སྐྱེ་འཆི།

མཁན་ཆེན་བསོད་དར་རྒྱས། ‍‍     

ཚེ་སྲོག་ཅེས་པ་ནི། རོལ་མོ་མཁན་གྱི་རོལ་མོའི་བརྩམས་ཆོས་སུ། རྒྱང་རིང་གི་ཐོག་ཁང་ནས་གྲགས་འོང་བའི་གླིང་བུའི་སྒྲ་གཉོམ་ལ་རིང་བ་དེ་ཡིན་ཞིང་། རྩོམ་རིག་མཁན་གྱི་སྙུག་འོག་ཏུ། མྱ་ངམ་ཐང་ནས་བཞུར་འོང་བའི་དྭངས་བསིལ་གྱི་ཆུ་ཕྲན་དེ་ཡིན། སྤྱི་ཚོགས་རིག་པ་བའི་མིག་ནང་དུ། བར་མེད་དུ་རྒྱུག་བཞིན་པའི་འདོད་སྲེད་ཀྱི་མེ་འཁོར་ཞིག་ཡིན། ཚེ་སྲོག་ཅེས་པ་ནི་སྙན་ངག་གི་ཉམས་ཀྱིས་ཕྱུར་བུར་གཏམས་ཡོད་ཅིང་རི་མོའི་མཚར་སྡུག་གིས་ལྷུག་གེར་གང་ཡོད། ཟབ་དྲགས་ཏེ་གཏིང་མི་དཔོག་པ་ཞིག་ཀྱང་རེད། ས་ལྒང་གི་འཁོར་འགྲོས་དང་བསྟུན་ནས། འགྲོ་བ་མིའི་རིགས་ཀྱིས་ཕྱི་དངོས་པོའི་རིག་གནས་ཕུན་སུམ་ཚོགས་པ་ཞིག་བསྐྲུན་པར་བྱས། ཡིན་ཡང་། ཚེ་སྲོག་གི་ཤེས་བྱ་ནི་གནའ་བོའི་ཨེ་ཅེབ་རིག་གནས་ཀྱིས་ཤུལ་དུ་བཞག་པའི་གསང་བ་རིང་མོ་དང་འདྲ་བར་ནུབ་ཕྱོགས་པ་ལ་བགྲོད་པར་དཀའ་བའི་ས་དོང་ཆེན་མོ་ཞིག་ཏུ་གྱུར།

ཇི་སྲིད་རབ་འབྱམས་པ་ཨེ་ཝེན་སི་ཡིས། སྐྱེ་འཆིའི་གསང་བ་ཐོགས་པ་མེད་པར་བཀྲོལ་བའི་བོད་བརྒྱུད་ནང་བསྟན་གྱི་གཞུང་ལུགས་བར་དོ་ཐོས་གྲོལ་ཆེན་མོ་བྱ་བ་དབྱིན་ཡིག་ཏུ་བསྒྱུར་ཏེ་པར་བ་ནས་བཟུང་། ནུབ་ཕྱོགས་སུ་འགྲོ་བ་མིའི་རིགས་ཀྱི་རྣམ་ཤེས་རིག་པའི་སྐོར་གྱི་སྟོང་ཆ་གསོ་བར་བྱས། དེབ་དེ་ལ་ནུབ་ཕྱོགས་སྤྱི་ཚོགས་ཀྱི་ཕྱོགས་སོ་སོ་ནས་དོ་སྣང་ཆེན་མོ་བྱུང་ཞིང་སྐད་ཡིག་དུ་མར་བསྒྱུར། ཤེག་སི་པེར་གྱི་སྙུག་འོག་གི་ཧམ་ལེ་བྲིའི་ཟློས་གར་བྱ་བ་ལས། རྟག་ཏུ་སྐྱེ་བ་དང་འཆི་བ་ལ་བསམ་གཞིག་བྱས་ཀྱང་མཐར་སྐྱོ་གར་གྱིས་མཇུག་རྫོགས་པའི་རྒྱལ་སྲས་དེ་དང་མི་འདྲ་བར། མི་རྣམས་ཀྱིས་སྐྱེ་བ་དང་འཆི་བའི་གནད་དོན་སྐོར་ལ་ད་གདོད་གཟབ་ནན་གྱིས་བསམ་བློ་གཏོང་མགོ་ཚུགས། དེང་རབས་ཀྱི་མི་རྣམས་ཀྱིས་ཇི་ལྟར་འཆི་བ་ལ་གདོང་ལེན་བྱེད་དགོས་ཚུལ་བརྗོད་སྙིང་ཏུ་བཟུང་ནས་ཚེ་མཐར་བྱམས་སྐྱོང་བྱེད་སའི་སྡེ་ཁག་སྤང་ལ་ཤྭ་མོ་བརྡོལ་བ་ལྟ་བུར་མང་པོ་བཙུགས། 

  དེ་དག་ལས་ནམ་དྷ་སི་ཡིས་བཙུགས་པའི་ཚེ་མཐའི་བྱམས་སྐྱོང་སྡེ་ཁག་དེས་ངན་སྐྲན་དང་ཨེ་ཛིའི་ནད་རྙིང་ཕོག་པའི་ནད་པ་རྣམས་ལ་ཞབས་ཞུ་གཙོ་བོར་བསྒྲུབས་པ་རེད། ཁོ་ཚོས་ནད་པ་ཕ་མ་ལྟ་བུར་བརྩི་ཞིང་། ནད་པ་ལ་ནད་ཁམས་འདྲི། སྡུག་བསྔལ་ལ་བདག་གཞན་བརྗེས་ནས་རེ་ཆད་ཀྱི་གཡང་ལས་རེ་བ་འཚོལ་བའི་རོགས་རམ་མཛད།     ཁོ་དངོས་སུ་ཨ་རིའི་གྲོང་ཁྱེར་སིན་ཧྥི་རན་སི་ཁོར་འཆི་ལ་ཉེ་བའི་བྷི་རོ་སིར། ཁོས་བར་དོ་ཐོས་གྲོལ་ལས་བསླབས་པའི་གདམས་ངག་སྟེ། སྡུག་བསྔལ་ལ་མི་འཇིགས་ཤིང་སྡིག་པ་ལ་བག་མི་ཚ་བར་རང་སེམས་ལྷོད་དུ་ཕབ་ནས་སེམས་ཀྱི་རང་བཞིན་འོད་གསལ་བའི་རང་ངོ་ཤེས་དགོས་ཞེས་པ་སློབ་ཏུ་སོང་། ནམ་དྷ་སི་ཡི་བསླབ་སྟོན་གྱིས་སྡུག་བསྔལ་གྱིས་བག་འཁུམ་པོར་སོང་བའི་བྷི་རོ་སིའི་ངོ་གདོང་ག་ལེར་རང་སོར་ཆུད་ཅིང་ལྷིང་འཇགས་ཀྱི་ངང་ནས་ཞི་བར་ཚེ་འཕོས། 

   ནུབ་ཕྱོགས་པའི་མི་རྣམས་ཧང་སང་དུ་འཇུག་པ་ཞིག་ནི། བོད་མི་རྒས་པ་ཕལ་མོ་ཆེ་ཆུང་དུས་ནས་ཇི་ལྟར་འཆི་བ་ལ་གདོང་ལེན་དགོས་པར་སྦྱོང་བརྡར་ལེགས་པོ་ཐོབ་ཡོད་པས་ཚེ་མཐའི་བྱམས་སྐྱོང་སྐོར་གྱི་ཆེད་མཁས་པར་གྱུར་ཡོད་པ་རེད། ཆོས་པ་མང་པོས་དམ་པ་གོང་མའི་གདམས་ངག་མང་པོ་ཐུགས་ཉམས་སུ་བཞེས་ཤིང་། འཆི་བ་ནི་གདོས་བཅས་ཤ་ཁྲག་གི་ཕུང་པོ་ཤུལ་དུ་བསྐྱུར་ནས་ཐར་པའི་སྐམ་ས་ཆེན་མོར་བགྲོད་པའི་གོ་སྐབས་ཤིག་ཏུ་རྩི། མི་ཕལ་བ་རྣམས་ཀྱིས་ཀྱང་འཆི་བ་ནི་ཚེ་སྲོག་གི་གནས་ཁང་བརྗེ་བ་ཙམ་ལ་ལྟ་བས། ནུབ་ཕྱོགས་པའི་མི་རྣམས་འཆི་ལ་ཐུག་དུས་ཅི་བྱ་གཏོལ་མེད་དུ་འགྱུར་ཞིང་སྨན་པ་གཅིག་པུ་ལ་ར་མདའ་སྦྲན་ནུས་པ་ཙམ་ལ་བསྡུར་ན་དེ་ནི་བསོད་ནམས་ཤིག་ཅི་ལ་མིན། 

   སློབ་དཔོན་པདྨ་འབྱུང་གནས་ཀྱིས། ངེད་བོད་གངས་ཅན་ལྗོངས་ཀྱི་སྐྱེ་བོ་རྣམས་ལ་སྐྱེ་འཆིའི་གསང་བ་ཐོགས་པ་མེད་པར་བརྟོལ་བའི་བསམ་བློའི་གཏེར་ཆེན་མོ་འདི་གནང་བ་ལ་ཐུགས་རྗེ་ཆེ་ཞུའོ། །

འགྲུལ་བཞུད་ཀྱི་རྐང་རྗེ་ལས་ཚན་བཤུས།#索达吉堪布[超话]##gebaxiT[超话]#

{ཚིག་གིས་མཚོན་མི་ཐུབ་དེ་དག སྒྱུ་རྩལ་གྱི་རི་མོ་ནང་དུ་འབྲི་ཆོག་པ་ནང་བཞིན། ངས་ཁྱོད་ཀྱི་མཛེས་སྡུག་མ་ལུས་མཐའ་དག་སེམས་རིས་སུ་ཕབ་ནས་ཡིན་རིང་འགོར། }

____________#ཚ་འབྲོག་རྒྱལ་སྲས།

དད་པ་སྤུ་སད་ཅིག་གིས་དེད་པ་ན།།
སྣང་བ་ཡུལ་གྱི་མཛེས་པར་སེམས་ཆགས་ཤིང་།།
སྲིད་པའི་ཕུན་ཚོགས་འདོད་པའི་ཁོང་བོ་ཀྱང་།།
ཆོས་ཀྱི་གཟུགས་སུ་མཆིས་པ་ཨ་རེ་མཚར།།

མདོ་སྔགས་བསྟན་འཛིན