་བའི་བུ་གར་ལྷུང་ཡོང་དུས། བདག་གི་མིག་ཀོང་མཆི་མས་བརླན་ཏེ་སེམས་ཁོང་དུ་བརྗོད་མི་ཤེས་པའི་སྐྱོ་སྣང་ལྷང་ལྷང་ཞིག་ངང་གིས་སྦྱིན་བྱུང་།

ལན་རེར་ཁ་པར་བཏང་སྟེ་ཁ་ཡག་གིས་བདེ་མཚམས་ཡིན་མིན་དྲིས་པ་ཙམ་ལས་བུ་ངས་བྱམས་ལྡན་མ་ལོ་ཁྱེད་ལ་བསྒྲུབ་འོས་པ་གང་ཡང་བསྒྲུབ་མི་ཐུབ། བརྩེ་སེམས་རྒྱ་མཚོ་ལས་ཟབ་པའི་དྲིན་ཆེན་མ་ལོས་འཚོ་བའི་དཀའ་ཚེགས་དང་ལས་ཀའི་དཀའ་ལས་འབུམ་གྱི་ཁྲོད་ནས། མ་ལོས་ང་རང་པང་དུ་འཁྱེར་ནས་ཆུ་ཟོམ་བརྒྱབ་ལ་ཁུར་ཏེ་འགྲོ་ཞིང་། ཡང་ན་ང་རང་བརྒྱབ་ཏུ་ཁུར་ཏེ་པང་དུ་ཟས་རིགས་འཁྱེར་ནས་འགྲོ་བའམ། ཡང་ན་འུར་རྡོ་རྐེད་ལ་དྲངས་ནས་ཕྱུགས་ནོར་འཚོ་བའི་གཏམ་རྒྱུད་ནི་ཕ་ཡུལ་གྱི་རི་ཀླུང་ཆུ་གསུམ་ལ་རི་མོ་ལྟར་བརྐོས་ནས་ཡོད།

ད་དུང་། མ་ལོས་དུས་སྐབས་ངེས་མེད་དུ་ང་རང་གི་ཁ་ཆུ་སྣ་ཆུ་དང་གཅིན་སྐྱག་ཡོད་ཚེད་ཀྱང་ཁ་དང་ལག་པས་ཕྱིས་པ་མ་ཟད་ང་རང་འཆམ་པ་འདྲ་བྱུང་བའམ། ཡང་རྐྱེན་ཞན་གང་ཡིན་མ་ཤེས་པར་ང་རང་ངུ་བ་མཚམས་མི་ཆད་པའི་སྐབས་ཨ་མ་ཁོང་ཡང་སྡུག་བསྔལ་ཤིན་ཏུ་ཆེ། བརྩེ་སེམས་རྒྱ་མཚོ་ལས་ཟབ་པའི་དྲིན་ཆེན་མ་ལོ། ང་ཁྱེད་ཁོ་ན་ལ་དགའ། ཁྱེད་ཀྱི་བཀའ་དྲིན་ནི་གོམ་གསུམ་བར་ནས་དྲན་བྱུང་། ཨ་མ་ལགས། ཁྱེད་སྐུ་ཚེ་བརྟན་ཅིག། ཁྱེད་ནི་བུ་ངའི་སྐྱབས་དགོན་ཡིན། ཁྱེད་ནི་བུ་ངའི་ཡོད་ཚད་དེ་ཡིན།

བདེན་སྨྱུག་ནས་བྲིས།

ངས་ནམ་རྒྱུན་དབེན་འཇགས་ཀྱི་གནས་མལ་དེ་གར། ས་སྲོད་ཀྱི་མཚམས་སྤྲིན་རི་བོའི་རྒྱབ་ཕྱོགས་སུ་དལ་བུར་བཞུད་པའི་མཛེས་སྡུག་ལ་རྒྱང་ལྟ་བྱས་ནས་སྤྲིན་པ་འདྲ་བའི་བུ་མོ་མང་པོ་ཞིག་དྲན་མྱོང་། སྤྲིན་པ་འདྲ་བའི་བུ་མོ་དེ་ཚོ། སྐྲ་ལོ་བསིལ་རླུང་གིས་སྒུལ་བའི་མཚན་ནམ་རེ་རེར། མིག་ཟུང་ལ་གབ་པའི་བརྩེ་འདང་གི་གསང་བ་དེ་དག་གིས་ཇོ་ཇོ་སུ་ཞིག་ལ་མཛའ་གཞས་གཏོང་འདོད་ཀྱི་རེ་བས་ཁེངས་ཡོད་དམ།

ཁོ་མོ་ཚོས་སྤྲིན་པ་དང་འདྲ་བར་ཇོ་ཇོ་སུ་ཞིག་གི་སེམས་པའི་གུར་ཁང་སྒུལ་མྱོང་ཨང་།

ངས་ནམ་རྒྱུན་སེམས་ཁོང་གི་ན་ཟུག་ཡོད་ཚད་ལས་ཕྱིར་མིག་གི་བགྲོད་ལམ་བཙལ་ཞིང་།

ཕྱིར་མིག་གི་བགྲོད་ལམ་སྟེང་ནས་འདས་སོང་གི་ལོ་ཟླ་དྲན་མྱོང་། ལང་ཚོ་དྲན་མྱོང་།

ངས་ནམ་རྒྱུན་ཞོགས་པ་རེ་རེ་ནས་ས་སྲོད་རེ་རེར། མཐོ་སྒང་གི་བུ་མོ་ཚོའི་ལང་ཚོ་མེ་ཏོག་དང་འདྲ་བར། ལོ་ངོ་སྟོང་ཕྲག་དུ་མར་བསིལ་རླུང་དང་ཉི་འོད་ཀྱི་ངོགས་སུ་བཞད་ཐུབ་པའི་སྨོན་ལམ་བཏབ།

[月亮]

སྐལ་རྣམ་དུ་འབོད་པས།

གུང་ཐང་ཚང་།
འཇིག་རྟེན་དབང་ཡོད་དུས་ཕ་མའི་དྲིན་ལན་འཇལ་བ། ཆོས་སྒྲུབ་པ།
དཀོན་མཆོག་གསུམ་ལ་སྨོན་ལམ་རྒྱབ་དེ་སྐྱེ་བ་ཕྱི་མར་སྐྱབས་བཅོལ་བ།
དབང་ཡོད་དུས་འདིར་འགྱོད་པ་མེད་པར་བྱེད་པ།