《ꀉꂿꅩꌺ》(ꋍ)
ꀉꂿꅩꌺꑌ！
ꌒꆏꉘꃅꌒ，
ꉘꃅꌒꂸꐯ，
ꉘꃅ꓂ꑳꀕ，
ꉘꃅꑌꐥꌒ；
ꌒꆏꅔꐎꌒ，
ꅔꐎꌒꂸꐯ，
ꅔꐎꁨꇉꀕ，
ꅔꐎꏰꃅꌒ。
ꎬꆏꐧꋦꎭ，
ꐧꋦꐛꁮꄅ，
ꐧꋦꅪꐥꎭ。
ꌩꎔꇉꇬꋦ,
ꄔꈌꂸꌸꁧꂸꐊ;
ꒉꎔꇉꇬꒉ,
ꇓꈬꂸꎟꂡꂸꐊ;
ꏜꎔꅔꇬꋦ,
ꑋꈌꂸꌸꋇꂸꐊ;
ꅪꎔꆀꃅꐥ,
ꂸꎭꅩꂷꇬꂸꐊ。 ꑍ
ꀉꂿꅩꌺꑌ，
ꀊꆨꃅꈎꂄ꒔ꈓ，
ꃅꆪꂄ꒔ꆪ，
ꃅꉖꂄ꒔ꉔ，
ꅩꌺꄚꄉꒆ。
ꅩꒆꃄ꒔ꉔ，
ꑷꃀꏂꒃꐗ，
ꑷꉐꉧꑳꀕ,
ꑷꁱꇖꌋꋦ;
ꈿꏂꏁꒃꃴ，
ꈿꏂꂶꏋꀕ,
ꈾꊞꏂꁬꁯ。
ꊁꇁꋍꑍꆏ,
ꑷꃀꈁꒉꏁꐂꀕ,
ꈿꏂꈁꒉꏂꅈꅊ,
ꅩꌺꈁꒉꏁꊭꀕ。
ꃷꇑꀋ꒜ꏃꊰꏁꑼꐛ，
ꏃꊰꆺꀕꄷ，
ꏃꑹꀋꎥꎨ;
ꈓꁱꀄꌒꏃꊰꏁꏢꀖ，
ꏃꊰꆺꀕꄷ，
ꏃꏢꀋꎥꎨ;
ꄌꉙꐍꈬꁱ，
ꈬꁱꆺꀕꄷ，
ꌕꁱꀋꎥꎨ;
ꌃꒉꐍꈬꄣ，
ꈬꄣꆺꀕꄷ，
ꌕꄣꀋꎥꎨ。
ꀉꂿꅩꌺꑌ,
ꅩꒆꃄꌕꑍ，
ꐆꑻꐍꈬꁨ，
ꁮꅰꐂꁱꌺ,
ꈤꑋꀨꇬꐊ，
ꈻꑍꂫꇬꍅꂶꌠ，
ꌌꇁꅩꀑ꒔。
ꊁꇁꋍꑍꆏ,
ꁮꅰꈁꒉꊜꇴꀕ,
ꅩꌺꈁꒉꅧꈩꀕ。
ꃷꇑꀋ꒜ꈬꊯꈬꑻꐛ，
ꈬꊰꆺꀕꄷ,
ꈬꑻꀋꎥꎨ;

ꋌꄹꈎ，ꉢꑍꊎꋌꈓ
ꁱ/ꐚꑕꒉꎆ
ꉢꀄꊭꈜꎼꁱꐭꀋꇮꌦꄮꇬ，ꋍꃢꌦꇬꐺꋻꀑꄷ，ꉠꀿꃀꑠꃅꉉꉢꇯꋻ，ꉢꆹꋌꀋꎺꀐ，ꋀꊈꃶꐚꇰꍝꃅꉌꂵꊰ，ꈍꃅꑋꉢꑠꂷꊿꒆꊿꐚꇁꎼꀋꇿꀑꉂ。ꉘꀋꇉꃅꉢ“ꀉꂿ，ꉢꇁꀋꄐ”ꄹꁱꐭꇈꄓꇁꄸ，ꑠꃅꄉꉢꀱꉠꁮꅉꁱ，ꉢꀱꉠꁮꅉꎺꄅꑟꉂ。ꋌꇉꉈ，ꉢꋃꒉꑌꊌꀋꋻ，ꀃꃀꑌꈢꀋꋻ，ꇭꀧꒉꄚꅸꑍꊎꋌꈓꑟ，ꋋꆹꊽꉌꇿꉌꐡꌠꌤꑠꐘ。
ꑍꄙꆀꊰꏁꈓ，ꉢꑍꊎꋌꈓ，ꐋꀋꌡꌠꈎꄜ，ꎺꄅꋭꌠꈎꄜ。ꋌꄹꈎꉢꌕꃢꆅꀐ，ꌗꎼꇁꇬꃅꑍꃘꑍꋙꋍꁠꆧꑌꈌꀋꊐ，ꑟꃅꆅꌠꈻꌠꉬꇮꉢꉂꉢꅉꉢꁌꒉꈓꉬꀋꐚ。
ꂴꆽꃢꌠꉢꐧꌷꀉꂥꊐꌠꌷꅐꂰꀐ，ꃅꑍꃅꉖꆹꃛꅉꇁꅉꑟꇬꐺ。ꏣꅍꑟꅍꇁꌠꑕꋌꉬꑌꀋꐚ，ꊈꅍꌐꅍꇁꌠꉱꃀꉬꑌꀋꐚ，ꉢꉌꃀꉪꄚꇭꀧꇙꋏꀋꄚ，ꎧꌗꈈꌊꐰꇑꆥꑌꀋꇿ，ꈑꅪꑄꌌꑊꋌꍂꑌꀋꂪ，ꉢꋌꎼꑓꁴꅐ，ꄚꑠꃅꑴꇬꉢꑵꉙꑵꇬꎷ，ꑊꑍꒊꆭꀕꃅꐥꐩꏮꈌꌦꑓꆜꅍꒊꈨꐺ。ꄽꂫꉠꀄꂼꈐꏭꒉꌷꅉꂷꌠꌋꆀꐰꇑꐯꀋꇴ。
ꑍꃢꀕꌠꉠꉂꆏꃅꋆꈻꌋꀕꌠꈢꋒꁧ，ꑋꈌꉙꏦꀕꌠꑟꇁꀐꉂ。ꉢꆹꉪꏤꁡꇤꉗꃀꒉꌷꌺꂷꌠꐛ，ꀉꂿꀉꄉꉬꇮꑊꑍꒊꆭꀕ，ꉢꎖꌋꉌꂵꈐꏭꒉꌷꅉꂷꌠꀋꊌꑴꇬꄡꇗꒉꌷꌺꂷꐛꀐꉂꉌꂵꇿ，ꏮꇁꉠꑭꐩꁮꅉꉜꇬꀉꅰꃅꉌꂵꇿ。ꀋꌋꀋꏣꃅꊭꑳꁮꌸꌠꇨ，ꉢꋌꃀꇇꁈꏿꑠꄆꒌꄆꑱꇬꄉꀉꄂꂿꋻ，ꄆꒌꄆꑱꈨꌠꆹꋍꏲꉬꌞꃅꀋꐚ，ꊽꒊꒉꃅꇰꐛ。ꉢꌌꇇꁈꏿꑲꆀꍑꀑꄸꈨꄮꇬ，ꋌꇰꋌꅗꀐ，ꉌꂵꈐꏸꏦꌋꉪꅍꑌꌐꀋꉆ。ꉢꄆꅇꅥꀬꅥꀋꀬꃅꉢꅥꀁꇬꁵ，ꀉꄉꀉꂿꑌꉠꎂꃅꉌꂵꐒꀙꌦꀑꌠ，ꄚꑠꃅꑴꇬꉢꃅꅍꎸꀋꊌ。ꀉꄉꇁꌋꆿꁮꀒꎂꑟꄹꉈ，ꉢꋍꁁꏯꆏꉌꂵꇗꄃꀕ，ꋍꁁꏯꆏꀉꄉꂿꈴꀋꄿ。ꊂꎆꃀꇖꃪꎖꃪꈁꀑꄸꄮꇬ，ꉪꏤꆹꁧꐙꃅꈋꀀꌠ，ꌣꎭꇤꏢꀕ，ꀉꄉꎆꉛꀕꌋꆀꄆꅇꀋꆏꃅꅥꅸꀑꂪꏦ，ꊽꉌꂵꇿꌠꆏꁡꇤꃷꇎꋍꁯꋍꍈꄌꃅꌌꉪꉚꄉꇁꌐ，ꉈꑴꋊꃤ、ꏣꑟꑠꑌꎆꃀꄌꉪꉚ，ꀉꅰꃅꉠꐋꀨꀉꄉꀉꃀꇇꇬꋙꒃꋠꌠꑌꉠꇇꀨꌠꌐꀋꉆ，ꀉꋩꄮꉢꃶꐚꀕꃅꉌꂵꊷꆣꀕ，ꈍꃅꑋꋀꊈꑆꊋꎺꑲꆀꍑ，ꈍꃅꑋꋀꊈꑆꊋꀱꑲꆀꍑꀑꉂ。ꉠꀉꂿꆹꇇꁈꏿꌠꂿꀋꋻꈨꀋꋻ，ꁱꂷꑌꌷꀋꋻ，ꉪꏤꃅꉉꑳꆏꌌꎸꇈꅋꐯꇯꄉꃅꉉ，ꀉꂿꆹꉪꇰꉪꀋꀬꑴꄷ。ꇇꁈꏿꄹꉈꉠꀑꑌꌕꑻ、ꀿꃶꂷꌋꆀꃺꃼꑍꂷ、ꀀꑳꂷꇁꌋꉠꀨꎹ，ꋀꊈꀋꆐꃅꉠꏯꈐꊟꊋꊡ，ꉢꉌꂵꄸꈐꆹꋌꎼꋍꍈꏸꏦꏮꃅꐛ，ꄚꑠꃅꑴꇬꌳꈄꂷꇰꏸꏦꑞꅀꉂꉪ。ꉢꇇꁈꏿꄮꇬꋍꍈꑌꋌꀋꎺ，ꊂꀀꐚꇁꇬꑲꆀꈻꌋꀕꃅꐚꇈꆅꉚꊿꏮꉢꏃꉠꀿꃀꂴꆽꁧꄸꇖꂟ，ꋀꊈꑌꑗꈈꀕꃅꉠꏯꑽꀋꐥꄸꅰꑣ。ꋌꄹꉔꀉꂿꀂꀋꀀꅸꀑꂪꏦꄸ，ꀀꆹꇬꑌꀄꂼꂻꀋꌒ，ꌦꌠꑠꀉꄂꂻꄷ，ꄆꅇꅥꀉꄉꏤꁵꇬꑌꇬꀋꏣꇬꎷꄉꀉꅰꃅꉌꂵꄏꄹꐒ，ꀉꂿꉌꂵꂅꐯꂅꃅꐺꄮꇬꑣꇬꄉꁧꋠꑠꂷꇨꊸꐮꇨꊸꃅꀥꉪꏤꁡꇤꏯꇁ，ꀉꂿꉂꆏꀀꌺꈭꀋꅐꀑꎼꇿꉌꂵꊰ，ꑓꁴꑓꇬꇉ。ꉜꇉꂿꆏꁧꋠꂷꌠꆹꑣꇬꌠꒉꇬꇁꄉꃮꃼꌋꇬꌵꏮꄐꂷꉬꅊꇈ，ꋌꄮꇬꑲꆀꀉꂿꉌꂵꊼꇅꐛꅉꐛ。ꊂꀉꄉꄆꅇꅥꀉꂿꁵꇬꆀꉌꂵꄉꅉꄉ，ꄸꉢꁴꋍꃢꉉ，ꉢꀉꅰꁱꐭꀋꄚꑴꌦ，“ꀉꂿꀋ，ꉢꑽꀋꐥꀐ。”“ꑽꀋꐥꆏꍑꀐ，ꉢꆏꇷꌦꀋꇉꀐ……”ꋍꄮꇬꉢꑓꁴꅐ，ꉢꎺꇉꉈꉢꑓꁴꅐꀋꋻꀐ，ꑴ——ꑳ，ꉠꑠꀕꂷꑌꉂꉢꀱꉠꉌꐡ！ꇇꁈꏿꑍꀕꐛꀑꇬꉢꇙꁮꋏꇙꑐꃅꀋꉆ，ꁱꐭꀋꄚ，ꀀꑌꇴꇬꑌꀀꀱꀀꆽꀋꉆ，ꉢꊼꇅꈌꊰꏯꃅꐛ，ꊂꋙꋍꍈꋠꉆꇬꑌꋀꊈꁴꀉꑳꋙꍈꃅꍈ，ꉠꐋꀨ、ꉠꂘꃀ、ꉠꏣꑟꑠꀋꆏꃅꉠꏯꅲꇬ，ꄷꀋꁨꉪꁥꌠꌷꐋꉬꇮꌩꋚꇓꂷꑠꌐꀋꉆꃅꃼꌋꆅꉚꅉꄉꉢꉚꇁ，ꉠꋑꑌꄉꈁꄽꌧ，ꑟꉬꀋꐚꉠꌷꐋꁥꌠꉢꉚꇁꀉꋩꄹꉈꈊꃀ，ꄅꌺꃅꆅ，ꋧꃅꐞꁧꀋꇉꀐ，ꑆꎸꑌꊸꉙꀋꌒꃅꊸ，ꉌꂵꈐꆹꎺꐚꑓꄧꃅꐚ，ꉢꉪꇬꉠꀿꃀ、ꏣꃀꏣꑟ、ꐋꀨꐥꊈ、ꌷꐋꂘꃀꑠꉠꏯꊋꊡꇬꎷ，ꉢꋀꊈꑆꊋꀱꌐꇁꀋꉆ，ꊿꂷꌦꇬꆹꌦꈝꐯ，ꄚꑠꃅꑴꊂꇬꐥꇉꈨꌠꐥꇨꀐ，ꀉꅰꃅꉠꀉꂿ。ꉈꑴꉢꆹꆈꌠꊂꋊꁱꇐꁱꌠꉌꃹꑠꂷ，ꀄꂼꎔꀕꈍꑋꇬꊏꈌꏑꇰ。ꑠꃅꄉꉢꎐꂷꑝꄉꋰ，ꋰꌋꊂꄹꉈꃅꄜꇬꆏꉌꂵꇿꌦꄉꏾ。ꊿꂷꌦꇬꌦꀋꊋ，ꀋꄸꄷꉢꀉꋩꄹꉖꆽꍑꆽꑣꄉꀋꋰꇮꇬꋧꃅꐞꁧꀐꑌꊝꀋꌋ。
ꇇꁈꏿꄉꈭꐩꋍꑍꋍꉙꃅꐥꅉꌒꅉꑟ，ꋋꆹꋍꏅꏣꃀꏣꑟ、ꐋꀨꐥꊈ、ꂘꃀꌷꐋꑆꊋꌋꆀꐯꐞꀋꉆꌠ。ꉢꀀꈤꄩꀀꄉꐥꐩꉪꏢꇬꎷ，ꃰꊿꂷꇬꐥꇬꀑꀋꐥꑊꀋꐥꇬꑽꀋꐥ，ꎆꀋꐥꋙꀋꐥꇬꑽꀋꐥ，ꇭꀧꒉꄚꑲꆏꁌꇐꈤꐯꁌꇐꈤꃅꉪ。ꊂꆅꌒꇈꆅꉚꅉꄉꅐꇁꄮꇬꑊꑍꒊꆭꀕꃅꌷꅉꂣꈓꄉꌧꇐꌷꌦ，ꌧꇐꈬꄉꎧꑱꃅꑱ，ꉠꉂꆏꆅꌠꈻꌠꊭꌠꇬꈴꁧꀐꉂ。
ꉢꉌꂵꈐꇿꉈꇿꏿꄉꌷꊭꌷꄏꌷꎖꂰꄮꇬ，ꎰꁥꂷꋌꇁꉢꀳꌦꀐ，ꎰꁥꎭꑌꆐꀋꉬ，ꉢꁧꇉꃷꌋꋙꋠꀋꉆ，ꈊꃀꑌꀋꀀꃅꌋꏢ，ꆅꌋꋰꀋꄐꃅꄯꒉꉢꌌꌃ。ꀉꄉꀉꂿꑌꄚꐊꉌꂵꋍꃢꊰꌦ，ꑠꐛꅹꊂꉢꌷꆏꇈꀁꇬꇁꄮꆏꀉꂿꌌꂸꂷꃅꄉ。ꆅꉚꅉꃰꊿꄚꄉꉌꊰꌠ，ꀉꂿꇴꌠ；ꃰꊿꄚꄉꉌꇿꌠ，ꉌꃀꊷꆣꀕꌠꌐꀋꉆ。
ꋌꄹꈎ，ꉢꑍꊎꋌꈓ，ꉢꎻꏃꃅꉬꉎꋍꏮꑟꇉꇁꀐ，ꀋꎺꇁꀋꉆ，ꐥꐩꆹꁒꍠꀕꃅꉢꋌꆽꌕꇅꁵ，ꉢꆹꊼꇅꆅꋑꃅꈭꐩꒉꆭꀕꃅꇬꐎꉆ。ꋌꃢꆅꈻꈭꐩꉢꀉꅰꃅꐥꐩꁌꒉ、ꀑꇬꁌꒉ，ꀉꅰꃅꀿꃀ、ꏣꑟ、ꐋꀨꁌꒉ、ꉂꅉ。 https://t.cn/R2d4eGN

ꀉꁌ
ꁱ/ꐚꑕꒉꎆ
ꉢꊂꋊꊂꒆꀉꁌꀊꂵꁌꒉꉂꅉꑠꂷꆏꐥꍂꃅꇬꉚꒉꇬꎷ，ꐥꍂꃅ。
ꈬꈎꄮꇬꀉꂿꏢꁮꑌꄉꉂꏣꉩꏵꀕꌠꄜꄡꑟ，ꈬꈎꄮꇬꀉꂿꏢꁮꑌꄉꉙꇁꂘꅇꌷꄡꑟ，ꈬꈎꄮꇬꀉꂿꏢꁮꑌꄉꊿꐈꀊꂵꁮꅉꅲꄡꑟ，ꈬꈎꄮꇬꀉꂿꏢꁮꑌꄉꍜꇰꀉꇐꁮꅉꅲꄡꑟ。ꂷꉐꀋꈉꇁꑌꐛ，ꃅꊭꑳꁮꌸꑠꑍ，ꀉꁌꆹꐥꍂꃅꃀꉂꇁꄿꋖ、ꃀꉂꇱꋓꍬ，ꈑꅪꑄꌋꑊꋌꇉꑌꀋꇿ，ꎧꏸꈈꌋꐰꇑꆦꑌꀋꂪ。ꑭꁏꀑꊥꑓꁴꑰꀕꇤ，ꄸꅤꄸꑣꄸꈐꌦꆈꇓ。ꐥꐩꆹꅲꐆꀕꃅꀉꁌꅳꀨꋌꆽꏀꊼꇅꁵꀐ，ꀉꁌꆹꆅꌠꋌꋰꄉꑊꑍꒉꆭꀕꃅꐥꐩꏭꊝꇬꎷ，ꐥꐩꏯꈌꊰ、ꀁꊰꈎꑠꆹꀉꁌꉪꃅꉪꀋꋻ。ꀉꁌꒆꄮꐧꋦꀉꋩꂷꃰꊿꂮꐚꈠꆺ、ꐯꌉꐯꆭ，ꀉꁌꆹꌩꇨꌟꃅꁦꀑꋦ，ꒉꇨꌟꃅꇓꄿꋦ，ꉷꃅꍩꈌꋍ，ꆀꃅꐳꈌꋍ。ꎭꇁꅧꌠꉬꇮꀉꁌꋌꐕꉆꅉꂥ、ꂿꅉꐯ、ꌧꇐꇨ，ꋌꑌꌺꍸꄸꈪꑌꐥꁮ。

ꀉꁌꄿꏀꐛꈭꐩꃤꀳꈜꅂꆹꑌꊝꀋꌋ，ꒉꈭꒊꊨꈭꑌꊝꀋꌋ，ꍀꉌꆿꉌꑌ，ꃅꊋꇌꊋꑌ，ꉌꂵꑌꀬ，ꆧꁨꑌꄐ。ꈌꈩꉐꍣꊈꇁꌐꐰꊰꀋꋻꑴꄸ，ꈌꑌꉐꎴꃆꃀꅺꊈꑌꀥꄐ，ꑭꑌꇇꎴꋪꋩꅔꇬꑌꀥꄐꑴꄸ，ꑘꀕꌕꑍꌕꉖꉙꇬꈌꀋꊰꑴꄸ，ꑮꑟꅪꏸꋍꑍꃰꊿꈍꑋꋌꉙꉌꐡꑓꇗ，ꀉꐔꈍꑋꀉꁌꉙꅇꅲꄉꑮꏾꉌꂵꉪꇐꇙꋏꀕꋻꄸ。ꉪꏤꁡꇤꌤꆿꃆꑘꑞꅐꄿꂿꀉꁌꇴꌋꉉꇬꎷꑟꃅ，ꀘꇁꑊꇨꑊꋌꀱꀋꈹ，ꃀꇁꌒꇨꃤꈌꀱꀋꉉ，ꑠꐛꅹꃆꑘꀉꁌꉉꌠꉉꀱꀋꋻ，ꃤꈌꀉꁌꉉꌠꆽꁏꀋꋻ。
ꉐꐚꆈꑰꀕꀉꋩꄹꉈꀉꁌꆹꉘꀋꇉꃅꋧꃅꐞꁧꀐ，ꏣꑟꊈꌐ、ꃷꇎꃷꇤꉬꇮꉌꂵꈢꑓꁴꉐꌦꌵꈭꐩꏓꄉꋩꏦꇬꎷꀑ。ꃶꐚꃅꀉꁌꆹꐥꑌꈤꒉꃅꐥ、ꐥꌒꃅꐥ，ꌺꇖꀋꃋꉬꇮꎵꃀꃬꏿꎧꏸꅗꃅꀵꇬꍈ，ꁡꇤꀉꁌꀊꂵꐯꇰꀉꁌꁯꇬꎷ，ꇭꀧꉌꂵꐯꐊꊷꆣꀕ，ꒌꆠꁮꅉꐯꐊꊷꆣꀕ；ꌦꑌꈤꒉꃅꄉꌦ，ꃆꄔꂣꈓꀀꄉꒊꌋꀕꃅꁧ，ꀉꁌꌌꇬꎭꄹꉈꑌꃅꑆꃴꇉꀕ。ꀉꁌꐗꉻꄩꄉꇓꂵꌌꃰꇌꋍꃅꇊꄉ，ꉈꑴꀁꈈꁬꑌꁉꉘꁮꅐꇁꁆꏯꄉ，ꋋꆹꅡꈭꐗꉻꉬꑴꄸ，ꎹꄓꈨꑭꌟꃅꁡꇤꋌꌸꊷꆣꀕ，ꈄꋊꈄꌺꒆ，ꈄꌺꐳꐎꌌꄏꀕꆹꀋꐚ。ꀉꁌꃀꐛꊂꈍꑋꁮꆪꐛꈭꐩ，ꐈꐰꇑꐛꑴꄸ，ꉪꏤꑌꑿꑌꀻꎆ、ꆿꍯꑌꂷꌵ、ꊿꇬꑌꋬꂻ。
ꀉꁌꊎꉢꁴꇊꌠꆹꎺꏣꐝꍠꀕꑠꊭ，ꐥꐩꀉꋩꊭꀋꎺꇁꀋꉆ，ꃶꐚꃅ。ꀉꁌꐊꑿꆫꁦꀑꏪ，ꃮꉜꊫꊂꏪ，ꌳꈄꁮꅉꋍꂷꇈꋍꂷꃅꌧꉠꈌꊐ，ꉜꇉꂿꀉꁌꆹꈄꋊꈄꌺꑟꉂꌠꉬꅊꇈ。ꃅꈎꃅꆪꏦꏪꇓꂃꄓꃅꄓ，ꀉꋩꄮꉢꑌꇓꈓꄉꄯꒉꌷꄏꀐ，ꀉꁌꑌꐥꅉꃀꅉꑟ，ꃆꑘꃤꈌꑌꀉꅰꀋꉉꀐ，ꀉꁌꆹꃮꍈꉘ、ꃬꍈꉘ，ꑍꃀꑍꃆꉉꑘꉉꄉꊌꌠꎆꍈꋌꏏꉢꁴꇬꎷ，ꀉꁌꆹꂮꋻꈻꋻ、ꎭꋻꅧꋻꐛꅹꀉꅰꃅꎭꌠꈻꌠꌧ……
ꀃꑍꉢꉌꆐꅑ，ꉢꊨꏦꌂ。ꉢꅉꀕꇈꅉꀕꃅ“ꀉꁌꌦꅉꌦ，ꀉꇖꈩꅉꈩ”ꄷꆈꌠꇐꀴꋌꇬꉪꇬꎷ，ꀃꑍꉢꉪꀽꀐ，ꉜꇉꂿꋋꆹꀉꁌꀉꇖꇢꊭꉂꏣꅼ、ꉂꏣꎴꐛꅹꀉꇖꏮꅰꑣꌠꉬꅊꇈ。
ꀉꁌꋧꃅꐞꄹꈎ，ꉢꀉꉘꉌꂵꑌꄉꀉꉘꉪꐩꀁꆓꀁꉘ，ꀉꉘꉌꂵꑓꋪꀁꐯ，ꀉꁌꂴꆽꄉꌧꇐꂿꇐꃴꇁꆧꈨꒉ、ꏂꇁꏪꈨꒉꍈꌷꉌꂵꊐꀋꄉꃅ，ꀉꁌꇖꍈꉬꄸꇬꉢꀱꉠꑊꏦ、ꉢꀱꉠꎲꄏ。ꀉꉘꉌꂵꑌꄉꀉꁌꂴꆽꑌꇬꉂꏣꄜꀬꄜꀋꀬ，ꀉꁌꉙꅇꂘꅇꁁꌧꁁꀋꌧ。ꈍꄮꇈꉈꉢꀄꂼꂻꏾ，ꀄꂼꀉꁌꌋꆀꐯꏭꅇꄜꑠꂷꂻꏾꇬꎷ，ꀉꁌꐊꑿꆫꁦꀑꁧꄩꏯ，ꁧꄩꑌꄉꀉꁌꂴꊨꋍꏢꇈꋍꏦꃅꍠ，ꀉꁌꐊꃆꉉꑘꉉ，ꌧꇁꂿꌠꌷ，ꈄꇁꑳꌠꌷꌠꀄꂼꁌꇐꈤꑠꂷꈍꄮꑲꆀꂻꇁꀋꐚ，ꉢꏁꌾꀕꃅꀉꁌꑭꐩꄩꉆꄉꇁꉚ。 https://t.cn/R2d4eGN