ཆང་ཕོར་གང་དང་མཚན་མོའི་ན་ཟུག

དོ་ནུབ།

མུན་ནག་དང་སྤྲིན་དཀར་འདྲེས་མཚམས་ནས།

མཛའ་གཞས་དེ་ངག་ལ་འགུག་བཞིན།

དྲན་པ་ཐོར་བའི་བསམ་གཞིག་ཅིག་ཁྱེད་ལ་བརྗོད།

སྨྲ་མི་ཤེས་པའི་ནེ་ཙོ་ཇི་བཞིན།

དཀྲོག་གཏམ་ལས་བསླངས་པའི་དྲན་གཞས་ངོ་མ།

ཁྱེད་ལ་བརྗོད།

དོ་ནུབ།

ལྷིང་འཇགས་དང་ལྷོད་ཆགས་མཉམ་དུ།

ངག་སྒོ་ནས་ཐོན་པའི་སྙིང་གཏམ་གསོན་པོ།

ཆང་ཕོར་གང་གི་བཟི་གཏམ་དང་མཉམ་དུ་ཁྱེད་ལ་བརྗོད།

བཤད་མི་ཤེས་པའི་སྨྱོན་པ་ཇི་བཞིན།

གདངས་སྙན་གྱི་དཔལ་ལ་རོལ་བའི་ལ་གཞས་དེས།

ནང་མ་དང་འདྲ་བར་ཝུ་ཆང་གིས་གཉིད་ལས་དཀྲོགས།

དོ་ནུབ།

དྲན་པ་དང་དྲན་པ་ཤེས་བཞིན།

སྨྲེང་བ་དང་ལོ་ཟླ་མཉམ་དུ།

འདས་སོང་གི་དྲན་པ་ཕྲ་མོར།

འཁང་ར་དང་ལེ་བདའ་བྱེད་བཞིན།

ཕྱིར་དྲན་དང་ཕྱིར་མིག་བལྟས།

ཕ་ཡུལ    རྟ་ཁྱུ་མེད་པའི་ནགས་ལུང་།

ལུག་ཁྱུ་མེད་པའི་སྤང་ཐང་།

ནོར་ཁྱུ་མེད་པའི་རི་སྒང་།

ཕུ་ན་ཆུ་ཕྲན་མང་ཞིང་། མདའ་ན་ཆུ་སྣ་མང་བའི་རྒྱ་མཚོ།

ནམ་ཞིག   བདག་ཕ་ཡུལ་ལ་སླེབས་སྲིད།

དེ་ནི   ཁྱོད་དང་དྲན་པའི་ན་ཟིག་ཅིག་ཅི་ལ་མིན།

དོ་ནུབ།

འཕག་འཚག་དང་གཟུགས་རོ་ཆབས་ཅིག

སྙན་ལ་རོལ་བའི་བཞེད་གླུ་དང་།

གར་ལ་རྩེན་པའི་བྲོ་གཞས 

ཡང་ན   ངས་ཁྱོད་ལ་འཁྲབ་པའི་《འགྲོ་བ་བཟང་མོ》ས་ཟློས་གར་བཞིན།

གང་ལྟར    ལུས་ཀྱི་སྟངས་སྟབས་ཕུད་ནས།

དལ་ཞིང་རྒྱུ་བའི་ངང་ནས།

འཛུམ་མདངས་ལ་འགྲོགས་ཤིང་།

བྲོ་གཞས་དེ་རྩེད་འགོ་བརྩམས།

དེ་ནི    ད་དུང་ང་རང་གཉིད་ལས་སད་མེད་པས།

རྨི་ལམ་མ་གཏོགས་ཅི་ཡང་ལས་མ་འདས།

སྙིང་ཉེ།

ན་ཟུག་གི་ཚོར་བ་ཕྱི་རུ་བཏོན་ཐུབ་ན།

ངས་ཁྱོད་ལ་“དགའ”ཞེས་པའི་ཐ་སྙད་དེ་འཁྱར་འཁྱོར་ངང་བཤད།

དེ་དུས      ངོ་གནོང་དང་འགྱོད་གདུང་ཅི་ཡང་མེད་པར།

བདག་སེམས་ཀྱི་མར་མེ་དུམ་བུ་གཅིག་རླུང་གིས་བསྐྱོད།

“སྙིང་གཏམ་གསོན་པོ་དེ་དྲན་པའི་ཕྱིར་མིག ”ཡིན།

“སེམས་གཏམ་དག་མ་དེ་སྙིང་གི་འཕྲིན་པ”ཡིན།

“དཀར་གསལ་གྱི་དུང་ལ་འགྲན་ཕྱིར་བརྗེད་མེད་ཀྱི་བྱམས་པ”ཡིན།

ཡིད་ཆེས་དང་ཞེ་དགའ་ཡོད་ན།

དོན་ངོ་མར       

མི་ཚེ་འདི་ཁྱེད་དང་མཉམ་དུ་བསྐྱལ་ན་ཆོག་གམ།

བྱིས་དུས་ཀྱི་ང་ཚོར་བལྟས་པ།

ཀ་ར་བུ་རམ་རྔན་པ་སྟེར་བ་ན། །
ཁ་ནི་ཐེར་ཐེར་གད་མོ་དགོད་བཞིན་དུ། །
ག་བར་སུ་ཡིས་མངགས་ན་འགྲོ་ཤར་ཤར། །
ང་ཚོ་བྱིས་པ་ཡིན་དུས་གཡོ་ཁྲེབ་མེད། །

ཅ་ཅོ་ལབ་གླེང་ཅི་ཞིག་བྱེད་ན་ཡང་། །
ཆ་ཆ་ངང་པ་ལྟར་དུ་ཉིན་གང་པོར། །
ཇ་ཤིང་སྡོང་པོའི་འོག་དང་གྱང་གི་རྩར། །
ཉ་མོ་ཆུ་ལ་ཇི་བཞིན་འབྲལ་བ་མེད། །

ཏ་ཀུ་ཐོག་པའི་ཨ་མྱེའི་མ་མཐོང་སར། །
ཐ་མག་འཐེན་འཕྲོ་རྔུབ་པར་སྤྲོ་སྣང་ཅན། །
ད་ལྟ་ཕན་ལ་ཅི་ཡང་མི་སེམས་དུས། །
ན་ཟླ་ང་ཚོའི་ཡན་ལ་སྤུན་ཟླ་མེད། །

པ་ཕ་ཨ་མ་སོགས་ཀྱིས་མ་རིག་སར། །
ཕ་རོལ་གཞན་གྱི་ཁང་པའི་སྒེའུ་ཁུང་དང་། །
བ་ལང་མཛོ་མོ་སྒོ་ཟོག་རྡོ་རྡུང་བྱེད། །
མ་རབས་ཆེ་ལ་ང་ཚོར་ཚོད་ཅིག་མེད། །

ཙ་གེ་ཙིག་གེ་ཅི་ཡང་ཡོད་པ་ཡི། །
ཚ་ཚ་འུར་འུར་ཆེ་བའི་ཁྲོམ་ར་ན། །
ཛ་དྲག་ཆེ་བ་གཞན་རྒྱུ་རྐུ་བ་ལ། །
ཝ་ལེར་སེམས་ན་ང་ཚོའི་ཡན་ན་མེད། །

ཞྭ་གོས་ལྷམ་སོགས་ཐལ་བ་འཚུབ་འཚུབ་ཏུ། །
ཟ་ཁང་སྒོ་ནས་མཆིལ་མ་མིད་བཞིན་དུ། །
འ་ཆད་འུད་ལ་ཐུག་པའི་སྤྲང་པོ་བཞིན། །
ཡ་ཐེམ་འོག་ཏུ་འདུག་ལ་ངོ་ཚ་མེད། །

རྭ་ཅོ་སྐམ་པོ་མང་པོ་སྤུང་བ་ཡི། །
ལ་ལུང་སྟོད་ཀུན་གྱི་ཕྱག་ཁང་ནང་། །
ཤ་གཅུས་རྒྱབ་ཀྱིན་ངུ་ཞོར་དགོད་ཞོར་དུ། །
སཱཙྪ་ལྷ་སྐུ་གཉོག་ལ་འགྲན་ཟླ་མེད། །

ཧ་ལམ་ཉི་མ་ཤར་ནས་མུན་ཁའི་བར། །
ཨ་ཉོག་ཁྱུ་གཅིག་གྲོང་པའི་སྟོད་སྨད་ན། །
ཧ་ཧ་ཧེ་ཧེ་ཟེར་བཞིན་རྒྱུ་བ་དེར། །
ཨ་ཧོ་ད་ལྟར་སེམས་ན་སྐྱིད་པ་ལ། །
དེང་སྨྱུག།

རིག་འཛིན་འཇིགས་མེད་གླིང་པས།

པདྨ་རྒྱས་པ་ལྟ་བུའི་ལང་ཚོ་ཅན། །
རེག་ན་བདེ་བའི་མཆོག་སྟེར་ཨུཏྤལ་མིག །
གཟུགས་ཀྱི་རྣམ་འགྱུར་ངོམ་པའི་ཡིད་འཕྲོག་མ། །
རྡོ་རྗེ་སྒེག་མོ་མ་ཡིས་མཉེས་གྱུར་ཅིག །

སྲིད་ན་རྣམ་པར་མཛེས་པའི་ཟླ་བས་ཀྱང་། །
བལྟ་ན་སྡུག་པའི་གཟུགས་ཀྱིས་ཆར་མི་ཉེ། །
ནོར་བུའི་དོ་ཤལ་འཛིན་པའི་ཡིད་འོང་མ། །
རྡོ་རྗེ་ཕྲེང་བ་མ་ཡིས་མཉེས་གྱུར་ཅིག །

འཇམ་མཉེན་པུཎྜ་རི་ཀའི་ལང་ཚོ་ལ། །
རེག་འཇམ་དབང་པོའི་གཞུ་ཡི་འཁྲི་ཤིང་ཅན། །
སྐད་སྙན་འགྱུར་ཁུགས་སྟོང་གི་གླུ་ལེན་མ། །
རྡོ་རྗེ་གླུ་མའི་ཚོགས་ཀྱིས་མཉེས་གྱུར་ཅིག །

བུང་བ་པདྨའི་ཚལ་ན་གཡོ་བ་བཞིན། །
ཕྱག་ཞབས་གསེར་གཡུའི་གདུ་བུས་མཛེས་པའི་གར། །
མིག་འཕྲུལ་ལྟ་བུར་སྒྱུར་བའི་གཡོ་ལྡན་མ། །
རྡོ་རྗེ་གར་མའི་ཚོགས་ཀྱིས་མཉེས་གྱུར་ཅིག །

ཚངས་དབང་འཆི་མེད་བུ་མོའི་འཇོ་སྒེག་ཀྱང་། །
ཤིན་ཏུ་མཛེས་པའི་ལང་ཚོས་བརྟན་པ་འཕྲོག །
ཨུ་དུམ་ཝཱ་རའི་ཆུན་འཕྱང་ཡིད་འཕྲོག་མ། །
རྡོ་རྗེ་མེ་ཏོག་མ་ཡིས་མཉེས་གྱུར་ཅིག །

བཅུ་དྲུག་ལང་ཚོས་མྱོས་པའི་རྣམ་འགྱུར་དེས། །
སྙིང་ལ་དགའ་བའི་ཡ་མཚན་ཅིར་ཡང་སྟེར། །
དྲི་ཞིམ་སྤོས་ཕོར་ཐོགས་པའི་སྨིན་ལེགས་མ། །
རྡོ་རྗེ་བདུག་སྤོས་མ་ཡིས་མཉེས་གྱུར་ཅིག །

ཡིད་འོང་ལྟ་ན་སྡུག་པའི་མཁུར་ཚོས་ལ། །
ལི་ཁྲིས་ཐིག་ལེས་བསྐུས་པའི་རི་དྭགས་མིག །
ཉི་ཟླའི་སྒྲོན་མེ་ཐོགས་པའི་བཞིན་བཟང་མ། །
རྡོ་རྗེ་སྣང་གསལ་མ་ཡིས་མཉེས་གྱུར་ཅིག །

འཆི་མེད་བུ་མོའི་དཔལ་འཛིན་སྨིན་ལེགས་གཟུགས། །
ཞལ་ནས་ཨུཏྤ་ལ་ཡི་དྲི་འཐུལ་ཞིང་། །
བཟང་དྲུག་སྨན་གྱིས་བྱུགས་པས་དགྱེས་པ་སྐོང་། །
རྡོ་རྗེ་དྲི་ཆབ་མ་ཡིས་མཉེས་གྱུར་ཅིག །