༄༅༎ ཨ་མས་ངའི་སྐྲ་ལོ་རིང་ནས་བརྫད་འདུག་གསུངས། དགའ་མས་ངའི་མིག་ཟུང་ཡོར་ནས་སྐྲག་སོང་ཟེར། ཤ་ཉེ་དག་གིས་ང་རང་བོང་རྗི་དང་འདྲ་བོ་འདུག་ཅེས་བཤད། གྲོགས་པོ་འགའ་ཡིས་ངའི་སྣ་སོགས་འཁྱོག་འདུག་ཟེར།

མི་ཚེའི་སློབ་ཚན་བདུན།
སློབ་ཚན་དང་པོ།
ཁྱོད་ལ་ལྟད་མོ་བ་མང་པོ་མེད་པས་སྤོབས་པ་ཆེར་བསྐྱེད་གྱིས།
སློབ་ཚན་གཉིས་པ།
ཁྱོད་སུས་ཀྱང་གྲོགས་པོ་བཟང་ཤོས་མིན། སུ་སུའི་གྲོགས་གཅིག་པུའང་མིན།
སློབ་ཚན་གསུམ་པ།
རང་ཉིད་དཀྱུས་མ་དང་མི་མཛེས་པ་ཡིན་པ་དང་ལེན་བྱེད་དགོས། མི་ཚེ་ནི་ཉམས་སུ་མྱོང་དགོས་པ་ལས་གར་དུ་འཁྲབ་རྒྱུ་ཞིག་མིན།
སློབ་ཚན་བཞི་པ།
རང་ཉིད་ལ་གཞན་གྱིས་ཅི་ལྟར་འཛིན་ཡང་རང་གིས་རང་ལ་ཡིད་ཆེས་བྱེད་དགོས།
སློབ་ཚན་ལྔ་པ།
ཐམས་ཅད་དང་ལེན་བྱེད་མི་ཉེན་པ་ཤེས་དགོས།
སློབ་ཚན་དྲུག་པ།
འཇིག་རྟེན་ཐོག་བདེ་ཐང་ལས་གཞན་པའི་ནོར་མཆོག་ཅིག་མེད །
སློབ་ཚན་བདུན་པ།
གཞན་གཅེས་སྤྲས་བྱེད་པའི་སྔོན་རང་ཉིད་གཅེས་དགོས།

མང་ཐོས་རི་དྭགས་རྒྱུ་བའི་ནགས་ཁྲོད་ན། །
དབུ་ཚད་བདེན་པའི་སེང་གེ་འགྱིང་བ་པོ། །
ཇོ་མོ་གླང་མའི་ལྕགས་རི་འཕྲེད་ཀྱིས་བརྟོལ། །
རིག་པས་རྒྱལ་ཁམས་འགྲིམས་པའི་ལྡོམ་བུ་པ། །

ལོ་རྒྱུས་གནའ་བོའི་གཡང་ཊི་བསྔོགས་པ་ནས། །
ལྟ་བའི་གསེར་གྱི་གཉའ་ཤིང་བསླངས་པའི་བར། །
དབྱངས་ཅན་རྒྱུད་མངས་ལེན་པའི་བརྩམས་ཆོས་ཡན། །
དུས་ཀྱི་མཐའ་འདིར་ཉི་ཟླའི་འོད་བཞིན་འཁོར། །

སེང་ལྡེང་ནགས་ཀྱི་སྒྲོལ་མའི་ཐུགས་རྗེའི་འོད། །
སྐྱོ་བའི་སེམས་པ་ལྡིང་བའི་ན་བུན་གཉིས། །
ཆང་གི་བདུད་རྩི་འདྲེས་པའི་གསེར་སྐྱེམས་དེ། །
ཡང་ཡང་བཏུངས་པའི་དྲང་སྲོང་བྱ་བཏང་པ། །

དེ་ལྟར་རིན་ཆེན་བཻཌཱུར་བུམ་པ་སྟེ། །
ཀུན་འདུས་རིག་པའི་གླེགས་བམ་ཆེན་མོ་ཉིད། །
ལང་ཚོའི་བླ་ཤིང་ཆག་པའི་ཉིན་ཞག་འདི། །
དྲན་པའི་གློ་བ་བསྒུལ་བའི་ཚིག་གཅིག་ཐལ། །

བོད་ཟླ་བརྒྱད་པའི་ཚེས་བཞི་ལ་རྨོག་གིས།