ཁ་གཅིག་གིས་ཐོས་བསམ་མི་དགོས་དཔེ་ཆ་བལྟ་མི་དགོས་དཔེ་ཆ་བལྟས་ན་རྣམ་རྟོག་མང་རུ་འགྲོ་བས་སེམས་གུ་ཡངས་སོས་དལ་ལྷོད་དུ་ཞོག་ལ་སྒོམ་ཞིག་ཟེར་རོ། 
དེ་ལ་ཀུན་མཁྱེན་མི་ཕམ་པས་ངེས་སྒྲོན་ལས།
བླུན་པོ་ཁ་ཅིག་དང་པོ་ནས། །ཅིར་མི་འཛིན་པར་ལྷོད་དོ་ལོ། །འགྲོ་ཀུན་ཐ་མལ་ཀློད་ཆེས་པས། །ཁམས་གསུམ་འཁོར་བར་གཏན་འཁྱམས་ན། །ད་དུང་བཀླགས་ཏེ་བསྐུལ་མི་དགོས། །ཞེས་གསུངས།

ཨ་ཁུ་ལྡོང་ཡོན་ཚང་ལ་ཐེངས་མ་གཅིག་ལ་མཇལ་མྱོང་ཡོད། སྐབས་དེར་ཁོང་གི་ཉེ་མི་དག་གིས་བླ་བྲང་བཀྲ་ཤིས་འཁྱིལ་གྱི་«ཐོས་བསམ་གླིང་»གི་གྲྭ་མང་ཡོང་ལ་བསྙེན་བཀུར་བྱེད་བཞིན་འདུག ངས་རང་གི་ངོ་ཤེས་“རྫ་ཤུལ་བཀྲ་ཤིས་རྒྱ་མཚོ་„ལ་འབྲེལ་བ་བྱས་ཏེ་ཨ་ཁུ་ལྡོང་ཡོན་ཚང་ལ་མཇལ་རྒྱུའི་གོ་སྐབས་བྱུང་བ་ཡིན། རྫ་ཤུལ་བཀྲ་ཤིས་རྒྱ་མཚོ་ནི་རྒྱུན་དུ་ཨ་ཁུ་ལྡོང་ཡོན་ཚང་གི་མདུན་ན་ཡོད་མཁན་ཞིག་དང་། «ལྡོང་ཡོན་གསུང་ཆོས་རྩོམ་སྒྲིག་ཁང་»ཞེས་པའི་འགན་འཛིན་མི་སྣ་ཞིག་ཀྱང་ཡིན། ཁོས་ང་ལ་ཕྱོགས་གང་ཐད་ནས་རྒྱབ་སྐྱོར་མང་པོ་བྱས་མྱོང་ཡོད་པས་ངས་ཁོ་ལ་བཀའ་དྲིན་མང་པོ་ཞིག་ཆད་ཡོད། གང་ལྟར་ང་རང་སྔོན་ཆད་ནས་ཨ་ཁུ་ལྡོན་ཡོན་ཚང་གི་སྙིང་སྟོབས་དང་དེང་རབས་བསམ་བློ་ལ་ཡིད་རང་བྱེད་མཁན་གྱི་གྲས་དང་གུང་བཀུར་བྱེད་མཁན་གྱི་ཁོངས་སུ་གཏོགས། དེའི་སྟབས་ཀྱིས་ཁོང་གི་སྐོར་ལ་རྩོམ་ཡིག་རེ་འགའ་དང་གཞན་ལ་ཁ་རྩོད་ཀྱང་བྱས་མྱོང་ཡོད། ཁོང་ནི་བསམ་བློ་གུ་ཡངས་ཡོད་མཁན་ཞིག་དང་གང་ཟག་རེ་རེའི་སྣང་ངོར་འཕྲོད་པའི་བསླབ་བྱ་གནང་མཁན་གྱི་སྐྱེས་བུ་ཁྱད་པར་བ་ཞིག་ཏུ་སྣང་ཡོད་ལ་དགོང་མོ་དེར་དུས་ཚོད་ཕྱེད་ཀ་ཙམ་དུ་ཕལ་ཆེར་ལྷོད་ཡང་གི་ཁ་བརྡ་ཉུང་ཙམ་བྱུང་། ད་དུང་ཁོང་གིས་ང་ལ་འཕྲིན་སྟེགས་སྣ་ཚོགས་ཤིག་ནས་ཁྱོད་ཀྱི་རྩོམ་ཡིག་རེ་འགའ་བཀླགས་མྱོང་ཡོད་ཟེར། ཁྱོད་ཀྱི་ཡོན་ཚད་ཧ་ཅང་ཡག་པོ་འདུག་རྗེས་མར་སློབ་སྦྱོང་གི་ཕྱོགས་ལ་ཧུར་བརྩོན་བྱོས་དང་ཁྱོད་ལ་རོགས་རམ་གང་ལེགས་ཡོད་ཅེས་སྐད་འཕྲིན་དང་བཅས་འབྲེལ་སོང་། ད་དུང་དཔེ་ཆ་གཅིག་གི་སྟེང་ཁོང་གི་མཚན་རྟགས་བཀོད་ནས་ང་ལ་ལེགས་སྐྱེས་སུ་གནང་བ་མ་ཟད་དགོང་ཇ་ལྷན་དུ་རོལ་བའི་གོ་སྐབས་བྱུང་། ད་ཐེངས་ཁོང་གི་«བརྩམས་ཆོས་ཕྱོགས་བསྒྲིགས»་པར་སྐྲུན་འགྲེམ་སྤེལ་མཛད་སྒོ་དཔྱད་གླེང་ཚོགས་འདུ་ལེགས་འགྲུབ་བྱུང་བ་ལ་སེམས་གཏིང་ནས་བཀྲ་ཤིས་བདེ་ལེགས་ཞུ་རྒྱུ་དང་། སྐུ་ཚེ་ལ་བར་ཆད་མེད་པར་སློབ་གསོའི་ཕྱག་ལས་ཡར་ངོའི་ཟླ་ལྟར་འཕེལ་བ་དང་བོད་དྲི་དྲོ་བའི་མི་རིགས་ཀྱི་སློབ་མ་ཁྲི་སྟོང་མང་པོ་ཞིག་སྐྱོང་ཐུབ་པར་སྨོན་འདུན་སྙིང་ནས་ཞུ།།

འདབ་པ་རྫོང་གི་ཉེ་འགྲམ་ལ་གློ་རྡེག་ཏུ་བལྟས་པ།

འདབ་པ་རྫོང་གི་ཁོར་ཡུག་མཛེས་ཤིང་དྭངས་ཤིང་གཙང་ལ་ཁང་བརྩེགས་དག་ཡིད་དུ་འོང་བ་ཞིག་འདུག  དྲོ་གྲང་ཡང་འཚམ་པོ་ཞིག་འདུག  གོ་ཐོས་ལྟར་ན་རྫོང་གི་དུད་ཚང་དག་ནི་བོད་ཀྱི་རིག་གནས་ལ་དགའ་ཕྱོགས་མེད་པ་དང་བོད་ཀྱི་རིག་གནས་ཤེས་མཁན་ཉུང་བ་དང་།
ཕ་མ་བོད་ཡིན་རུང་ལྷག་པར་དུ་ན་གཞོན་རྣམས་ཀྱིས་རྒྱ་སྐད་བཤད་པ་ལས་བོད་སྐད་བཤད་མཁན་ཉུང་ཉུང་ཡིན་པ་འདྲ།
དགོན་པ་དང་ཁད་ཉེ་བ་དག་ཅུང་བོད་ཀྱི་རིག་གནས་ལ་ཆ་རྒྱུས་ཡོད་པ་ཅུང་དྲག་ཤོས་ཡིན་པ་འདྲ། ཧོར་གྱིས་བལྟས་ཡོང་ན་བོད་ཀྱི་རིག་གནས་ལ་དོ་སྣང་ཆེར་མེད་པའི་སྣང་ཚུལ་མངོན་ཡོང་གིན་འདུག
དཔེར་མཚོན་འགའ་དྲངས་ན་སྤོང་ཕུག་དགོན།  སྤང་ཕུག་དགོན།
འབྲུག་རྗེས་དགོན།   འབྲུག་རྗེ་དགོན།  ཉི་རྟེན།  ཉིན་སྟེང་ཟེར་བདག་ལས་ཤེས་ནུས་སོ།། མིང་དག་པ་གང་ཡིན་པ་དང་མ་དག་པ་གང་ཡིན་མི་ཤེས་པའི་ཚད་དུ་འདུག   ཡང་མིན་ན་བརྟན་ཁེལ་གྱི་མིང་ཞིག་མེད་པའམ་འབྲི་ཚུལ་དུ་མ་ཡོད་པ་གང་ཡིན་ཆ་མ་འཚལ་ལོ།།
མདོར་ན་འདབ་པ་ལ་ནགས་རི་དང་སྤང་རི་ཡོད་པ།
ཞིང་ཁ་དང་འབྲོག་ས་གཉིས་ཀ་ཡོད་པ།
གཅན་གཟན་འདྲ་མིན་ཡོད་པ། ཡུལ་མི་ཚོས་བཤད་ན་སྟག་ཡོད་པའི་སྐད་ཆ་ཞིག་ཀྱང་འདུག 
ཁྱད་པར་དུ་དུད་ཚང་དག་གི་ཁང་པ་ནི་དགོན་པ་ཆུང་ཆུང་ཚོའི་ཚོགས་ཆེན་འདུ་ཁང་ལས་ཀྱང་ཆེ་བ་ཞིག་འདུག
དུད་ཚང་གི་ཇ་ཁང་ནི་དགོན་ཆུང་ཞིག་གི་ཇ་ཁང་ལས་ཀྱང་ཆེ་བ་གདོན་མི་ཟའོ།།  དུད་ཚང་ཞིག་གི་ཇ་ཁང་ལ་ཀ་བ་ཉེར་གསུམ་ཡོད་ཟེར་གི་འདུག ཁང་པ་གཅིག་ནང་དུ་འགྲོན་པོ་བརྒྱ་ཕྲག་ཙམ་ཞིག་ཤོང་མི་ཤོང་མེད་པ་ཞིག་འདུག ཁོ་བོར་མཚོན་ན་དེ་འདྲའི་ཀ་བ་ཉེར་གསུམ་ཅན་སྒེར་གྱི་ཇ་ཁང་ཆེན་པོ་དེ་འདྲའི་ནང་སོང་བ་ཐེངས་དང་པོ་ཡིན།
མདོར་བསྡུས་ཏེ་བཤད་ན་འདབ་པ་རྫོང་གི་ཁོ་ར་ཁོར་ཡུག་དང་དུད་ཚང་གི་ཁང་པའི་བཟོ་བཀོད་ས་ཆའི་མཛེས་སྡུག་སོགས་ཡིད་དུ་འཐད་ཅིང་བློས་མི་ཐོངས་པ་ཞིག་རེད།
ཡིད་སྐྱོ་དགོས་པ་ཞིག་ལ་སློབ་མ་ཁ་ཤས་དང་འཕྲད་སོང་ཁོ་རང་ཚོ་ཕན་ཚུན་བར་དུ་རྒྱ་སྐད་རྐྱང་རྐྱང་བཤད་བཞིན་འདུག་ངོ་མདོག་མ་གཏོགས་རྒྱ་དང་ཁྱད་པར་མེད་པར་ངེས།
ད་དུང་དེ་ཙམ་གྱིས་ག་ལ་ཚད་དཔེ་ཁང་ཞིག་ཏུ་འགྲོ་འདོད་དེ་དཔེ་ཁང་གར་ཡོད་དྲིས་པས་གྲོགས་པོས་བཤད་པ་ལྟར་ན་འདབ་པ་རྫོང་དུ་དཔེ་ཁང་གཅིག་ཀྱང་མེད་པ་མ་ཟད་འདབ་པའི་མིས་དཔེ་ཆར་མི་བལྟ་ཟེར་བ་དེའོ།།

སྙན་སྲས།
​