དྲི་བཅས་ཁམས་ཀྱི་འདུ་འགོད་མཚར་བོ།

སྤྲིན་པའི་ཐེད་སྲུབས་སྐུད་པས་མི་འཛིན་ལ། །
ནམ་ལངས་ཉི་འོད་སྤར་མོས་མི་ཁེབས་བཞིན། །
རྟ་རྒོད་འདྲ་བའི་རྣམ་རྟོག་འགྲོས་མགྱོགས་འདི། །
བསྙབས་པས་མི་ཟིན་བཏགས་པས་འགོག་ཐབས་མེད། །

སྲིད་པའི་ཁལ་གྱིས་ཡོངས་སུ་ངལ་བའི་ཁོ། །
ཤེས་རབ་ལྷས་ན་ཏིང་འཛིན་མངར་མོའི་ཆང་། །
དད་སོར་ཕྱག་གིས་ཁ་རུ་ལྡུད་པ་ན། །
ད་གཟོད་བདེ་བའི་མལ་ན་དབུགས་དབྱུང་འཆར། །

དགའ་སྐྱོ་འདུ་འཕྲོ་སྣ་དགུས་བསྣོག་པའི་སེམས། །
དྲན་འཛིན་སོར་མོས་བསེད་བཀྲོལ་རབ་བྱས་ན། །
ལྗན་ལྗིན་སྙིགས་མའི་གསེབ་ཏུ་བོར་བྱས་པའི།
མེ་ཏོག་དེས་ཀྱང་མགུལ་བའི་རྒྱན་བྱེད་སྲིད། །

ཚེ་སྲོག་སྲོད་ཀྱི་དམར་ཐག་ལྟ་བུ་ཡི། །
སྟོན་མཇུག་ལོ་མ་འདྲ་བའི་ཡིད་མཁའ་རུ། །
བདེ་སྟོད་དཔྱིད་ཀྱི་མེ་ཏོག་བཞད་པ་ན། །
སེམས་བྱུང་ཁྱེའུ་མགུ་བས་སོ་ཕྲེང་སྟེར། །

རེ་བའི་རྐང་རྟེན་ཆུ་ལ་བསྐུར་བའི་འཕྲོར། །
དོགས་པའི་ཕུག་ནོར་རྡོག་པས་གྲུམས་ཤུལ་དུ། །
གསང་ཁང་ཨེ་ཝཾ་ལྟོ་བ་བརྡོལ་བའི་ཟས། །
གཏུམ་མོའི་ཐབ་ཁར་ཅི་དགར་ཁོལ་བས་དྲོས། །

རྣལ་འབྱོར་བཟི་ཡོམ་དམ་ཚིག་དག་པའི་རོ། །
དབུ་མའི་སྦུབས་སུ་དལ་གྱིས་འཁྱམས་པ་ན། །
སོམ་ཉིའི་སྦུན་པ་སེན་མོས་བཀོག་པ་ལྟར། །
རྗེན་ནེ་བ་ཞིག་སྐྱོ་བའི་ངལ་གྲོགས་བྱུང་། །

༢༠༢༣ ༡༡ ༢༥ ཕྲལ་དུ་དཔལ་འབྱོར་ཚེ་རིང་ནས།

ངས་ལྗོན་ཤིང་གི་ཡལ་ཀའི་སྟེང་ནས་ཁང་བ་ཞིག་ཕུབ་ཐུབ་པའི་རེ་བ་བཅངས
གྲོང་སྡེ་གཞན་ཞིག་ནས་བུ་མོ་ཞིག་ཆུང་མར་བསུ་ཐུབ་པའི་རེ་བ་བཅངས

ངས་མི་ཚེ་གང་བོར་རྒྱང་བཞུད་གནང་ཐུབ་པའི་གྲ་སྒྲིག་བྱས
དུས་ཚོད་དང་ལྷན་དུ་སྔ་མོ་ནས་ཡར་སད་ཅིང

སྐྱོ་ཡུས་ཀྱིས་ཁེངས་པའི་གཏམ་རྒྱུད་རེ་རེའི་འགྲམ་ངོགས་སུ་
འཁྱམ་ཉུལ་གནང་ཐུབ་པའི་རེ་བ་བཅངས

#ཁ་བ་སྙིང་ལྕགས། https://t.cn/RI7nYAL

སྙིང་རྗེའི་དབང་ཕྱུག་འཕགས་པ་སྤྱན་རས་གཟིགས། །
ཡུད་ཙམ་ཁྲོས་པའི་སྤྱན་གྱི་སྡང་མིག་གིས། །
གསེར་འབྲུག་སྡེར་ལྔའི་ཁྲི་ལ་འགྱིང་བ་ཡི། །
མཐུ་ལྡན་གནམ་གྱི་བུ་ཡང་འདར་བར་བྱས། །

མཁས་དབང་དགེ་ཆོས་ཀྱིས།