གཉིད་དུ་བྱིང་བའི་ལོ་ཟླ རྩི་ཐབས་བྲལ།
གློ་སྙིང་ལ་ཐིམ་པའི་ཕུགས་འདུན་དག།
སྒྱུ་མའི་རང་བཞིན་དུ་མངོན་ནས་བདེན་པར་བཟུང་།
ཅི་ཡང་མེད་པ་ཞིག་དང་མཚུངས་བར་གདའ་།
གཟུགས་ཅན་གདོས་བཅས་ཀྱིས་
མི་ཚེའི་རབ་ཁ་རུ་མཚོན་གྱིས་གཙེས།
ཐ་ན་

འཚོ་བས་ཀྱང་ལྷག་ཏུ་གཙེས།
དེ་དུས་ཀྱི་ཁྱོད་ནི
འཁྱམས་ཉུལ་གྱི་རྣམ་ཤེས་འཁྱག་རོ་ཞིག།
སུས་ཀྱང་མཐོང་ཐབས་བྲལ།

ཆེ་བ་བཅུ་དྲུག་གི་བསྟོད་ཚིག་དད་པའི་པད་མོ་འཛུམ་པའི་ཉིན་བྱེད།

ཀ་བཞི་འཇམ་དབྱངས་བསམ་གཏན།

དད་པའི་ལྷ་ལམ་དུ་བླ་མ་མཆོག།
མཆོག་སྤྲུལ་ཉིན་བྱེད་ཀྱི་དབང་པོ་བརྗིད།།
བརྗིད་ཆགས་གསང་གསུམ་གྱི་གཟི་འོད་དེ།།
དེ་རིང་བསྔགས་བརྗོད་ཀྱི་མགྲིན་གླུ་ལེན།།
ལི་ཁྲིའི་མདངས་ལྡན་གྱི་མཚམས་སྤྲིན་དེ།།
གང་སྐུ་མཐའ་བྲལ་ལ་རྒྱན་དུ་ཆེ།།
མཚན་དང་དཔེ་བྱད་ཀྱི་དབང་གཞུ་དེ།།
གཟུགས་སྐུ་ལྷ་ལམ་ལ་རྒྱན་དུ་ཆེ།།
བརྗིད་ཆགས་ཟིལ་གནོན་གྱི་གཟི་འོད་དེ།།
ཁྱེད་སྐུ་ཉིན་བྱེད་ལ་རྒྱན་དུ་ཆེ།།
རྣམ་འབྱེད་ཤེས་རབ་ཀྱི་རལ་གྲི་དེ།།
མཉེན་ལྕུག་ཕྱག་སོར་ལ་རྒྱན་དུ་ཆེ།།
ཡན་ལག་དྲུག་ཅུ་ཡི་གསུངས་དབྱངས་དེ།།
མགྲིན་པའི་འཁོར་ལོ་ལ་རྒྱན་དུ་ཆེ།།
དྲི་མེད་ལེགས་བཤད་ཀྱི་གློག་ཕྲེང་དེ།།
ཟབ་གསུང་ཆུ་འཛིན་ལ་རྒྱན་དུ་ཆེ།།
འཇམ་སྙན་ཡིད་འོང་གི་ཚིག་རིས་རེ།།
སྐལ་ལྡན་ཐོས་འཛིན་ལ་རྒྱན་དུ་ཆེ།།
གཞུང་མཆོག་ཤེར་ཕྱིན་གྱི་པོ་ཏི་དེ།།
ཕྱག་གི་འདབ་སྟོང་ལ་རྒྱན་དུ་ཆེ།།
རྣམ་དག་ཚུལ་ཁྲིམས་ཀྱི་དྲི་བསུང་དེ།།
ཐུགས་རྒྱུད་པད་མོ་ལ་རྒྱན་དུ་ཆེ།།
གཡོ་མེད་ཏིང་འཛིན་གྱི་རི་དབང་དེ།།
ཁྱེད་ཐུགས་དབྱིག་འཛིན་ལ་རྒྱན་དུ་ཆེ།།
གནས་ལྔ་རིག་པ་ཡི་རླབ་ཕྲེང་དེ།།
ཐུགས་ཀྱི་ཆུ་གཏེར་ལ་རྒྱན་དུ་ཆེ།།
འགྲོ་ཀུན་སྙིང་བརྩེ་ཡི་བསིལ་ཟེར་དེ།།
ཐར་འདོད་ཀུན་མུད་ལ་རྒྱན་དུ་ཆེ།།
འཆད་རྩོད་རྩོམ་པ་ཡི་མཛད་བཟང་དེ།།
མཁས་པའི་དབང་པོ་ཁྱོད་རྒྱན་དུ་ཆེ།།
མཛན་འཕྲིན་འོད་སྟོང་གི་ཟེར་བརྒྱ་དེ།།
རྣམ་ཐར་ལྷ་ལམ་ལ་རྒྱན་དུ་ཆེ།།
བསྟན་འཛིན་རྒྱུ་སྐར་ཀྱི་ཕྲེང་བ་ལས།།
འདྲེན་མཆོག་ཟླ་བ་ཁྱོད་རྒྱན་དུ་ཆེ།།
གྲངས་མེད་གདུལ་བྱ་ཡི་སྤྱི་བོ་རུ།།
རིག་ལྡན་རྣམ་སྤྲུལ་ཁྱོད་རྒྱན་དུ་ཆེ།།
ཆེ་བ་བཅུ་དྲུག་གི་བསྟོད་ཚིག་འདི།།
དད་དམ་གཙང་མ་ཡི་ཀློངས་ལས་བརྡོལ།།
ཚེ་རབས་ཕྲེང་རྒྱུད་དུ་འདྲེན་མཆོག་ཁྱེད།།
འབྲལ་མེད་རྗེས་འཛིན་གྱི་སྨོན་ལམ་འདེབས།།

གུང་ཐང་མཆོག་སྤྲུལ་རིན་པོ་ཆེ་༧འཇམ་དབྱངས་བླ་མ་བློ་བཟང་དགེ་ལེགས་བསྟན་པའི་མཁན་ཆེན་མཆོག་གིས་རབ་བྱུང་བཅུ་བདུན་པའི་མཛེས་བྱེད་ཆུ་ཡོས་ལོའི་བཟང་ཟླའི་དཀར་ཕྱོགས་རྒྱལ་བ་དང་པོ་ནས་དཔལ་དུས་ཀྱི་འཁོར་ལོའིདབང་གནང་སྐབས་སུ་བྲིས་པ་དགེའོ།།

ཀ༽ལ་པིང་ཀའི་མགྲིན་དབྱངས་མངོན་པར་མཐོ། །
ཁ༽བའི་ལྗོངས་ལ་ཆོས་ཀྱི་སྒྲ་དབྱངས་གྲགས། །
ག༽ས་གང་དུ་གདུལ་བྱའི་རྨོངས་མུན་སེལ། །
ང༽ཡི་སྟོན་པ་འཇམ་དཔལ་བློ་ཤེས་བསྟོད། །