ཟླ་བྲལ་དབྱངས་ཀྱི་ལྷ།

རྒྱུད་མངས་སྙན་འཇེབས་སྒྲ་ཡི་རོ་འཛིན་ཅིང་ ། །
དྲུག་འགྱུར་མགྲིན་པ་དབྱངས་ཀྱི་རབ་བཏགས་ཏེ། །
འགྱུར་ཁུགས་ངག་གི་མཆོད་སྤྲིན་རྣམ་པར་བཞད། །
སྒྲ་འཛིན་དབང་པོས་ཡིད་དབང་འགུགས་ལ་ལྟོས། །

རབ་སྙན་དབྱངས་ཅན་ལྷ་མོའི་བྱིན་འོད་ཕོག །
གྲེ་འགྱུར་ཟླ་བྲལ་ཁྱེད་འདྲ་སྲིད་ན་དཀོན། །
སྙན་ཚིག་དབྱར་གྱི་ཁུ་བྱུག་ལས་ཀྱང་སྙན། །
སེམས་ཀྱི་དཀྱིལ་ན་སྙན་པའི་གསོན་དྲི་ཐུལ། །

སྙན་འཇེབས་འགྲན་པའི་ཟླ་བྲལ་མཚུངས་པ་མེད། །
སྒྲ་འཛིན་དབང་པོ་ཁྱེད་གསུང་ཕྱོགས་སུ་ཤོར། །
འཇམ་སྙན་ཡིད་འཕྲོག་སྒྲ་དབྱངས་སྟོང་ལྡན་མ། །
ཡིད་དབང་ལྷ་ཡི་རམ་འདེགས་བྱེད་པས་ཀྱང་། །

འཛུམ་བརྩེ་འཚོལ་གྱིས།

རྨི་ལམ་རབ་རིབ་ནང་གི་དྲན་པ་མོད་པོ། །
དྲན་པའི་གསེང་ལ་བསྐུང་པའི་ཡིག་ཆུང་དཀར་པོ། །
ལས་ཀྱི་དགུ་ཚིགས་མཐོངས་ནས་རྙེད་ཐབས་མེད་ཀྱང་། །
སྣང་བའི་རབ་ཁ་དེད་དེ་སྲོད་ནས་མཐོང་བྱུང་། །

ཡིད་འོང་དབེན་པའི་རི་ངོགས་ཉམས་དགའ་རུ། །
ཆོས་མཆེད་རྐང་དྲུག་གཞོན་ནུའི་ཚོགས་དག་དང་། །
ཟབ་གནད་རྒྱ་མཚོའི་བཅུད་བཟང་མྱོང་བ་ཡི། །
སྐལ་བཟང་ཐོབ་པས་བདག་ཡིད་ཤིན་ཏུ་འཚེངས། །