ངའི་སེམས་ཁོང་གི་བླ་རུང་།

རྨེ་སྤྲུལ།

འཇིག་རྟེན་གྱི་ཚེ་སྲོག་ཏུ་འབར་བའི་སྒྲོན་མེ་འོད་ཆེན།
སྙིགས་དུས་ཀྱི་མུན་ཀློང་ན་བཤད་སྒྲུབ་ཀྱི་གཟི་མདངས་འཕྲོ་བའི་རྒྱལ་བསྟན་གྱི་ཕ་ཁྱིམ་གཙང་མ།

ངའི་སེམས་ཁོང་གི་བླ་རུང་།
དགེ་བཅུའི་ཕུན་ཚོགས་དར་བའི་མི་ཡུལ་གྱི་དག་ཞིང་འདིར།
ཟབ་ཆོས་ཀྱི་མངར་ཁ་ལྡག་པའི་རིས་མེད་ཀྱི་མགྲོན་པོ་དག
སྐྱེད་ཚལ་གྱི་བུང་བ་ཇི་བཞིན་བྱིན་རླབས་དང་དངོས་གྲུབ་ཀྱི་ཚལ་ན་འཚང་ཁ་རྒྱག

ངའི་སེམས་ཁོང་གི་བླ་རུང་།
རིག་གནས་ཀྱི་ཟུངས་ཁྲག་འཁྱིལ་བའི་ནང་བསྟན་གྱི་ནགས་ཀློང་སྟུག་པོར་ཤེས་རིག་གི་ནེམ་ལོ་འཐབ་པའི་ལྗོན་རྩེ་ན།
ཁུ་བྱུག་གི་མགྲིན་གླུ་ཇི་བཞིན་ངོ་མཚར་གྱི་གྲགས་སྙན་དྭངས་མོས།
སྲིད་པའི་ལྷིང་འཇགས་ཀྱི་རྨི་ལམ་ལྷོད་ཀྱིས་དཀྲོགས།

ངའི་སེམས་ཁོང་གི་བླ་རུང་།
ངག་རིག་དང་འཆད་རྩོད་ཀྱི་སྤྲིན་པ་འཁྲིགས་པའི་མཁའ་དབྱིངས་ཡངས་པོ།
རླབས་ཆེན་གྱི་མཛད་རྗེས་དང་གཞན་ཕན་གྱི་ལྷག་བསམ་བཀྲ་བའི་བཤེས་གཉེན་དག
ཉི་ཟླ་དང་སྐར་ཚོགས་ཇི་བཞིན་ཁྱེད་ཀྱི་གུར་ཁྱིམ་ནས་འགྲོ་དྲུག་གི་རྨོངས་པ་སེལ་བའི་དཔལ་དུ་ཤར།

ངའི་སེམས་ཁོང་གི་བླ་རུང་།

རྨི་ལམ་རབ་རིབ་ནང་གི་དྲན་པ་མོད་པོ། །
དྲན་པའི་གསེང་ལ་བསྐུང་པའི་ཡིག་ཆུང་དཀར་པོ། །
ལས་ཀྱི་དགུ་ཚིགས་མཐོངས་ནས་རྙེད་ཐབས་མེད་ཀྱང་། །
སྣང་བའི་རབ་ཁ་དེད་དེ་སྲོད་ནས་མཐོང་བྱུང་། །

ཡོད་ཚད་ལས་དབང་ཡིན།
ཡོད་ཚད་མཐོང་སྣང་ཡིན།
ཡོད་ཚད་མཐའ་མཇུག་མེད་པའི་དབུ་ཚུགས་ཡིན།
ཡོད་ཚད་དོན་འབྲས་མེད་པའི་བརྩོན་ལེན་ཡིན།
དགའ་སྣང་ཡོད་ཚད་ལ་འཛུམ་མདངས་མེད།
དཀའ་སྡུག་ཡོད་ཚད་ལ་མིག་ཆུ་མེད།
སྨྲ་བརྗོད་ཡོད་ཚད་ལ་རང་དབང་མེད།
འགྲོགས་འདྲེས་ཡོད་ཚད་ཐོ་མ་ཡིན།
སྔར་བྱས་ཡོད་ཚད་རྨི་ལམ་དུ་ཡོད།

རེ་འདུན་ཡོད་ཚད་ཀྱིས་འགྲེལ་བ་རེ་འཁྱེར་ཞིང་།
དད་འདུན་ཡོད་ཚད་ལ་འཁུན་སྒྲ་རེ་ཡོད་ངེས།
ཐོལ་བྱུང་ཡོད་ཚད་ལ་ལྷིང་འཇགས་སྐད་ཅིག་ཙམ་ཡོད་སྲིད།
ཤི་བ་ཡོད་ཚད་ལ་བྲག་ཅ་རིང་པོ་རེ་ཡོད་ངེས།