ཐམས་ཅད་འགྲུབ་ཐུབ་པ་དང་མགུ་ཐུབ་པ་ཞིག་ཡོང་མི་སྲིད་པས་གཞན་གྱི་ངོ་སྲུང་གི་ཆེད་དུ་རང་ཉིད་ཀྱི་མི་གཞི་འཕྲོ་བརླག་མ་གཏོང་།
一切都不可能做到和满足，不要为了别人的面子而浪费自己的人格。

ནམ་ཟླ་སྟོན་ཟླ་མགོ་མར་རླུང་བུས་ལྡང་།།
འདབ་ཆགས་སྣ་ཚོགས་ནམ་མཁའི་དབྱིངས་སུ་སྙེག །
ལྗོན་ཤིང་ཡལ་འདབ་ས་ལ་ཟགས་པའི་དུས།།
སེམས་པའི་གཏིང་ལ་གྲང་བའི་བསིལ་སྣང་ཟུག །

མཁས་དབང་དགེ་ཆོས་ཀྱི་སྙན་ངག་འདུ་འབྲལ་སྒྱུ་མར་རྟོགས་པའི་གླུའི་ཕྲན་དཔྱད།

______སྤྱང་གུ་རུ་འཇིགས་མེད།
མི་ཚེ་ནི་རླུང་ནང་གི་མར་མེ་བཞིན་དུ་གནོད་པ་མང་ལ། མེས་ཚིག་བཞིན་པའི་སྤོས་རྐང་བཞིན་སྣོན་མེད་འགྲིབ་པ་དང་བཅས་པའི་ཕྱིར་ན་རྩོམ་པ་པོའི་རྣམ་དཔྱོད་ཀྱི་རྩལ་དང་། མཁས་པའི་ཉམས་མྱོང་གིས་གྱེས་བྲལ་གྱི་ན་ཟུག་ལྕི་མོ་སྙན་འཇེབས་ཀྱི་ཚིག་ལ་དྲངས་ཤིང་བརྗོད་བྱའི་གནད་ལ་དོན་གྱི་མྱོང་བ་ཟབ་མོས་ཀློག་པ་པོའི་ཡིད་དབང་འགུག་ནུས་ཤིང་སེམས་འགུལ་སྟེར་ཐུབ་པ། དཔེར་ན།སྲིད་པའི་འབྱོར་བ་ལ་ཁའི་ན་བུན།། འདུས་པའི་གཉེན་གྲོགས་ཚོང་འདུས་འགྲོན་པོ། །མ་ངེས་སྐྱིད་སྡུག་མདང་གི་རྨི་ལམ།།བསམ་ཞིང་བསམ་ན་སྙིང་པོ་མི་འདུག།ཅེས་པས་རྩོམ་པ་པོའི་ཤེས་རབ་ཀྱི་རྟོགས་པ་མཚོན་པའི་སྒོ་ནས་འཇིག་རྟེན་གྱི་ཕུན་ཚོགས་དང་བདེ་སྡུག་ཡོད་ཚད་མི་རྟག་པ་དང་ཆོས་ཉིད་ཀྱི་ངོས་ན་སྙིང་པོ་མེད་པ་རྨི་ལམ་ལྟ་བུར་བརྗོད་ཅིང་།མ་བརྟགས་སེམས་ཀྱི་འཆར་ཚུལ་ཞིག་ལ།།ད་དུང་དྲུང་ན་ཡོད་ཡོད་འདྲ་བ།།དྲན་པའི་གཞུ་མོ་ནང་དུ་བཀུག་ཚེ།།སྙིང་ཁོང་སྟོང་བའི་རྒྱུ་ལས་མི་འདུག། ཅེས་པས་འགྲོ་བ་ཀུན་ལ་ཡོད་པའི་ཞེན་པ་དང་འཁྲུལ་བའི་དབང་གིས་མེད་ཀྱང་ཡོད་ཡོད་དུ་སྣང་བའི་ཕལ་བའི་བག་ཆགས་ཀྱི་ཞེན་པ་མཚོན་པར་བྱས་ཏེ་རྟོགས་པར་དཀའ་བའི་རྩོམ་པ་པོའི་སེམས་ཀྱི་སྐྱོ་གདུང་དང་སྡུག་བསྔལ་གཟུགས་སུ་བཀོད་ནས་ཀུན་ལ་མངོན་པར་བྱས་པ་འདིས། ཀློག་པ་པོ་ཀུན་ལ་རང་གི་མཐའ་བསྐོར་གྱི་གྲོགས་པོ་དང་གཉེན་ཉེ། བཟའ་མི་དང་ཕ་མ་སོགས་དང་ལྷན་དུ་འཛོམས་པའི་སྐབས་སུ་དེ་ལ་གཅེས་སྤྲས་དང་བརྩེ་བས་སྐྱོང་དགོས་པའི་ངེས་ཤེས་དེ་ཡང་ངམ་ངམ་ཤུགས་ཀྱིས་སྟེར་འོང་།