གཅིག་སློབ་སྦྱོང་ནི་མི་ཚེའི་ནུས་ཤུགས་ཡིན་པ་

首页发布

གཅིག་སློབ་སྦྱོང་ནི་མི་ཚེའི་ནུས་ཤུགས་ཡིན་པ་དང་། གཉིས་དེང་སྐབས་ཤེས་ཡོན་དང་ཚན་རིག་གི་དུས་རབས་ཡིན་པས། མ་འོངས་པར་མི་ཚེ་ལ་རིན་ཐང་ཡོད་པ་དང་བྱ་བཟང་སྒྲུབ་དགོས་ན། ངེས་པར་སློབ་སྦྱོང་ཡག་པོ་བྱེད་དགོས། འདི་ནི་ངས་ནམ་རྒྱུན་སློབ་མ་ལ་བཤད་པའི་སྙིང་གཏམ་དཀར་པོ་ཡིན།

ཕྱིར་མིག་ཀློང་གི་མེ་ཏོག

------- ཨ་ལགས་ཆོབ་ཚེ།
དུད་སྤྲིན་ཕྱོགས་སུ་ལྡིང་བའི་ཞོགས་པ་རུ།།
ཙག་རླུང་ཁབ་རྩེ་ཟུག་པའི་ཕུང་པོ་ཡི།།
གང་མྱངས་ལྐོག་ཟས་གཏོང་བའི་འབྲོག་མོ་ཞིག།
ལྷས་རར་བྲེལ་འཚུབ་གཏོང་བ་སེམས་ལ་རྒྱུ།།

ཟུར་མིག་མདའ་རྩེས་ནང་སེམས་སྤྲས་མདུད་རྒྱག།
མགོ་དཀྲིས་དམར་པོས་སྒང་ནས་ལག་གཡུགས་བྱེད།།
སྐད་སང་མཐོན་པོའི་མིང་ནས་ཐེངས་གསུམ་འབོད།།
ཨ་ཅེ་འབྲོག་མོའི་འཛུམ་ཞལ་འཇའ་ལ་འཁྲུལ།།

བཅོས་དང་མ་བཅོས་མངོན་ལྐོག་མེད་པ་དང་།།
ཐེག་དང་མི་ཐེག་ལེ་ལན་མེད་པ་སོགས།།
ནམ་རྒྱུན་བརྩེ་བས་ཕྱུག་པའི་མཛའ་ན་མོ།།
མིག་དབང་མ་ཡིན་ཡིད་དབང་འཕྲོག་མྱོང་ཡོད།།

ལས་ཀྱི་ཆོན་ཐག་ཤར་ནུབ་སོང་བ་ནས།།
ཉིན་སྲིབ་གཉིས་སུ་གྱེས་པའི་སྐབས་དེ་ནས།།
བདེ་བར་ཡོད་པའི་གཏམ་རེར་ཉན་པ་ལས།།
ཁྱེད་ལ་ལྷག་པར་གཏམ་གླེང་མ་ཐུབ་ཐལ།།

གནམ་ས་ཁ་ཐག་རིང་ཡང་སེམས་ཐག་ཉེ།།
གནམ་གྱི་མིག་ཆུ་ས་ཡི་སྙིང་ལ་ཕོག།
དེ་དང་དེ་བཞིན་ཁྱེད་དང་ང་རང་ཡང་།།
རིང་རིང་ལྟར་ཡང་ཉེ་བའི་གནས་ན་ཡོད།།

༡༤-༡-༢༠༢༤ལ་ཁང་རྙིང་ནས།

ཉིན་ཐོ། སེམས་ཚོར་དངོས་མ།
ཁྱོད་རང་དང་སེམས་ཐག་ཆེས་ཉེ་བའི་གཉེན་ཉེ་དང་གྲོགས་པོ། ཡང་ན་ཁྱོད་དང་ཁ་ཐག་ཉེ་བའི་མཐར་འཁོར་གྱི་སེམས་ཅན་དག་གིས་ཁྱོད་ལ་འཆང་བའི་བྱམས་བརྩེ་དེ་གཅེས་སྤྲས་བྱེད་པ་ནི་ཤིན་ཏུ་གལ་ཆེ་བ་ཞིག་ཏུ་སེམས་ཏེ། ནམ་ཞིག་ཁྱོད་དང་གཏན་དུ་གྱེས་བྲལ་བྱས་ཚེ། ད་གདོད་ཁྱོད་ཀྱིས་དེ་ནི་སུས་ཀྱང་ཚབ་མི་ཐུབ་པའི་རིན་ཐང་དང་བྲལ་བ། སྟོང་ཆ་དེ་ནི་གང་གིས་ཀྱང་ཁ་སྐོང་མི་ཐུབ་པ་ཞིག་ཡིན་པར་རྟོགས་སྲིད། འོན་ཀྱང་དེ་དུས་ཕངས་སེམས་དང་གནོང་འགྱོད་ཀྱི་ངང་ནས་དྲན་རྟེན་གྱི་འདྲ་པར་ཞིག་ལ་མིག་ཅེར་ནས་འདུག་པ་ལས། བྱ་ཐབས་གཞན་ཅི་ཡང་མེད་དོ། །
ཆུ་ཡོས་ལོའི་ཟླ་༡༢ཚེས་༣ཉིན་ལེགས་-ཀུན་ཕན་ཟླ་བ་ནས། 2024-1-14