སྦྱིན་པ་ལ་དྲུག་ཏུ་དབྱེ་བ་ནི།
ཆོས་ཀྱི་ཚིག་དོན་སྟོན་པ་དང་གླེགས་བམ་བྲིས་ཏེ་སྟེར་བ་ལ་སོགས་པའི་ཆོས་ཀྱི་སྦྱིན་པ་དང་། སྲོག་གི་བར་ཆད་དུ་འགྱུར་བ་སོགས་ཀྱི་འཇིགས་པ་ལས་སྐྱོབ་པའི་མི་འཇིགས་པའི་སྦྱིན་པ་དང་། ནོར་འབྲུ་ལ་སོགས་པའི་བདོག་པ་རྣམས་འཁོར་གསུམ་དག་པར་གཏོང་བའི་ཟང་ཟིང་གི་སྦྱིན་པ་སྟེ། དེ་གསུམ་གང་རུང་སྦྱིན་པར་བྱེད་པའི་སྦྱིན་པས་གོ་ཆ་ལ་གནས་པ་ན་ཉན་ཐོས་ཀྱི་ཡིད་བྱེད་རང་གཅིག་པུ་དུལ་བར་བྱའོ་སྙམ་པ་དང་སོགས་པས་རང་རྒྱལ་གྱི་དེ་སྤོང་བའི་ཚུལ་ཁྲིམས་དང་། སློང་མོ་བ་ལ་སོགས་པ་སྐྱེ་བོ་ཐམས་ཅད་ཀྱིས་མི་སྙན་པར་སྨྲ་བའི་གཤེ་བ་ལ་ཁོང་མི་ཁྲོ་བའི་བཟོད་པ་དང་། དགེ་བ་འདོད་པའི་འདུན་པ་དྲག་པོ་བསྐྱེད་པའི་བརྩོན་འགྲུས་དང་། ཐེག་པ་གཞན་ཉན་རང་གི་ཐེག་པ་དང་མ་འདྲེས་པའི་རྣམ་མཁྱེན་ལ་སེམས་རྩེ་གཅིག་པའི་བསམ་གཏན་དང་། དགེ་རྩ་རྫོགས་བྱང་དུ་མི་དམིགས་པར་བསྔོ་བའི་ཤེས་རབ་རྣམས་དང་ལྡན་ལ་དེའི་ཚེ་སྦྱིན་བྱ་དང་སོགས་་་་བས་ལེན་པོ་གཏོང་པོ་གསུམ་མི་དམིགས་པར་རྟོགས་པའི་གོ་ཆ་ཉིད་ཀྱིས་ཉམས་སུ་ལེན་པར་བྱེད་དོ། གོ་རིམས་བཞིན་ནི་རེ་རེའི་མཐར་འཁོར་གསུམ་མི་དམིགས་པ་སྦྱོར་བའོ།
ལེགས་བཤད་གསེར་ཕྲེང་ལས་བརྗེད་ཐོར་བཤུས་པའོ།
ལན་རེེར་གྲོགས་པོ་གཞན་དང་གླེང་མོལ་བྱེད་པའི་སྐབས་སུ་གློ་བུར་གྱི་དྲི་བ་འགའ་རེ་རང་གི་བློས་མ་དཔོག་པ་དང་། ཡང་ན་དངོས་སུ་འཕྲད་པའི་དོན་རྐྱེན་འགའ་རེར་ཅི་བྱ་གཏོལ་མེད་དུ་གྱུར་བ་སོགས་ཀྱི་དབང་གིས། དཔེ་ཀློག་ཅུང་ཙམ་རེ་བྱེད་པའི་སྐབས་སུ་རང་གི་བརྗེད་ཐོ་ཉུང་ཉུང་ཞིག་ཡིག་ཐོག་ཏུ་ཕབ་ནས་ཉར་ཚགས་བྱས་ན། ད་བཟོད་སྐབས་སྐབས་སུ་ཡིད་ངོས་ལ་འཆར་བདེ་བ་སོགས་ཕན་པ་རྒྱ་ཆེན་པོ་ཡོད་པར་འདུག་བསམ།

སྒོར་མོ་ཉིན་རེ་བཞིན་ཉུང་འགྲོ་བ་ལ་སེམས་ཁུར་བྱེད་ལ། ཚེ་སྲོག་ཉིན་རེ་བཞིན་ཉུང་འགྲོ་བ་ལ་ཡིད་འཇོག་མེད་པ་ཅི་ཡིན་ནམ།
———རྫོང་སར་མཁྱེན་བརྩེ་རིན་པོ་ཆེས།
担心钱一天比一天少，为何不在意生命一天比一天减少呢？
———宗萨钦哲仁波切

མི་གཞི་འདི་ཤིན་ཏུ་གལ་ཆེ།

བློ་རིག་དང་འཇོན་ནུས་སོགས་ཡོད་ན་བཟང་མོད། འོན་ཀྱང་དེ་ལ་མི་གཞི་བཟང་བོའི་རྩ་བ་མེད་ན། སེམས་གཏིང་ནས་བསྟོད་སྨོན་བྱེད་ཡུལ་དུ་འགྱུར་དཀའ་འོ།།ཡིན་ན་ཡང་མི་གཞི་བཟང་ཟེར་བ་དེ་ཤིན་ཏུ་བཤད་དཀའ་མོ་ཞིག་རེད། དཔོན་པོས་བལྟས་ན་མི་གཞི་བཟང་ཡང་འབངས་མིས་བལྟས་ན་མི་གཞི་ངན་པ་ཡང་ཧ་ཅང་མང་། ཕྱུག་པོས་བལྟས་ན་མི་གཞི་བཟང་ཡང་དབུལ་བོས་བལྟས་ན་མི་གཞི་ངན་པ་ཡང་ཤིན་ཏུ་མང་། བླ་མའི་མདུན་ནས་མི་གཞི་བཟང་ཡང་བླ་མ་དང་ཁ་ཅུང་ཟད་བྲལ་ན་མི་གཞི་ངན་པ་ཡང་ཧ་ཅང་མང་། རང་ཉིད་མཐོ་བར་རློམ་ནས་ཉམ་ཆུང་ལ་ཡ་མ་བྱས་ན་མི་གཞི་ངན་པར་མ་ཟད། མཐོན་པོས་བརྩེ་བས་བསྐྱངས་པ་རང་ཉིད་ཅུང་ཟད་དར་དུས་དེ་དེ་ཉིད་བརྗེད་འགྲོ་བ་ཡང་མི་གཞི་ངན་པའི་རྟགས་ཡིན། དེས་ན་མི་གཞི་བཟང་བོ་ནི་ཐམས་ཅད་ཀྱི་རྩ་བ་ཡིན་པས་དཀའ་ཡང་འབད་དགོས། ལམ་གྱི་རིམ་པ་ཞེས་པའང་གོ་སླ་བར་བཤད་ན། མི་གཞི་རིམ་གྱིས་ཇེ་བཟང་དང་། སེམས་རྒྱུད་རིམ་གྱིས་ཇེ་ལེགས་སུ་བཏང་ནས་མཐར་མི་གཞི་དང་སེམས་རྒྱུད་གང་གི་ཆ་ལའང་སྐྱོན་ཅུང་ཟད་ཀྱང་མེད་པར་གྱུར་བ་ན་སངས་རྒྱས་ཞེས་པ་རེད།

ཞེས་བཛྲ་ཚུལ་ཁྲིམས་རྒྱ་མཚོས།