གང་གི་མཛད་རྗེས་བསུབས་དུ་མེད་པས་འགྲོ་བའི་དེད་དཔོན་ས་པཎ་རྗེ། །
གནས་ལྔའི་ཤེས་བྱ་སྙན་པར་སྒྲོག་པས་ཚངས་པའི་སྲས་མོ་སྐྱེངས་པ་སྟེར། །
རྒྱལ་བསྟན་གདུགས་དཀར་བླ་རུ་བསྒྲེངས་པས་འཕགས་བོད་པཎ་གྲུབ་ངལ་བ་གསོས། །
མདོ་སྔགས་གསང་གནད་གླུ་རུ་འགུགས་པས་རིགས་པའི་གཞས་པ་ཁྱེད་མིན་སུ། །

དབྱངས་མེས། [鲜花]

སྐྱེ་བ་སྐྱེ་བ་རྣམས་སུ་ཡང་དང་ཡང་།།
མཁས་པ་མཁས་པ་རྣམས་ལ་སྔོན་སྦྱངས་པས།།
ཚེ་འདིར་ལན་རེ་ཟུང་རེ་ཐོས་ཙམ་གྱིས།།
གཞུང་ལུགས་ཀུན་ཤེས་ཀུན་དགའ་རྒྱལ་མཚན་དཔལ།།

༸ས་སྐྱ་པཎ་ཆེན་རྗེས་སུ་དྲན་པ།

ཞི་བདེའི་མེ་ཏོག་ཤར་མཐའི་མཚམས་སུ་བཏབ། །
ལེགས་བཤད་སྦྲང་ཆར་གངས་རིའི་ལྗོངས་སུ་ཕབ། །
བྱམས་བརྩེའི་འོད་སྣང་འཛམ་གླིང་ཕྱོགས་བཅུར་འཕྲོ། །
སྐྱབས་མཆོག་ས་པཎ་ཞབས་ལ་གུས་ཕྱག་འཚལ། །

རབ་འབྱམས་ཤེས་བྱ་མཐའ་དག་ཐུགས་སུ་ཆུད། །
ཐབས་མཁས་ཐུགས་རྗེས་བསྟན་འགྲོའི་དོན་ཀུན་སྒྲུབ། །
རླབས་ཆེན་འཕྲིན་ལས་བཟང་པོས་མཛད་པ་ཅན། །
འཇམ་མགོན་བླ་མའི་ཞབས་ལ་གསོལ་བ་འདེབས། །

——སྐུ་འབུམ་པ་རྒྱལ་སྲས་ནས།